Yehova Wa Siata Oku Tata Afendeli Vaye Va Kuka

“Suku hokuanyako okuti ivalako upange wene kuenda ocisola wa lekisi . . . vonduko yaye.”​—⁠VA HEV. 6:⁠10.

1, 2. (a) Nye o sukila oku ivaluka eci o mõla manji umue okuete owele? (b) Yehova wa siata oku tenda ndati vamanji va kuka?

ECI o mõla vamanji va kuka vekongelo okuti va kuete owele, o sokolola hẽ ulandu Wembimbiliya kelivulu lia Daniele? Vocinjonde cimue Yehova Suku a eca ku Daniele, wa litukula Eye muẽle hati, o kuete owele. Daniele wa soneha hati: “Osimbu nda kala loku vanja, nda mõla ovialo via tumbikiwa, kuenje umue Ukuasimbu wa tumãla. Uwalo waye u yela ndocikokoto kuenda esinga liutue waye ndutele u yela.”​—⁠Dan. 7:⁠9.

² Ocili okuti, utele u kuete evala liyela. Esinga liyela kuenda onduko yokuti “Ukuasimbu,” vi lomboloka okuti Suku o kuete uloño wa lua, kuenda anyamo aye ka a tendiwa. Omo liaco, tu sukila oku lekisa esumbilo kokuaye. Yehova Ukuasimbu wa siata oku tenda ndati afendeli vaye va kuka? Ondaka ya Suku yi popia hati: “Owele ocifuto culamba ca sangiwa vomuenyo wesunga.” (Olosap. 16:​31) Nda manji umue o kuete owele, Suku o sanjukila oku kuka kuaye. Ove hẽ, wa siata oku tenda vamanji va kuka ndeci Yehova a va tenda?

Momo Lie Vamanji va Kuka va Soliwila?

3. Momo lie tu lekisila ocisola ku vamanji va kuka?

³ Pokati kafendeli va Suku va kuka, vamue vatiamẽla Kosungu Yolombangi Via Yehova, vakuavo va kasi oku nyula akongelo, vamue akundi votembo yosi, kuenda vakuavo akundi Vusoma va kasi vakongelo. Pamue wa kũlĩha vamue va kuatele ombili kupange woku kunda olondaka viwa vokuenda kuanyamo alua, kuenda ongangu yavo yiwa ya kuatisa amalẽhe oku linga apongoloko komuenyo wavo. Vamanji vamue va kuka, va tẽlisa ovikele vialua vekongelo kuenda va pandikisa kelambalalo omo lioku kunda olondaka viwa. Yehova kumue ‘lukuenje wa kolelua haeye wa lunguka,’ va sanjukila ekuatiso akulu vaco va siata oku eca kupange Wusoma.​—⁠Mat. 24:⁠45.

4. Momo lie tu sukilila oku sumbila vamanji va kuka kuenda oku va kongela volohutilo vietu?

⁴ Afendeli va Yehova Suku va sukila oku lekisa esumbilo ku vamanji va kuka. Vocihandeleko Mose a tambuile, mua kongelele onumbi yoku sumbila ava va kuka, loku va kapako kuenda oku pokola ku Yehova Suku. (Ovis. 19:​32) Volohutililo vietu tu sukila oku kongelamo vamanji va kuka kuenda oku eca olonpadu ku Suku omo liupange wavo kuenda ocisola va lekisa. Upostolo Paulu volohutililo viaye, wa kongelamo oloñuatisi viaye viupange ndeci, amalẽhe kuenda akulu.​—⁠Tanga 1 Va Tesalonike 1:​2, 3.

5. Tu pondola ndati oku kuatisiwa lukamba wafendeli va Yehova va kuka?

⁵ Vosi yetu tu pondola oku kuatisiwa lukamba wa vamanji va kuka va kasi vekongelo. Afendeli va Yehova vana va kuka, va kuete ukũlĩhĩso walua omo liovina va lilongisa vokuenda kuanyamo alua. Ovo va lilongisa oku lekisa epandi, lohenda, kuenje va sanjuka calua poku longisa ovina viaco kovitumbulukila vikuavo. (Osa. 71:​18) Ene amalẽhe lekisi olondunge osimbu wamamiko oku kuata ukũlĩhĩso u tunda pono ya longa yovava awa.​—⁠Olosap. 20:⁠5.

