Ku Vakuakutanga

TU KUETE esanju lioku ku sapuili okuti okupisa ketendelo lilo, tuka linga apongoloko amue Vutala Wondavululi. Osimbu ka tua fetikile oku tukula apongoloko aco, tu yongola oku sapula eci ka ca pongolokele.

Onduko yoresta yilo, Utala Wondavululi Wusapula Usoma wa Yehova, uka amamako oku sivaya Yehova, Suku yocili, loku lembeleka omanu lesapulo liwa Liusoma. Ovipama vi sangiwa kemẽla 5 toke 9, vi lekisa eci ci lomboloka Usoma, kuenda eci u keya. Handi vali, Utala Wondavululi, uka amamako oku vetiya vakuakutanga oku kolela Yesu Kristu, kuenda uka amamako oku kakatela kocili Cembimbiliya, loku lombolola ndomo ovitumasuku vi kasi oku tẽlisiwa koloneke vilo, ndeci wa siata ale oku ci linga vokuenda kuanyamo.

Nye cika pongoluiwa? Tu ku sapuili ovina viokaliye vika moleha Vutala Wondavululi uka sandekiwa olonjanja vikuãla vunyamo kelimi Liumbundu.a

Vetendelo lilo, muka sandekiwa ovipama vika vetiya omanu oku sokolola lutate. Ocipama losapi hati: “Wa ci Kũlĩha?” cika lombolola ovolandu amue a sangiwa Vembimbiliya. Ocipama losapi hati: “Kuata Ukamba la Suku,” cika lekisa eci tu pondola oku lilongisa catiamela ku Yehova lekuatiso Liembimbiliya. Ocipama losapi hati: “Vakuakutanga va Pula,” cika tambulula apulilo amue atiamẽla Kembimbiliya. Omanu vamue va siata oku pula okuti: “Usoma wa Suku u Kasi hẽ Vutima Wetu?” Oka sanga atambululo aco kemẽla 13.

Kuka sandekiwavo ovipama vika kuatisa apata. Ocipama losapi hati: “Ceci ci Kuatisa Apata Oku Kala Lesanju,” cika lekisa ovitangi apata a siata oku liyaka lavio, kuenda ndomo olonumbi Viembimbiliya vi kuatisa oku tetulula ovitangi viaco. Ocipama losapi hati: “Longisa Omãla Vove,” cika sandekiwila olonjali oco vi kuatise omãla vavo. Ocipama losapi hati: “Kamalẽhe Vetu,” ca pongiyiwila oku kuatisa amalẽhe oku lilongisa Embimbiliya.

Vutala Wondavululi weciwa komanu muka molẽhavo ovipama vimue vokuenda kuanyamo. Ocipama losapi hati: “Setukuli Ekolelo Liavo, ” cika tu kuatisa oku kuama ongangu yomanu va tukuiwa Vembimbiliya. Kemẽla 18 toke 21, oka tanga ulandu wuprofeto Eliya kuenda ndomo tu pondola oku setukula ekolelo liaye. Ocipama losapi hati: “Ulandu wa Lomboluiwa la . . . ,” cika lekisa omuenyo wolomisionaliu kuenda wa vamanji vakuavo kolonepa viosi violuali. Ocipama losapi hati: “Ceci tu Lilongisila ku Yesu,” cika lombolola alongiso a velapo Embimbiliya lonjila yimue ya leluka.

Tua kolela okuti Utala Wondavululi, uka vetiya vakuakutanga oku sumbila Embimbiliya kuenda oku kũlĩha eci li longisa. Tu kuete elavoko liokuti Utala Wondavululi uka ku kuatisa oku tẽlisa onjongole yove yoku kũlĩha ocili Cembimbiliya.

​—⁠ASONEHI

[Etosi pombuelo yemẽla]