Ove hẽ o Pondola Oku Ilukila Kocikanjo ku Sukila Akundi Vusoma?

“Eci tua kala kofeka yo Estados Unidos, tua kuatele ekalo liwa komuenyo, pole, tua kuata ohele yokuti etu kuenda omãla vetu vavali valume tu pondola oku yapuisiwa lovisimĩlo vioku sanda lika ovokuasi. Momo omanu tua tungile lavo va sakalala lika lovina evi. Ame lukãi wange, tua kala olomisionariu kuenje tua yonguile vali oku ambata omuenyo una wa leluka haiwo wesanju.”

OMO lionjongole yaco, kunyamo wo 1991, Ralph kumue lukãi waye Pam va nõlapo oku sonehela ovikanda kolofiliale vialua. Vovikanda viaco, va lombolola onjongole yavo yoku talavaya kocikanjo ku sukila akundi Vusoma. Ofiliale yo Mexico ya eca etambululo kepingilo liavo okuti, va sukila akundi Vusoma va tẽla oku vangula elimi Liongelesi oco va kundile omanu va vangula elimi liaco vofeka yavo. Ofiliale ya lombolola okuti kocikanjo caco ovapia “a yelela ale oku ungula.” (Yoa. 4:35) Noke manji Ralph lukãi waye Pam kumue lomãla vavo vavali okuti umue o kuete 8 kanyamo ukuavo 12 kanyamo, va tava kelaleko liaco, kuenje va fetika oku linga aliangiliyo oku ilukila ko Mexico.

Ocikanjo Cimue Cinene

Manji Ralph wa lombolola hati: “Osimbu ka tua endele, vamanji vamue ko Estados Unidos lovisimĩlo viwa, va fetika oku tu pulisa hati: ‘Oku ilukila kofeka yikuavo kuli ohele yalua!’ ‘Nda wa fetiki oku vela, nye vuka linga?’ ‘Momo lie vuka kundilila olondaka viwa kocikanjo va vangula elimi Liongelesi? Omanu vana va vangula Ongelesi ka vaka lekisa onjongole kolondaka uka va kundila!’ Pole, tua nõlelepo muẽle oku enda. Momo osimbu ka tua nõlelepo onjila yaco, tua konomuisa ovina viosi via kongela voku iluka. Ovisimĩlo viaco tua vi kuata vokuenda kuanyamo alua. Tua yuvula oku kuata olofuka vi ambata otembo yalua oku vi feta. Tua seleka olombongo kuenda tua enda oku sapela lepata catiamẽla kovitangi tu pondola oku liyaka lavio kofeka tu ilukila.”

Catete, Ralph kuenda epata liaye va nyula Ofiliale yofeka yo Mexico. Vamanji va va lekisa omapa yofeka yosi kuenje va va sapuila hati: “Eci oco ocikanjo cene!” Ovo va nõlapo oku kala volupale lumue lu tukuiwa hati, San Miguel de Allende. Olupale luaco lua kala vocinãla ci soka 240 kolokilometulu Lombala yofeka yo Mexico, kuenda mua kala omanu valua va tunda kolofeka vikuavo. Eci pa pita anyamo atatu tunde eci va iluka vofeka yaco, kua sokiyiwa ekongelo lielimi Liongelesi li kuete 19 kakundi Vusoma. Ekongelo liaco olio lia kala liatete lielimi Liongelesi vofeka yo Mexico, pole, kua kala handi upange walua woku linga.

Ovolandu a lekisile okuti vofeka yo Mexico, muli eci ci soka ohuluwa yomanu va tunda kofeka yo Estados Unidos. Handi vali, muli omanu valua va lilongisa calua ndeci, olondotolo, olonganji, olondonge kuenda omanu vakuavo va vangulavo elimi Liongelesi. Manji Ralph wa lombolola hati: “Tua likutilila ku Suku oco tu kuate olonalavayi vialua. Vonjo yetu, tua kuatele ohondo yimue yoku yekisa akombe veya volupale luetu oku ‘kũlĩhĩsa ofeka,’ nda va pondolavo oku iluka.”—Ate. 13:2.

