Amamako Loku Vokiya Ukũlĩhĩso Wocili Kuenda ‘Lekisa Ombili’
AFENDELI vosi va Yehova va sandiliya oku taviwa laye. Omo liaco, tu sukila oku pamisa ekolelo lietu kuenda oku lekisa ombili kupange woku kunda. Upostolo Paulu o tu sapuila ovitangi vimue via yapula va Yudea vo koloneke viaye, poku popia hati: “Va kuetele Suku ombili, puãi ha lukũlĩhĩso ko.” (Va Rom. 10:2) Ka tuka tendi ekolelo lietu kuenda efendelo lietu ku Yehova, ndocina cimue ka cikuete esilivilo. Omo liaco, tu sukila oku kuata ukũlĩhĩso wa suapo watiamẽla Kululiki wetu kuenda kocipango caye.
Vovikanda Paulu a soneha, wa tokekisa ovituwa vi taviwa la Suku loku kuata ukũlĩhĩso. Eye wa likutilila oco olondonge via Kristu vi ‘yukisiwe lukũlĩhĩso’ wocipango ca Suku oco va ‘kale lovimuenyo vi soka leci ca posokela Yehova, haivio viu sanjuisa. Kuenje ‘kovopange osi awa, va ima apako loku amamako lukũlĩhĩso wa Suku.’ (Va Kol. 1:9, 10) Momo lie tu sukilila oku kuata ‘ukũlĩhĩso wa suapo’? Kuenda momo lie tu sukilila oku amamako lukũlĩhĩso waco?
Ceci ci tu Kuatisa Oku Lekisa Ekolelo
Ukũlĩhĩso wa suapo watiamẽla ku Suku kuenda kocipango caye ndomo ca lekisiwa Vembimbiliya, oyo ono yekolelo lietu. Nda ka tua kuatele ukũlĩhĩso, ekolelo lietu li kala ndonjo ya tungiwa veseke okuti, yi teka lonjanga. Paulu o tu vetiya oku lekisa ombili kupange u kola wa Suku poku lieca ‘ndocilumba ci kasi lomuenyo kuenda oku kuata ovitima viokaliye.’ (Va Rom. 12:1, 2) Oku lilongisa Embimbiliya olonjanja viosi, ci tu kuatisa oku ci linga.
Manji umue ukãi o tukuiwa hati Ewa kofeka yo Polonia, okuti ukundi wa velapo, wa popia hati: “Omo lioku lilongisa Ondaka ya Yehova Suku eteke leteke, ndi kuete ukũlĩhĩso wa suapo watiamẽla Kokuaye. Nda sia ci lingile, ekolelo liange ku Suku nda lia tepuluka, kuenda ekalo liange kespiritu nda lia nyolẽha.” Ka tuka eceleli oku pita lovitangi viaco! Omo liaco, tu konomuisi ulandu wulume umue wamamako oku vokiya ukũlĩhĩso waye watiamẽla ku Yehova okuti, wa kuata esanju omo lioku taviwa Laye.
Ndi “Sole Cimue Ovihandeleko Viove”
Ocisungo ci sangiwa Vosamo 119, Embimbiliya lietu, li tu sapuila ovisimĩlo viukualosamo viatiamẽla kovihandeleko, kovisila, kuenda koku tetulula kua Yehova lesunga. Ukualosamo wa soneha hati: “[Ndi] sanjukila ovisila viove. . . . [Ovihandeleko] viove ovio esanju liange.” Eye wamisako hati: “[Ndi] sole cimue ovihandeleko viove. Ndukuaku vi sokolola ño-o eteke liosi.”—Osa. 119:16, 24, 47, 48, 77, 97.
Ondaka “esanju” kuenda oku “sokolola,” vi lomboloka oku ivaluka ovina tua tanga Vondaka ya Suku, kuenda oku vi sanjukila. Olondaka viaco, vi lekisa ocisola ukualosamo a kuatele poku lilongisa ovihandeleko via Suku. Ocisola caco, ka ca kale ndocina cimue ka cikuete esilivilo vutima wukualosamo. Eye wa kuatele onjongole yalua poku ‘sokolola’ ovihandeleko via Yehova, oco a kuate ukũlĩhĩso watiamẽla kokuaye. Omo liaco, tu pondolavo oku limbuka ndomo a tẽlisa onjongole yaye yoku kuata ukũlĩhĩso wa Suku kuenda ocipango caye.
Ukualosamo wa lekisa ocisola Kondaka ya Suku, lutima waye wosi. Omo liaco, tu sukila oku lipula ndoco: ‘Anga hẽ, nda siata oku lekisa ocisola caco poku lilongisa Ondaka ya Suku? Ndi lekisa hẽ esanju poku tanga kuenda oku konomuisa atosi amue Embimbiliya eteke leteke? Nda siata hẽ oku likutilila osimbu sia tangele Ondaka ya Suku?’ Oco tu lekise okuti, tua siata oku cilinga, tu sukila ‘oku amamako oku vokiya ukũlĩhĩso wa suapo wa Suku.’
