Ohali Yosi Ndopo Yi Pua
“Eye Handa, lupange waye wa lipua.”—ESINUMUĨLO 32:4.
1, 2. (a) Momo lie o kuetele onjongole yoku kala otembo ka yi pui? (b) Momo lie omanu valua ka va tavela ku Suku una wa linga olohuminyo vi komõhisa?
OVE HẼ, o sole oku sokolola ndomo omuenyo uka kala Voluali Luokaliye palo posi? Citava okuti, pamue wa siata oku sokolola ndu okuti, o kasi ale Voluali Luokaliye oku linga ovopange oyongola, loku lilongisa ekalo liovina viosi vi kasi lomuenyo. Pamue wa siata oku sokolola esanju oka kuata poku talavaya kumosi la vakuene, kuenda oku pongolola oluali oco lu linge ofeka yelau. Ale o sokolola uloño oka kuata woku linga ovina vimue ndeci: Oku panga ovikuata, oku tunga olonjo, oku sika ovisikilo, kuenda oku linga ovina vikuavo via posoka okuti, ka vi tẽliwa oku lingiwa voluali lulo luohali. Handi vali, pamue wa siata oku sanjukila ohuminyo yocipango ca Yehova yoku tu ĩha “omuenyo wocili” okuti, tu kala otembo ka yi pui.—1 Timoteo 6:19.
2 Tu kuete esumũlũho lioku sapuila vakuetu elavoko li sangiwa Vembimbiliya. Pole, omanu valua ka va tava kelavoko liaco. Ovo va popia hati, elavoko liaco li kasi ndonjoi yoku kemba omanu ka va kuete ukũlĩhĩso. Ovo ka va tava ku Suku una wa likuminya oku eca omuenyo ko pui Voluali Luokaliye palo posi. Momo lie? Momo evĩho li kasi oku livokiya calua voluali. Ovo va popia hati, nda kua kaile Suku ukuonenewosi, haeye ukuacisola, nda wa malako evĩho lohali yi kasi voluali. Momo ka kuli o Suku yecelela evĩho. Nda kuli o Suku yaco, ci lekisa okuti, ka yi kuete unene, ale ka yi kuete ocikembe lomanu. Omanu valua va siata oku kolela kovisimĩlo viaco. Pole, Satana Eliapu, eye o kasi oku va kemba lovisimĩlo viaco.—2 Va Korindo 4:4.
3. Epulilo lipi tu pondola oku kuatisa omanu oco va sange etambululo liaco? Momo lie etu Tulombangi via Yehova tu kuetele epondolo lioku eca etambululo liaco?
3 Etu Tulombangi via Yehova, tu kuete ocikele coku kuatisa omanu va kasi oku kembiwa la Satana haivo va yapuisiwa lovisimĩlo violuali. (1 Va Korindo 1:20; 3:19) Tua kũlĩha esunga lieci omanu valua ka va tavela kolohuminyo Viembimbiliya. Ovo ka va kũlĩhĩle Yehova. Handi vali, ka va kũlĩhĩle onduko yaye lelomboloko lionduko yaco, lovituwa viaye, kuenda olohuminyo viaye. Etu tu kuete esumũlũho lioku kũlĩha ovina evi. Omo liaco, tu sukila oku kũlĩhĩsa ndomo tu kuatisa omanu va “kasi vowelema,” oco va sange etambululo liatiamẽla kapulilo amue ndeci: ‘Momo lie Suku a kasilili oku ecelela evĩho lohali?’ (Va Efeso 4:18) Catete, tu kũlĩhĩsi ndomo tu eca etambululo. Noke tu konomuisa ndomo ovituwa via Yehova vi limbukiwila konjila a nõlapo yoku tetulula ovitangi.
Ndomo tu Eca Etambululo
4, 5. Eci omunu umue a pula esunga lieci Suku a kasilili oku ecelela ohali, nye tu sukila oku linga tete? Cilombolola.
4 Eci omunu umue a pula hati: Momo lie Suku a kasilili oku ecelela evĩho, tu tambulula ndati? Tu sukila oku u lomboluila ulandu wa pita vocumbo Cedene. Poku cilinga, ci kuatisa calua. Pole, tu sukila oku eca uvangi wa suapo. (Olosapo 25:11; Va Kolosai 4:6) Tu konomuisi atosi atatu Embimbiliya tu pondola oku kuama osimbu handi ka tua ecele etambululo.