Ovo va Leluisa Omuenyo Wavo Oco va Kuate Otembo Yalua Yoku Kunda

Noke yotembo yimue, tua tambula vamanji vamue alume lakãi va yongola oku amisako upange wavo woku kunda. Pokati kavo pa kala manji Bill lukãi waye Kathy va tunda ko Estados Unidos. Ovo va kala ale oku talavaya ci soka 25 kanyamo kovikanjo ku sukila akundi vusoma. Ovo va kuatele ovisimĩlo vioku lilongisa elimi lio Espanyõle, pole, va pongolola ovisimĩlo viavo noke yoku ilukila kolupale lumue lu tukuiwa hati, Ajijic konele Yociva cimue ci tukuiwa hati, Kapala. Omanu va tunda kofeka yo Estados Unidos vana vakuakunyula ovitumãlo via posoka, va solele calua oku enda kocitumãlo caco. Bill wa lombolola hati: “Eci tua kala ko Ajijic, tua enda oku sandiliya lika omanu va vangula elimi Liongelesi va yongola oku kũlĩha ocili Condaka ya Suku.” Eci pa pita anyamo avali, Bill kuenda ukãi waye Kathy, va kuata esanju lialua poku mola oku sokiyiwa kuekongelo liavali lielimi Liongelesi ko Mexico.

Manji Ken lukãi waye Joanne kofeka yo Kanada, va yonguile oku leluisa omuenyo wavo oco va kuate otembo yalua yoku kunda olondaka viwa Viusoma. Ovo va ilukilavo ko Mexico. Ken wa popia hati: “Tua pita otembo yalua oku likisa oku kala kocitumãlo cina okuti ka kuli ovava a tokota, olusu, ale otelefone.” Pole, upange woku kunda wa tu ĩha esanju lialua. Eci papita otembo yimue Manji Ken wa nõliwa oku kala oñuatisi yakulu vekongelo. Noke yanyamo avali wa linga ukulu wekongelo. Kefetikilo omõlavo ufeko o tukuiwa hati, Britanny wa kuata ocitangi coku kala vekongelo lielimi Liongelesi, momo ka mua kale amalẽhe valua. Pole, noke yoku fetika oku kuatisa kupange woku tunga Olonjango Viusoma vofeka yaco, wa kuata akamba valua vawa.

Manji Patrick lukãi waye Roxanne kofeka yo Estados Unidos kolupale luo Texas, va komõha calua eci va yeva catiamẽla kocikanjo cimue ca kala ocipepi okuti omanu vaco va vangula elimi Liongelesi. Patrick wa popia hati: “Noke yoku nyula olupale lumue lu tukuiwa hati, Monterrey ko Mexico, tua limbuka okuti Yehova wa kala oku tu songuila oco tu kuatise vocikanjo caco.” Noke lioloneke vitãlo va landisa onjo yavo ya kala volupale luo Texas kuenje va kala ndu okuti va “yokila ko Makedonia.” (Ovil. 16:9) Vofeka yo Mexico ka ca lelukile oku sanda olombongo, pole, eci papita anyamo avali, va kuata esanju lioku mola ndomo ocimunga cimue ci soka 17 Kolombangi Via Yehova ca linga ekongelo li kuete 40 kakundi.

Jeff lukãi waye Deb, va leluisavo omuenyo wavo oco va kuate otembo yalua yoku linga upange woku kunda. Ovo va landisa onjo yavo yinene kofeka yo Estados Unidos kuenje va ilukila ko Mexico volupale lumue lu tukuiwa hati, Cancún ocipepi lokalunga. Ovo va kala vonjo yimue yitito. Eci va kala vofeka yavo, va enda oku lingila olohongele vimbo volonjango vinene vi kuete olomakina viofela yi talalisa vonjo. Kaliye poku enda kohongele yimbo yelimi Liongelesi, va sukilile oku linga ungende wambata olowola ecelãla kuenda oku linga ohongele yaco vocitumãlo cimue ka va yambelele. Pole, ovo va kuatele esanju lialua poku mola esokiyo liekongelo li kuete 50 kakundi vusoma volupale luo Cancún.