Manji Ewa wamisako lulandu waye hati: “Nda siata oku likolisilako oku kuama olonjila vikuavo kelilongiso liange lio pokolika oco ndi vokiye ukũlĩhĩso wange. Tunde eci nda tambula ombrochura losapi hati,‘Veja a Boa Terra,’ nda siata oku yi kuama kelilongiso liange. Nda siatavo oku konomuisa olonumbi vielivulu Estudo Perspicaz das Escrituras, kuenda alivulu akuavo.”
Tu kũlĩhĩsi ulandu wa manji Wojciech kuenda ukãi waye Małgorzata okuti va kuete ovikele vialua vepata. Nye va linga oco vovikele viavo viepata va kongelemo elilongiso Liembimbiliya? “Tua siata oku sokiya otembo yoku lilongisa Ondaka ya Suku pokolika. Noke, vokuenda kuelilongiso liepata kuenda kolombangulo vietu vieteke leteke, tua siata oku sapela atosi tua sanga velilongiso lio pokolika.” Oku amamako lelilongiso liaco, ca va nenela esanju kuenda ca va kuatisa oku ‘amamako oku vokiya ukũlĩhĩso wa suapo.’
Lekisa Ombili Kovina o Lilongisa
Etu Tuakristão tua kolela okuti, ocipango ca Suku ceci okuti, ‘omanu vosi va kuata ukũlĩhĩso wocili, oco va popeliwe.’ (1 Tim. 2:3, 4) Elungulo eli, li lekisa esilivilo lioku tanga Embimbiliya kuenda oku likolisilako oku ‘kuata elomboloko liovina tua tanga.’ (Mat. 15:10) Onjila yimue yi tu kuatisa oku ci linga, oku lekisa ombili kovina tu lilongisa. Omanu voko Berea va lekisa ovituwa viaco eci Paulu a va kundila olondaka viwa. Eye wa popia hati: “Va yeva ondaka lombili kuenje, oloneke viosi, va tanga tanga ovisonehua oku kũlĩhĩsa nda hẽ ovina viaco viocili nda ndati.”—Ovil. 17:11.
Ove hẽ, wa siata oku kuama ongangu yomanu voko Berea okuti poku lilongisa Embimbiliya ku tiamisila utima kovina vikuavo? Ukristão o pondola oku kuama ongangu yomanu vaco, ndaño kosimbu ka limbukile esanju li tunda koku lilongisa. Omanu vamue, osimbu va kasi oku kuka, va kuata owesi woku tanga loku lilongisa, pole, Akristão va sukila oku yuvula ocituwa caco. Ndaño tua kuka, tu pondola oku likolisilako oku yuvula ovina vi tu tateka oku lilongisa. Osimbu amamako oku tanga, o limbuka ovina o pondola oku longisa vakuene. Anga hẽ, ovina wa tanga velilongiso lio pokolika o pondola oku vi sapuila kohueli yove ale ku manji umue ekamba liove? Nda wa ci linga, o patekela ovina viaco, kuenda vi kuatisavo vakuene.
Poku lilongisa, kuama ongangu ya Esera una wa kala ufendeli wa Suku kosimbu okuti, wa ‘litumbikile koku lilongisa ovihandeleko via Yehova.’ (Eser. 7:10) O pondola oku ci linga ndati? O ci linga poku sanda ocitumãlo cimue okuti, ka pali onjuela. Tumãla kuenda likutilila ku Yehova loku pinga espiritu liaye kuenda uloño. (Tia. 1:5) Li pula ndoco: ‘Nye ndi yongola oku konomuisa velilongiso liange?’ Osimbu o tanga, kũlĩhĩsa atosi a velapo. Soneha atosi o yongola oku ivaluka. Kũlĩhĩsa ndomo atosi aco a pondola oku ku kuatisa kupange woku kunda, poku nõla onjila o yongola oku kuama, kuenda poku kuatisa manji umue. Kesulilo lielilongiso, pitulula ovina wa lilongisa. Nda wa ci linga, ci ku kuatisa oku patekela ovina wa lilongisa.
Manji Ewa wa popia hati: “Poku tanga Embimbiliya, nda siata oku kuama alivulu alua ndeci, o Índice das Publicações da Torre de Vigia, ale o Watchtower Library (Biblioteca da Torre de Vigia) vo CD-ROM. Noke, ndi nõla atosi amue a ndi kuatisa kupange woku kunda.”
Vana va siata oku linga elilongiso liaco vokuenda kuanyamo alua, va limbuka esanju liyililako, momo ukũlĩhĩso wavo wa livokiya. (Olosap. 2:1-5) Omo liovikele vialua va kuete, ka calelukile oku sokiya otembo yoku linga elilongiso lio pokolika. Nda o kasi oku liyaka locitangi caco, nye o sukila oku linga?
Ndi Sokiya Ndati Otembo Yoku Lilongisa?