5 Catete, tu sukila oku kũlĩha okuti, nda omunu wa sakalala calua levĩho li kasi voluali, citava okuti, o kasi oku liyaka lovitangi, ale o kuete umue vepata o kasi oku liyaka lovitangi viaco. Kuenje, osimbu handi ka tua fetikile oku u lomboluila ono yovitangi, tu sukila oku lekisa ocikembe kokuaye. Upostolo Paulu wa popia hati: “Lili lava va lila.” (Va Roma 12:15) Oku ‘lekisa ocikembe’ komunu tu sapela laye, ci kuete esilivilo liocili. (1 Petulu 3:8) Momo eci omunu a limbuka okuti, tu kuete ocikembe laye, o kuata onjongole yoku yevelela ovina tu popia.
6, 7. Momo lie tu sukilila oku pandiya omanu va linga apulilo atiamẽla kovina viespiritu?
6 Cavali, tu sukila oku pandiya omunu wa linga epulilo. Omanu vamue va siata oku sima okuti, nda umue wa linga apulilo, ci lekisa okuti ka kuete ekolelo ku Suku, kuenda ka kuete esumbilo kokuaye. Pole, oku linga apulilo ka ku lomboloka okuti, omunu ka kuete ekolelo ku Suku ale ka kuete esumbilo. Omanu va Yehova kosimbu, va lingailevo apulilo aco. Soma Daviti wa pula hati: “A Yehova, o talamela nye kupãla? Nye o salamela kolotembo viohali?” (Osamo 10:1) Uprofeto Havakuki wa pulavo hati: “A Yehova, toke pi ndi likutilila ekuatiso liove kuenje ku yevi? Toke pi mbilikiya siti, popela, kuenje ku popela? O ndekisila nye evĩho? O mbanjisila nye ahuku? Momo ndete okunyõla lokupunda, ema lia wenguka. Oku yaka kua katuka.”—Havakuki 1:2, 3.
7 Omanu va lingile apulilo ava, va kuatele ekolelo ku Suku kuenda va lekisile esumbilo kokuaye. Anga hẽ Suku wa va pisa omo lioku linga apulilo aco? Sio, ka va pisile. Momo wa ecelela okuti, apulilo aco a sonehiwa Vondaka yaye. Cimuamue haico koloneke vilo. Nda omunu wa sakalala calua levĩho li kasi voluali, ci lekisa okuti, o kasi lonjala Yondaka ya Suku. Momo oyongola lika atambululo a tunda Vembimbiliya. Ivaluka okuti, Yesu wa pandiya omanu va kasi lenyona liovina viespiritu, ale “vakuosuke wovutima.” (Mateo 5:3) Omo liaco, tu kuete ocikele coku kuatisa omanu vaco oco va sange esumũlũho Yesu a likuminya.
8. Alongiso api a siata oku vetiya omanu oku tava okuti Suku eye o kasi oku nena ovitangi? Kuenda tu pondola ndati oku kuatisa omanu vaco?
8 Catatu, tu sukila oku kuatisa omunu oco a kũlĩhe okuti, Suku hayeko wa nena evĩho li kasi voluali. Omanu valua va siata oku longisiwa okuti, Suku eye wa viala oluali, kuenda ovina vi kasi oku pita voluali, wa vi sokiya ale tunde kosimbu. Eye, wa kũlĩha esunga lieci a kasi oku nenela ohali komanu. Alongiso aco, uhembi. Momo a lekisa etombo ku Suku kuenda a vetiya omanu oku sima okuti, Yehova eye wa nena evĩho lohali yi kasi voluali. Poku eca etambululo komunu, tu sukila oku kuama Ondaka ya Suku. (2 Timoteo 3:16) Yehova hayeko o kasi oku viala oluali lulo luevĩho. Pole, Satana Eliapu eye wa viala oluali. (1 Yoano 5:19) Yehova hayeko wa sokiya ovitangi omanu va siata oku liyaka lavio. Pole, wa eca elianjo komanu kuenda epuluvi lioku linõlela eci ciwa leci cĩvi, kuenda eci ca sunguluka leci ka ca sungulukile. (Esinumuĩlo 30:19) Handi vali, Yehova hayeko ono yevĩho. Momo eye o nyale evĩho kuenda o lekisa ocikembe komanu vana va tala ohali.—Yovi 34:10; Olosapo 6:16-19; 1 Petulu 5:7.