Vamanji vamue alume lakãi ko Mexico, va fetikavo oku kuatisa kupange woku kunda velimi Liongelesi. Manji umue o tukuiwa hati, Rubén kuenda epata liaye, eci va yeva okuti kolupale luo San Miguel de Allende kua sokiyiwa ekongelo limue lielimi Liongelesi, kuenda ofeka yosi yo Mexico oyo ocikanjo cekongelo liaco, va nõlapo oku va kuatisa. Ovo va sukilile oku lilongisa elimi Liongelesi, oku kũlĩha ciwa ekalo lovituwa viomanu vaco, kuenda oku linga ungende u soka 800 kolokilometulu olosemana viosi oku enda kolohongele. Manji Rubén wa popia hati: “Tua kuata esanju lioku kundila omanu va tunda kolofeka vikuavo va kasi ko Mexico vokuenda kuanyamo alua vana okuti lalimue eteke va yevele esapulo Liusoma velimi liavo. Valua pokati kavo va eca olopandu kokuetu lasuelela.” Manji Rubén kuenda epata liaye, noke yoku kuatisa ekongelo lioko San Miguel de Allende, va talavaya kupange wakundi votembo yosi volupale luo Guanajuato ko Mexico, kuna va kuatisa koku sokiya ekongelo limue lielimi Liongelesi lia kuata ci pitahãla 30 kakundi. Cilo va kasi vocimunga cimue celimi Liongelesi kolupale lu tukuiwa hati, Irapuato ocipepi lolupale luo Guanajuato.

Oku Sandiliya Vana ka ca Lelukile Oku va Kundila

Vofeka yo Mexico, mu sangiwavo olonyitiwe vialua vi vangula elimi Liongelesi. Pole, ka ca lelukile oku va kundila esapulo Liusoma momo valua pokati kavo va kasi kolonjo via kemãla okuti olondavululi violonjo viaco ovio vi tambulula omanu. Nda omunu wa sanga epuluvi lioku pitila konjo yimue, va mueleanjo ka va tava oku yevelela kesapulo lietu, momo va sima hati, Olombangi Via Yehova ocisoko cetavo limue litito vofeka. Pole, eci va sapela Lolombangi Via Yehova vina vi tunda kolofeka vikuavo, va tava oku yevelela.

Kũlĩhĩsa ulandu wukãi umue o tukuiwa hati, Gloria kolupale luo Querétaro ko Mexico. Eye wa popia hati: “Otembo yimue Olombangi Via Yehova vi vangula elimi Liospanyõle, va sapelele lame pole, sia tavele oku va yevelela. Eci epata liange kuenda akamba vange va fetika oku kuata ovitangi, nda sumuile calua kuenje nda likutilila ku Suku oku pinga ekuatiso lioku yula ovitangi viaco. Noke liotembo yimue, ukãi umue o vangula elimi Liongelesi, weya konjo yange. Eye wa ndi pula nda konjo yange kuli umue o vangula elimi Liongelesi. Omo okuti ukãi waco o tunda kofeka yikuavo, nda komõhele calua oku u mola, kuenje ndo sapuila hati, ndi vangula elimi Liongelesi. Pole, osimbu a kala oku vangula, nda fetika oku popia lutima wange hati, ‘Anga hẽ, eci ka ci komõhisa oku mola omunu umue o tunda kofeka yo Amerika oku iya kulo konjo yange?’ Pole, nda likutilila ku Suku oco a ndi kuatise oku sanga elomboloko liaco. Citava okuti oku iya kuomunu waco, ku lomboloka etambululo liohutililo nda linga ku Suku.” Gloria wa tava oku lilongisa Embimbiliya kuenje wamamako kespiritu toke eci a papatisiwa ndaño loku lambalaliwa lepata. Cilo Gloria wa linga ukundi wa velapo kuenda ulume waye lomõlavo ulume va kasivo oku vumba Yehova.