6. O pondola ndati oku lekisa ku vamanji va kuka okuti wa va sumbila calua?

⁶ Ove hẽ ecelela vamanji va kuka oku limbuka okuti wa va kapako ndeci Yehova a siata oku linga? O pondola oku ci linga poku va sapuila okuti, o tava kovisimĩlo viavo kuenda o va kuetele ocisola omo liekolelo liavo. Nda wa ci linga, va limbuka okuti, wa va sumbila calua. Vamanji valua va kuka, va ivaluka elungulo va tambuile ku vakuavo va kuka, kuenda va limbuka ndomo oku kapako elungulo liaco ca va kuatisa komuenyo wavo.a

Lekisa Ohenda Kovilinga Viove

7. Kulie Yehova a eca ocikele coku tata vana va kuka?

⁷ Suku wa eca kapata onumbi yoku tata ciwa vana va kuka. (Tanga 1 Timoteo 5:​4, 8.) Yehova o sanjuka calua eci apata va tẽlisa ocikele coku tata vangandiavo va kuka ndomo va siata oku litata ovo muẽle. Kuenje, Suku wa siata oku sumũlũisa apata aco omo lialikolisilo avo.b

8. Momo lie vamanji va sukilila oku kuatisa vana va kuka?

⁸ Yehova wa siatavo oku sanjuka eci vamanji va kuatisa vana va kuka okuti epata liavo Hakristãoko, ale ka va yongola oku tẽlisa ocikele cavo. (1 Tim. 5:​3, 5, 9, 10) Vamanji vana va siata oku ci linga, va lekisa okuti, va kuetele ‘ocisola lohenda’ vana va kuka. (1 Pet. 3:⁠8) Ocituwa cavo coku sakalala la vamanji va kuka, ca lekisiwa la Paulu wa popia hati, nda ocimatamata cimosi ci tala ohali, “ovimatamata viosi vi talela kumuamue laco ohali.” (1 Va Kor. 12:​26) Nda tua lekisa ohenda ku vamanji va kuka, ci lekisa okuti tu kasi oku pokola kelungulo lia Paulu wa popia hati: “Ovilemo viene liambatisiko, oco vu tẽlisi ocihandeleko ca Kristu.”​—⁠Va Gal. 6:⁠2.

9. Ovitangi vipi vamanji va kuka va siata oku liyaka lavio?

⁹ Ovitangi vipi vamanji va kuka va siata oku liyaka lavio? Valua va siata oku kava lonjanga. Ovo va sima okuti ka va tẽla oku linga ovina vimue ndeci: Oku enda kondotolo, oku enda konjo yoku tumisa ovikanda, oku yelisa onjo, kuenda oku teleka okulia. Omanu vamue va kuka, pamue onjongole yavo yokulia kuenda yoku nyua ovava yi tepuluka. Kuenje, va sima okuti ka va sukila ovina viaco. Cimuemue haico ci pondola oku pita lavo koku litekula lokulia kuespiritu. Vana va kuka citava okuti va liyaka locitangi coku tanga loku yevelela ovipama kolohongele, kuenje ka va kuata onjongole yoku enda kolohongele. Ekuatiso lipi vamanji va pondola oku eca ku vana va kuka?

Ndomo o Pondola Oku va Kuatisa

10. Nye akulu vekongelo va sukila oku linga oco kũlĩhe nda vamanji va kuka va kasi oku tambula ekuatiso va sukila?

¹⁰ Vamanji valua va siata oku lekisa ongangu yiwa koku kuatisa vana va kuka. Ovo va ci linga poku va landelako ovina va sukila, oku va telekelako okulia, kuenda oku yelisa onjo yavo. Handi vali, va siatavo oku va kuatisa oku pongiya ovipama violohongele, oku vambata kolohongele viaco, kuenda oku endaenda kupange woku kunda. Vamanji vana va kuete oviendelo va va kuatisavo poku enda lavo kolohongele. Nda vana va kuka ka va pondola oku tunda konjo, citava okuti va yevelela ovipama votelefone, ale oku ngalavala ovipama viaco volokasete oco va vi yevelele. Akulu vekongelo va sukila oku kũlĩhĩsa nda vamanji va kuka va kasi oku tambula ekuatiso va sukila.c