9. Ovimaleho vipi “ukuenje wa lunguka” a siata oku tu ĩha oco tu kuatise lavio omanu oku kũlĩha esunga lieci Suku a ecelela ohali?
9 Nda wa yevelela omunu wa linga epulilo, loku lekisa ocikembe kokuaye, oka limbuka okuti o fetika oku kuata onjongole yoku kũlĩha esunga lieci Suku a kasilili oku ecelela ohali. Omo liaco, “ukuenje wa kolelua haeye wa lunguka” wa pongiya ovimalẽho vialua vioku kuatisa omanu vaco. (Mateo 24:45-47) Kohongele Yofeka Yolombangi via Yehova ya lingiwa kunyamo wo 2005 toke kefetikilo liunyamo wo 2006, kua sandekiwa otratadu yi kuete osapi ya linga hati: Ohali Yosi Ndopo yi Pua. Nda o tratadu yaco ya sandekiwavo velimi liove, kũlĩha ciwa ulandu waco. Cimuamue haico catiamẽla kelivulu losapi hati, Embimbiliya li Longisa Nye? Cilo, lia sandekiwa kueci ci soka 157 kalimi, kuenda mu sangiwa ovipama vieca etambululo kapulilo amue a kuete esilivilo. Omo liaco, lilongisa ciwa ovina vi sangiwa vo tratadu kuenda velivulu liaco. Momo vi lombolola ciwa ocitangi catiamẽla kuviali wa Suku, cina ca katuiwa vocumbo Cedene. Kuenda vi lombololavo esunga lieci Yehova a nõlela onjila a kasi oku kuama yoku tetulula ocitangi caco. Ivalukavo okuti, osimbu o lombolola atosi aco komunu wa linga epulilo, o kasi oku u wĩha ukũlĩhĩso wa velapo watiamẽla ku Yehova kuenda kovituwa viaye.
Situlula Ovituwa Via Yehova
10. Momo lie omanu valua ka va kuetele elomboloko lieci Suku a kasilili oku ecelela ohali, kuenda ukũlĩhĩso upi u pondola oku va kuatisa?
10 Osimbu o kuatisa omanu oku kuata elomboloko lieci Yehova a kasilili oku ecelela omanu oku vialiwa la Satana, tiamisila ombangulo yove kovituwa via Yehova. Omanu valua va kũlĩha okuti, Suku ukuonenewosi. Momo va siata oku ciyeva komanu vakuavo. Pole, ka va kuete elomboloko lieci ka malẽlako evĩho lohali omo liunene waye. Pamue citava okuti, ka va kũlĩhĩle ovituwa vikuavo via Yehova ndeci: Oku kola kuaye, esunga, uloño, kuenda ocisola caye. Yehova wa siata oku lekisa ovituwa viaco lonjila yimue ya li pua. Embimbiliya li popia hati: ‘Upange waye wa li pua.’ (Esinumuĩlo 32:4) Ndamupi o situlula ovituwa viaco poku tambulula omunu wa linga apulilo amue ndava a sangiwa vocipama cilo? Tu konomuisi apulilo aco.
11, 12. (a) Momo lie Yehova ka ecelele Adama la Eva eci va lueya? (b) Momo lie Yehova kaka ecelela ekandu otembo ka yi pui?
11 Anga hẽ, Yehova wa sukilile oku ecela Adama la Eva eci va lueya? Oku ecela Adama la Eva, hayoko ya kala onjila yoku tetulula ocitangi. Omo okuti, va lipuile eci va lueya va lekisa okuti, va likala uviali wa Yehova kuenje, va nõlapo oku songuiwa la Satana. Ovo, ka va lekisile uvangi woku likekembela. Citava okuti, omanu va pula esunga lieci Yehova ka ecelele ekandu lia Adama la Eva. Momo va sima okuti Yehova wa sukilile oku sepula ocihandeleko caye loku ecelela ekandu kuenda esino. Vetambululo eli, mua kongela ocituwa cimue ca velapo kekalo lia Yehova okuti, oku kola Kuaye.—Etundilo 28:36; 39:30.