Asumũlũho Komanu Vana Vamisako Upange Wavo Woku Kunda

Oku talavaya kocikanjo cina ku sukila akundi Vusoma, ka ca lelukile pole, ku iyilila asumũlũho alua. Manji Ralph wa tukuiwa kefetikilo liocipama cilo, wa popia hati: “Tua songola alilongiso Embimbiliya komanu va tunda ko Grã-Bretanha, ko China, ko Jamaica, ko Suécia, kuenda komanu va kemãla va tunda kofeka yo Gana. Vamue pokati kolondonge viaco, cilo va litumbika kupange wakundi votembo yosi. Vokuenda kuanyamo apita, epata lietu lia mola oku sokiyiwa kuakongelo epanduvali velimi Liongelesi. Omãla vetu valume vana va kala oku talavaya kumosi letu kupange wakundi votembo yosi, cilo va kasi oku talavaya ko Betele kofeka yo Estados Unidos.”

Cilo ko Mexico kuli eci ci soka 88 kakongelo elimi Liongelesi kuenda ovimunga vialua. Nye ca kuatisa koku livokiya lonjanga kuakongelo aco? Omanu valua va vangula elimi Liongelesi ko Mexico, lalimue eteke va sapelele Lolombangi Via Yehova. Vamue va tava kolondaka viwa omo okuti lalimue eteke va liyakele lelambalalo ndeli va liyaka lalio kofeka va tunda. Vakuavo va tava oku lilongisa Embimbiliya, momo va liwekapo oku talavaya kupange woku sanda eteku omo lioku kuka, kuenje va kuete otembo yalua yoku lilongisa ovina viespiritu. Handi vali, onepa yalua ya vamanji kakongelo valimi Ongelesi, va litumbika kupange wakundi votembo yosi, una unena esanju hawo u kuatisa koku kula kuakongelo aco.

Asumũlũho o Lavoka

Ocili okuti omanu valua koluali luosi, va ka tava kolondaka viwa Viusoma ndaño vi kundiwila kalimi avo. Pole, ci sanjuisa calua oku mola ndomo vamanji alume lakãi, amalẽhe lakulu, vana ka va kuelele lava va kuela, va ilukila kovikanjo vina vi sukila akundi Vusoma. Ovo va siata oku liyaka lovitangi vialua, pole, ovitangi viaco ka vi sokisiwa lesanju lioku mola ndomo omanu vakuavitima viasunguluka va tava kocili Cembimbiliya. Anga hẽ, o pondola oku linga apongoloko amue komuenyo wove oco o ilukile kocikanjo cimue vofeka yove ku sukila akundi Vusoma?a (Luka 14:28-30; 1 Va Kor. 16:9) Nda wa ci linga, o kuata asumũlũho alua.

[Atosi pombuelo yamẽla]

[Okakasia kemẽla 21]

Esanju Lia Vana va Liwekapo Oku Talavaya Omo Lioku Kuka Lia Vetiya Vakuavo

Ukãi umue o tukuiwa hati, Beryl wa tunda kofeka yo Grã-Bretanha oku enda ko Kanada. Kofeka yaco wa kala mitavaso yovisoko viupange wolofeka vikuavo. Noke wa iñilavo kolomapalo vioku yoloka lolokavalu, kuenda kunyamo wo 1980 wa nõliwa oco a kale ocindekaise cofeka yo Kanada kolomapalo viaco. Eci a liwekapo oku talavaya omo lioku kuka kolupale luo Kapala, kofeka yo Mexico, eye kumue lulume waye va enda okulia volonjo vi landisa okulia kuapia. Eci a limbuka omanu vamue va vangula elimi Liongelesi okuti, va liwekapo oku talavaya pole va sanjuka, wa lisitulula kokuavo kuenje wa va pula eci va kala oku linga ko Mexico. Omanu vaco Olombangi Via Yehova. Beryl kuenda ulume waye, va sokolola okuti nda esanju kuenda ekalo liwa komuenyo li tunda lika koku kũlĩha Suku, va sukilavo oku kũlĩha Suku yaco. Noke lioku enda enda kolohongele vokuenda kuolosãi vialua, Beryl wa tava oku lilongisa Embimbiliya. Vokuenda kuanyamo alua Beryl wa litumbika kupange wakundi votembo yosi.