11. Lombolola ndomo epata limue lia kuatisa manji umue wa kuka.

¹¹ Vamanji vamue va pondolavo oku yekisa vana va kuka kuenda oku lekisa ohenda kokuavo. Manji umue wa kuka eci ukãi waye a fa, ka kuatele epondolo lioku feta likawaye olombongo vionjo. Eye lukãi waye, va longisile Embimbiliya kepata limue li kuete omãla vavali vafeko okuti, va kuata onjo yinene. Kuenje va eca olohondo vivali ku manji wa kuka oco a kalemo. Va kala laye ciwa, kuenda vo tata vokuenda kueci ci soka 15 kanyamo. Omo liaco, omãla vavo va lilongisa ovina vialua ku manji wa kuka, momo eye wa kuata ukamba lavo. Eye wa kala lavo toke eci a fa noke lioku tẽlisa 89 kanyamo. Toke cilo, epata liaco li eca olopandu ku Suku omo liasumũlũho va tambula poku kala la manji yaco. Ovo ka va pumbile ‘onima’ omo lioku kuatisa ondonge ya Yesu Kristu.​—⁠Mat. 10:42.d

12. Nye o sukila oku linga oco o lekise ocisola ku vamanji va kuka?

¹² Pamue ku kuata epondolo lioku tata vamanji va kuka ndeci epata lia tukuiwa ndeti lia linga. Pole, o pondola oku va kuatisa poku vambata kolohongele, kuenda kupange woku kunda. O pondolavo oku va laleka oco veye konjo yove kuenda oku enda lavo kocitumãlo cimue. Citava okuti o va nyula, kuenda oku lekisa esumbilo kokuavo, ca piãla enene nda va vela. Nda va pondola oku sokolola, o sukila oku va kongela vovina o yongola oku va lingila. Ndaño ka va tẽla oku sokolola, pole va pondola oku limbuka nda va kasi oku tatiwa lesumbilo.

Yehova ka Ivalako Upange Wove

13. Momo lie ci kuetele esilivilo oku kapako olonjongole viava va kuka?

¹³ Oku kapako olonjongole viava va kuka, ci kuete esilivilo. Olonjanja vimue citava okuti va sumua omo liekambo liongusu yoku tẽlisa ovina va enda oku linga eci va kala amalẽhe va kuete uhayele. Manji umue ukãi o kasi oku vumba Yehova ci soka 50 kanyamo okuti wa kala ukundi wa velapo, wa kuatiwa luvei umue u tateka oku endaenda kolohongele. Eye wa siata oku lila, eci a sokolola otembo yalua a enda oku pesila kupange woku kunda okuti cilo ka kuete vali epondolo liaco omo lioku vela. Eci a petama loku lila wa popia hati: “Si pondola vali oku linga ovina vialua.”

14. Elembeleko lipi afendeli va Yehova va kuka va pondola oku sanga volosamo?

¹⁴ Nda wa kuka, wa siata hẽ oku kuata ovisimĩlo ndevi? Ale wa siata oku sima okuti Yehova waku yanduluka? Ukualosamo wa kuatavo ovisimĩlo viaco osimbu ka file handi, kuenje wa pinga ku Yehova hati: “Ku ka mañule eci ñuka. Ku ka njanduluke eci ongusu yange yi tepuluka. Ku ka njanduluke, a Suku, ndaño eci ñuka leci ñala lowele.” (Osa. 71:​9, 18) Yehova ka yandulukile usonehi wosamo, kuenda kaku yandulukavo. Vosamo yikuavo, Daviti wa lekisa ndomo Suku o kuatisa. (Tanga Osamo 68:19.) Ivaluka okuti, nda ove Ukristão umue wa kuka, Yehova o kasi love, kuenda oka amamako oku ku kuatisa.