12 Embimbiliya li tukula olonjanja vialua oku kola kua Yehova. Pole voluali lulo luevĩho, omanu valua ka va kuete elomboloko liocituwa caco. Yehova wa lipua kuenda o kasi ocipãla lekandu. (Isaya 6:3; 59:2) Eye wa linga eliangiliyo lioku malako ekandu, kuenje kaka ecelela okuti, ekandu lika amamako. Nda Yehova wa ecelele ekandu otembo ka yi pui, nda lomue omunu o kuete elavoko lioku kala otembo ka yi pui. (Olosapo 14:12) Eye ndopo oka ecelela okuti, ovilulikilo viaye viosi vika li pua. Yehova oka tẽlisa ovina viaco omo lioku Kola kuaye.
13, 14. Momo lie Yehova ka nõlelepo oku kundula olondingaĩvi vocumbo Cedene?
13 Anga hẽ ca sungulukile okuti, Yehova o nyõla Adama la Eva kuenda Eliapu oco a lulike omanu vakuavo? Ocili okuti, Yehova wa kuatele unene woku ci linga kuenda omo liunene waco, ndopo oka malãko olondingaĩvi. Omanu vamue pamue va pula ndoco: Momo lie Yehova ka ci lingilile kosimbu eci voluali mua kala lika olondingaĩvi vitatu? Momo nda wa cilingile, nda wa tu teyuila kekandu kuenda kohali yosi yi kasi voluali. Oco hẽ, momo lie Yehova ka nõlelepo onjila yaco? Elivulu Liesinumuĩlo 32:4, li popia hati: “Olonjila viaye viosi viesunguluko.” Yehova weyuka lika esunga. Eye “o sole esunga.” (Osamo 37:28) Omo okuti, Yehova o sole esunga, wa yuvula oku kundula olondingaĩvi vocumbo Cedene. Momo lie?
14 Usuanji wa Satana, wa katula ocitangi catiamẽla kuviali wa Suku. Noke Yehova omo liesunga liaye, wa nõlapo oku eca etambululo lia sunguluka kusuanji waco. Nda Yehova wa nõlelepo oku va kundula vonjanja yaco, nda ka ecele etambululo lia sunguluka. Eye nda wa lekisa uvangi wunene waye. Pole, usuanji wa Satana ka wa katuile ocitangi catiamẽla kunene wa Yehova. Handi vali, Yehova wa sapuile ocipango caye ku Adama la Eva cokuti va kuata omãla kuenda oku yukisa oluali loku viala oviendalomuenyo viosi vi kasimo. (Efetikilo 1:28) Nda Yehova wa nyõlele Adama la Eva, nda ka tẽlisile ocipango caye catiamẽla komanu. Eye omo liesunga liaye, ka ecelele okuti o va kundula. Momo olonjanja viosi wa siata oku tẽlisa ocipango caye.—Isaya 55:10, 11.
15, 16. Eci omanu va lekisa ovisimĩlo viavo vioku tetulula ocitangi ca katuiwa vocumbo Cedene, tu va kuatisa ndati?
15 Anga hẽ voluali mua kala omunu ukuavo nda wa kuata uloño wa velapo woku tetulula ocitangi caco okuti Yehova ci sule? Omanu valua va siata oku lekisa ovisimĩlo viavo vioku tetulula ocitangi ca pita vocumbo Cedene. Anga hẽ ovisimĩlo viaco ka vi lekisa okuti, va kũlĩha onjila ya sunguluka yoku tetulula ocitangi caco? Olondaka viavo ka vi lekisa okuti, va kuete ovisimĩlo vĩvi. Pole, ka va kũlĩhĩle ovituwa via Yehova kuenda uloño waye. Upostolo Paulu eci a sonehela Akristão voko Roma, wa situlula ciwa uloño wa Suku. Noke wa lombololavo “elumbu li kola” liocipango ca Yehova coku yovola omanu lekuatiso Liusoma wa Mesiya kuenda oku kemãlisa onduko yaye yi Kola. Oco hẽ, nye Paulu a yeva vutima waye poku kũlĩha uloño wa Yehova woku situlula ocipango caco? Eye wa popia hati: “Kukualondunge viosi, [okuti] eye lika Suku, ku kale ulamba ko pui la Mitakati yaco Yesu Kristu. Amene.”—Va Roma 11:25; 16:25-27.