[Okakasia kemẽla 22]

“Oku Kala Lavo Esumũlũho”

Vana va ilukila kolofeka vina kuli esukila liakundi Vusoma, va siata oku soliwa calua la vamanji vofeka yaco. Ofiliale yimue kofeka yo Caribe ya soneha hati: “Nda vamanji va kasi oku talavaya ndeti kulo va tiukila kolofeka viavo, tu kuata ovitangi vialua vakongelo. Oku kala lavo esumũlũho liocili.”

Ondaka ya Suku yi popia hati: “Akãi vana va kunda olondaka viwa, ohoka yinene.” (Osa. 68:11, NW) Eli olio esunga lieci okuti, vamanji valua akãi va siata oku ilukila kovikanjo ku sukila akundi Vusoma. Vamanji vaco va siata oku eca ekuatiso lialua. Ofiliale yimue kocifuka co Europa va popia hati: “Onepa yalua ya vamanji va sangiwa vakongelo vetu kuenda akundi, akãi. Valua pokati kavo ndopo va fetika oku lilongisa Embimbiliya. Pole, vamanji akãi ka va kuelele vana va tunda kolofeka vikuavo haivo akundi votembo yosi, va kasi oku kuatisa calua poku eca epindiso komanu vaco. Vamanji akãi va tunda kolofeka vikuavo, ombanjaile yimue ya eciwa kokuetu!”

Nye vamanji yaco va yevite vutima wavo omo lioku talavaya kolofeka vikuavo? Manji umue ukãi o tukuiwa hati, Angelica okuti o kasi ale oku talavaya kolofeka vikuavo kupange wakundi votembo yosi ci soka 30 kanyamo haeye ka kuelele wa popia hati: “Kuli ovitangi vialua. Kocikanjo cimue nda kala, eteke leteke nda liyaka locitangi coku pita vonjila yeyuka olonata. Nda enda oku sumua calua omo lioku mola omanu va tala ohali. Pole, nda kuata esanju lioku kuatisa omanu kupange woku kunda. Nda lembelekiwa calua lolondaka via vamanji valua va lekisa olopandu kokuange omo lioku iya kofeka yavo oku va kuatisa. Manji umue ukãi wa ndi sapuila hati, ongangu yange yoku iya kofeka yavo oku talavaya kupange wakundi votembo yosi, yo kuatisa oku litumbikavo kupange waco.”

Manji umue ukãi o tukuiwa hati, Sue ukundi wotembo yosi okuti o kuete cipitahãla 50 kanyamo, wa popia hati: “Ove o pondola oku liyaka lovitangi vialua, pole, ovitangi viaco ka vi sokisiwa lasumũlũho o tambula. Upange woku kunda u sanjuisa calua! Poku talavaya lamalẽhe afeko kupange woku kunda, nda enda oku va sapuila ovina nda lilongisa Vembimbiliya, kuenda valivulu etu vi lekisa ndomo tu liyaka lovitangi. Ovo olonjanja vimue va enda oku ndi sapuila okuti, ongangu yange yoku pandikisa kovitangi vokuenda kuanyamo alua kupange wakundi votembo yosi ndaño sia kuelele, ya va kuatisa oku limbuka okuti va pondolavo oku yula ovitangi komuenyo wavo. Oku kuatisa vamanji ava, ci ndi vetiya oku limbuka okuti ndi kasi oku tẽlisa ocimãho cange.”

[Omapa kemẽla 20]

MEXICO

Guanajuato

Irapuato

Chapala

Ajijic

Ociva Kapala

Monterrey

San Miguel de Allende

Querétaro

OLUPALE LUO MEXICO

Cancún

[Elitalatu kemẽla 23]

Vamanji vamue va kuete esanju lioku kundila omanu va tunda kolofeka vikuavo va yeva esapulo liolondaka viwa onjanja yatete