15. Nye ci pondola oku vetiya vamanji va kuka oku kuata ovisimĩlo via sunguluka?

¹⁵ Ene Ulombangi Via Yehova okuti wa kuki, ovina viosi wa lingi, wa vi lingili ulamba Waye, kuenda ka ivalako ovina viaco. Embimbiliya li popia hati: “Suku hokuanyako okuti ivalako upange wene kuenda ocisola wa lekisi . . . vonduko yaye.” (Va Hev. 6:​10) Yuvula ovisimĩlo viokuti, omo lioku kuka ku kasi oku linga upange u kuete esilivilo ku Yehova. Ovisimĩlo vĩvi, vi piñanya levi viwa. Sanjukila asumũlũho wa siata oku tambula, kuenda elavoko liove lio kovaso! Tu kuete ‘elavoko lioloneke vi keya,’ vina Ululiki wetu a tu likuminya. (Yer. 29:​11, 12; Ovil. 17:31; 1 Tim. 6:​19) Sokolola elavoko liove, likolisilako oku kuata ovisimĩlo via sunguluka, kuenda kuka sime okuti oku endaenda kolohongele ka ci kuete esilivilo!e

16. Momo lie manji umue wa kuka a yonguilile oku siapo ocikele caye coku kala ukulu wekongelo, pole wa kuatisiwa ndati la vakuavo?

¹⁶ Tu konomuisi ulandu wa manji Johan okuti eci a kuata 80 kanyamo, wa tata ukãi waye Sannie okuti cilo ka pondola vali oku linga upange.f Vamanji vamue akãi va enda oku kuatisa Sannie, osimbu manji Johan a enda kolohongele kuenda kupange woku kunda. Vanyamo a pita, manji Johan wa sumuile calua kuenda wa simĩle okuti ka pondola vali oku kala ukulu wekongelo. Loku lila wa popia hati: “Momo lie si liwekelapo oku kala ukulu wekongelo? Si pondola oku tẽlisa ovikele viange.” Akulu vakuavo vekongelo vo sapuila hati: Uloño wove u kuete esilivilo. Noke vo vetiya oku amamako oku kala ukulu wekongelo, ndaño ka pondola oku linga ovina vialua. Kuenje, manji Johan wa tava oku amamako locikele caye, oco a kuatise ekongelo.

Yehova wa Siata Oku Tata Ava va Kuka

17. Ohuminyo yipi Embimbiliya lieca kuava va kuka?

¹⁷ Ovisonehua vi lekisa okuti, vana va kuka va pondola oku amamako oku loñoloha kespiritu ndaño lovitangi. Ukualosamo wa popia hati: ‘Ava va kũliwa vonjo ya Yehova, va imaima apako ndaño va kuka. Va yuka ovava, kuenda va talala.’ (Osa. 92:​13, 14) Upostolo Paulu ndaño wa liyaka lovitangi, ‘ka konyohele momo utima waye wa tumbuluiwa.’​—⁠Tanga 2 Va Korindo 4:​16-18.

18. Momo lie vamanji va kuka kuenda vana va siata oku va tata, va sukilila ekuatiso lia vakuavo?

¹⁸ Koloneke vilo, kuli ovolandu alua a lekisa okuti vana va kuka va pondola oku ‘amamako oku ima apako.’ Vamue ndaño va siata oku tambula ekuatiso liepata liavo, va siata oku sumua omo liovitangi vioku vela kuenda oku kuka. Vana va eca ekuatiso kokuavo, va pondolavo oku sumua. Omo liaco, vamanji vekongelo va sukila oku lekisa ocisola kuava va kuka, kuenda oku kuatisa vana va kasi oku va tata. (Va Gal. 6:​10) Pole, ka ci lekisa okuti, ka tu va ĩha ekuatiso va sukila, kuenje tu va sapuila hati, kuendi, ‘lisikĩlĩli, kuenda kuti.’​—⁠Tia. 2:​15-17.

19. Momo lie vamanji va kuka va kuetele elavoko lioloneke vi keya?

¹⁹ Oku kuka ku tepulula ongusu yoku linga upange vekongelo. Pole, kaku tepulula ocisola Yehova a kuetele afendeli vaye va kuka. Omo liaco, vamanji vosi va kuka va soliwe la Yehova kuenda eye ka va yanduluka. (Osa. 37:28; Isa. 46:⁠4) Yehova amamako oku tata vana va kuka kuenda o va songuila.​—⁠Osa. 48:⁠14.

[Atosi pombuelo yamẽla]

O Tambulula Ndati?

• Momo lie o sukilila oku velisapo vamanji va kuka?

• Tu lekisa ndati esumbilo ku vamanji va kuka?

• Nye ci kuatisa afendeli va Yehova va kuka oku kuata ovisimĩlo via sunguluka?

[Elitalatu kemẽla 18]

Vamanji vekongelo, va siata oku lekisa esumbilo kuava va kuka