Caleluka oku sanga otembo yoku linga ovina o yongola. Vamue va limbuka okuti, ocimãho coku tanga Embimbiliya liosi, ca siata oku va kuatisa kelilongiso liavo. Omanu va siata oku kuata ocitangi coku tanga ulandu wovikoti viapata, wovina viatiamẽla konembele yosimbu, ovitumasuku vimue okuti ka calelukile oku kuata elomboloko liaco, kuenda oku vi tiamisila komuenyo wavo. Sanda onjila yiku kuatisa oku tẽlisa ocimãho cove. Osimbu kua konomuisile onepa yimue ya tĩla Yembimbiliya, o sukila oku tanga ulandu waco kuenda oku limbuka ndomo u kapiwako. Ulandu waco citava okuti u sangiwa velivulu losapi hati, “Toda a Escritura é Inspirada por Deus e Proveitosa,” lia sandekiwa kueci ci soka 50 kalimi.
Osimbu o tanga Embimbiliya, o sukila oku sokolola ndomo ulandu waco wa pita. Nda wa ci linga, o kuata elomboloko liovina via kongela vulandu waco. Oku kapako olonumbi evi kelilongiso liove, ci ku nenela esanju kuenda onima yiwa. Handi vali, ci ku vetiya oku vokiya otembo yoku lilongisa. Kuenda ci ku kuatisa oku amamako lesokiyo liove lioku tanga Embimbiliya eteke leteke.
Ndaño olonumbi via tukuiwa ndeti vi pondola oku kuatisa omunu lomunu, pole nye apata a kuete ovikele vialua va sukila oku linga? Va sukila oku sapela catiamẽla konima yi tunda koku linga elilongiso liepata. Noke yoku sapela, va pondola oku nõlapo oku tanga Embimbiliya vakukutu amue osimbu ka va endele kovopange avo. Nda va ci linga, ombangulo yavo yi va kuatisa oku linga esokiyo li sukiliwa vepata. Apata amue, va sokiya oku konomuisa ocipama ceteke, ale oku tanga ovinimbu vimue Viembimbiliya noke yokulia ongau. Osimbu vakuepata ka va fetikile oku yelisa omesa, ale oku linga ovopange akuavo, va sokiya 10 ale 15 kakukutu loku konomuisa Ovisonehua, ale oku tanga Embimbiliya. Ndaño ka calelukile oku kuama esokiyo liaco, nda va likolisilako, va kuata esanju.
Manji Wojciech lukãi waye Małgorzata, va lombolola ovina via kuatisa epata liavo poku popia hati: “Kosimbu, tua enda oku pesila otembo yalua kovina ka vi kuete esilivilo. Noke, tua liwekapo oku pesila otembo koku soneha ovikanda. Tua tepululavo otembo tua enda oku pesila kovitalukilo, kuenda tua nõla eteke lowola yoku linga elilongiso lietu.” Epata eli, ka lia sumuile omo liesokiyo va linga. Nda wa kuama ongangu yavo, o kuatavo esanju vepata liove.
Oku Vokiya Ukũlĩhĩso wa Suapo ci Kuete Esilivilo!
Elilongiso Liondaka ya Suku, li kuatisa ‘oku ima apako kovopange osi awa.’ (Va Kol. 1:10) Nda wa ci linga, omanu vaka limbuka okuti, wa loñoloha kespiritu. Momo oka kuata elomboloko liocili Cembimbiliya. Handi vali, vi ku kuatisa oku nõla onjila ya sunguluka kovina viosi o yongola oku linga, kuenda oku kuatisa vana ka va lekisa onjongole kesapulo tu va kundila. Kuenje, o kuata ukamba la Yehova. Omo liaco, oka sanjukila ovituwa via Yehova, kuenda vakuene vaka limbuka esanju liaco, poku va kundila ovina viatiamẽla kokuaye.—1 Tim. 4:15; Tia. 4:8.
Ndaño wa loñoloha ale sio, amamako oku sola Ondaka ya Suku, poku yi lilongisa kuenda oku kuata elomboloko liaco. Ivaluka okuti, Yehova ka ivalako alikolisilo ove. (Va Hev. 6:10) Nda wa ci linga, oka tambula asumũlũho ka a pui.
[Okakasia kemẽla 13]
Eci ‘Ukũlĩhĩso Wetu Wocili U Livokiya‘ . . .
Tu pamisa ekolelo lietu ku Yehova Suku, kuenda tu amamako oku endaenda Laye.
Tu kuata ukũlĩhĩso u tu kuatisa oku nõla onjila ya sunguluka.
—Osa. 119:99
Tu sanjukila oku kuatisa vakuetu oku kuata ukamba la Yehova.
[Elitalatu kemẽla 14]
Ndaño ka ca lelukile oku sanga ocitumãlo ciwa coku lilongisila, pole ci kuete esilivilo oku ci sanda
[Elitalatu kemẽla 15]
Apata amue a siata oku tanga Embimbiliya noke yokulia ongau