Ocipama Cokaliye Coku Fetika Alilongiso Embimbiliya
1. Ocipama cipi cokaliye ci ka molẽha Vutala Wondavululi wowiñi, kuenda ca sandekiwa locimãho cipi?
1 Oku upisa kosãi iya, Vutala Wondavululi wowiñi, mu ka molẽha ocipama cimue ci ka tu kuatisa oku fetika alilongiso Embimbiliya. Ocipama caco ci ka kuata osapi hati, “Lilongisila Kondaka ya Suku.” Valua vocikanjo cetu va ka sanjukila oku tanga ocipama caco, momo ca sandekiwila oku sapela lomanu kolonjo viavo.
2. Ovina vipi via kongeliwa vocipama eci?
2 Ovina Via Kongelamo: Osapi kuenda otulosapi, vi moleha ndapulilo oku linga komunu osimbu tu sapela laye. Ovisonehua via velapo via tukuiwa ño, pole ka via sonehiwilile oco omunu a vi tange Vondaka ya Suku. Omo okuti ovinimbu viaco vimbumbulu, ci tava oku vi konomuisa pepito liomunu tua kundila. Ocipama locipama, ci lombolola eci catiamẽla kelivulu Embimbiliya li Longisa oco ci tu kuatise oku pitisa elilongiso velivulu liaco, votembo ya sunguluka.
3. Poku kundila konjo lanjo, ocipama eci ci tu kuatisa ndati oku fetika elilongiso Liembimbiliya pepito liomunu?
3 Ndomo tu Talavaya Laco: Poku eca olorevista, linga apulilo a sangiwa vocipama caco, okuti a pondola oku vetiya onjongole yomunu. Utala Wondavululi Susu–Elombo, u lombolola esilivilo Liembimbiliya. O pondola oku pula ndoco: “Ove hẽ o tenda Embimbiliya okuti Ondaka ya Suku, ale elivulu limue ño liwa? [Ecelela etambululo.] Ñuete esapulo limue liatiamẽla kondaka eyi.” Linga epulilo liatete, tanga ocinimbu catete kuenda ocisonehua ca tukuiwa. Pitulula epulilo liaco, kuenda ecelela okuti omunu eca etambululo. Nda otembo yi ecelela, konomuisa ovipama vikuavo loku kuama apulilo a sangiwamo. Osimbu kua malele ombangulo, linga epulilo li kuãimo locimãho coku pasuisa omunu waco. Linga epasu oco vu konomuisi ovipama vikuavo osemana losemana, osimbu kua nenele orevista yikuavo. Onjila yikuavo, oku teta onimbu poku fetika elilongiso Liembimbiliya lomunu tua sanga onjanja yatete. Noke, u lekisa vorevista ndomo elilongiso liaco li lingiwa.
4. Tu talavaya ndati locipama eci poku linga epasu?
4 O pondola oku lekisa ocipama eci cokaliye komunu wa siata oku tambula olorevista kuenda komanu vakuavo o linga epasu. Ci tava oku popia ndoco: “Vutala ulo Wondavululi, muli ocipama cimue cokaliye. Linga ndu ku lekise ndomo ci kuamiwa.” Tu likutilila okuti ocipama eci cokaliye ci kuatisa omanu valua “ha veya kukũlĩhiso w’Ocili.”—1 Tim. 2:4.