16 Paulu wa kũlĩhĩle okuti, Yehova eye lika ukualondunge via velapo voluali luosi. Voluali ka muli omunu ukuavo o kuete uloño wa velapo woku tetulula ocitangi Satana a katula catiamẽla kuviali wa Yehova. Omo liaco, tu sukila oku kuatisa omanu oco va kũlĩhevo eci catiamẽla ku Suku ‘ukuoloño wovutima.’ (Yovi 9:4) Nda tua kũlĩha ciwa uloño wa Yehova, tu kolela okuti, onjila yaye yoku tetulula ovitangi oyo lika ya sunguluka.—Olosapo 3:5, 6.
Limbuka Esilivilo Liocisola ca Yehova
17. Oku kũlĩha ocisola ca Yehova, ci kuatisa ndati omanu vana ka va kũlĩhĩle esunga lieci a kasilili oku ecelela ohali?
17 Embimbiliya li popia hati: “Suku eye ocisola.” (1 Yoano 4:8) Poku popia olondaka evi, li situlula ocituwa ca velapo pokati kovituwa viosi via Yehova. Ocituwa caco ci lembeleka omanu va sumua omo lievĩho li kasi voluali. Yehova wa siata oku lekisa ocisola caye volonepa vialua komanu vakuakandu. Ocisola oco co vetiya oku eca elavoko komãla va Adama la Eva kuenda oku va yuluila onjila yoku amẽla Kokuaye loku kuata ukamba Laye. Handi vali, ocisola ca vetiyavo Yehova oku sokiya ocisembi cina ca yululu onjila yoku ecela akandu omanu kuenda oku tumbulula omuenyo ko pui haiwo wa li pua. (Yoano 3:16) Ocisola co vetiyavo oku lekisa epandi komanu loku va ĩha epuluvi lioku tinduka ku Satana kuenda oku nõla Yehova okuti, o linga Ombiali yavo.—2 Petulu 3:9.
18. Tu kuete esumũlũho lioku kuata ukũlĩhĩso upi? Nye tuka konomuisa vocipama cikuaĩmo?
18 Ocitunda cimue cetavo eci a linga ohundo yonjivaluko yomanu va pondiwa lolongangala, wa popia hati: ‘Ka tua kũlĩhĩle esunga lieci Suku a kasilili oku ecelela evĩho lohali toke cilo.’ Olondaka viocitunda caco, vi sumuisa calua! Etu tua sanjuka, momo tua kũlĩha esunga lieci voluali mu kasilili ovitangi. (Esinumuĩlo 29:29) Omo okuti, Yehova ukualondunge via velapo, ukuesunga, haeye ukuacisola, tua kolela okuti, oka mãlako ohali yosi. Eye wa likuminya oku ci linga. (Esituluilo 21:3, 4) Oco hẽ, nye ci popiwa catiamẽla komanu va fa osimbu? Anga hẽ onjila Yehova a nõlapo yoku tetulula ocitangi ca katuiwa vocumbo Cedene ka yeci elavoko kokuavo? Sio hacoko. Yehova omo liocisola caye, wa eca elavoko lioku va pindula. Vocipama cikuãimo tuka konomuisa ondaka yaco.
O Tambulula Ndati?
• Nye tu pondola oku sapuila omunu una o pula esunga lieci Yehova a kasilili oku ecelela ohali?
• Yehova wa lekisa ndati oku kola kuaye lesunga liaye konjila a nõla yoku tetulula ocitangi ca pita vocumbo Cedene?
• Momo lie tu sukilila oku kuatisa omanu oco va kuate elomboloko liocisola ca Yehova?
[Elitalatu kemẽla 15]
Kuatisa omanu va sumua omo liovitangi vi kasi voluali
[Elitalatu kemẽla 17]
Daviti la Havakuki va lingile apulilo ku Yehova Suku