Uviali Umue u ka Nena Asumũlũho Komanu
TUNDE koloneke viovapostolo, Suku wa fetika oku nõla pokati komanu etendelo limue litito Liakristão oco va linge omãla vaye. Omo liepongoloko va pita lalio, va tendiwa Vondaka ya Suku ndomanu va citiwa evali. Ocimãho coku citiwa evali, oku pongiya omanu oco va ka viale vusoma wa Suku kilu. (2 Timoteo 2:12) Oco va linge olosoma, te va fa, kuenje va tambula omuenyo wo kilu. (Va Roma 6:3-5) Ovo, va ka viala “kilu lieve” kumue la Kristu oku upisa kilu.—Esituluilo 5:10; 11:15.
Ondaka ya Suku, yi lekisa okuti kuli omanu vakuavo va ka tambula omuenyo ko pui, omo lioku citiwa evali. Vembimbiliya (Ovisonehua vio Heveru levi vio Helasi), vi lekisa okuti Suku wa nõla ovimunga vivali viomanu. Okacimunga kamue katito, ka vana va ka viala kilu, kuenda cikuavo comanu va ka kala kilu lieve, okuti etendelo liaco linene calua. Kũlĩhĩsa eci upostolo Yoano a sonehela vamanjaye vana va citiwa evali. Catiamẽla ku Yesu, eye wa soneha hati: “Eye ocitundasonde cakandu etu, puãi ha-oko lika, te la-a oluali luosi [ocimunga cinene].”—1 Yoano 2:2.
Upostolo Paulu wa sonehavo hati: “Ovilulikilo viosi [owiñi wakahandangala] vi tailili oku mola etukuluko liomãla va Suku [okacimunga kamue katito].” (Va Roma 8:19-21) Olondaka evi viupostolo Yoano levi via Paulu vi lomboloka nye? Ovio vi lomboloka okuti: Omanu va citiwa evali va ka panga onepa kuviali wo kilu. Nye va ka lingako? Ovo va ka nena asumũlũho alua kowiñi wakahandangala u ka kala palo posi. Eli olio esunga lieci Yesu a longisila olondonge viaye oku likutilila hati: “Usoma wove wiye. Ocipango cove ci lingiwe posi ndeci ci lingiwa kilu.”—Mateo 6:10.
Ovisonehua vio Heveru vi lekisavo okuti kuli ovimunga vivali vika popeliwa. Kũlĩhĩsa eci Yehova a sapuila Avirahama kukululu ya Yesu hati: “Olofeka viosi viokilu lieve vi sumũlũhila kombuto yove momo wa pokola kondaka yange.” (Efetikilo 22:18) Apata osi a kulo kilu lieve, a muila esumũlũho “kombuto” ya Avirahama.
‘Ombuto’ yaco helie? Yesu Kristu, kuenda omanu vana va citiwa evali, okuti va linga omãla va Suku. Upostolo Paulu wa lombolola hati: “Nda vu va Kristu nda vumbuto ya Avirahama, wakapiñala kohuminyo.” (Va Galatia 3:16, 29) Asumũlũho api omanu vo kolofeka viosi va tambuila “kombuto” yaco? Ovo va pondola oku kuata ukamba la Suku, kuenda omuenyo ko pui vofeka yelau palo posi. Ukualosamo Daviti wa popele hati: “Olondingesunga vi piñala ofeka, vi tungamo oloneke ka vi pui.”—Osamo 37:29; Isaya 45:18; Esituluilo 21:1-5.
Etendelo liomanu va ka viala kilu litito, pole omanu va ka tambula asumũlũho usoma waco palo posi, ovo valua. Ove kumue lepata liove, vu pondola oku kala pokati komanu va ka tambula asumũlũho eyilila Kusoma wa Suku.
[Elitalatu kemẽla 12]
Omanu valua va ka kuata omuenyo ko pui palo posi. Ove hẽ o ka kalavo pokati komanu vaco?