Li Teyuila Kaspiritu Ãvi

ULUME ume o tukuiwa hati James, wa kulila kimbo lio Malaita kofeka yo Ilhas Salomão, wa longisiwa oku sumbila aspiritu tunde vutila waye. Eye wa popia hati: “Ame sia endaile oku tãha oco ndi linge lãvi vakuetu, pole nda simaile okuti, oco omunu a kuate esanju komuenyo, te wa likutilila longombo oku pinga ekuatiso kolondele.”

Ndeci ca siata oku pita kolonepa vialua violuali, omanu vo ko Ilhas Salomão, va tava okuti kuli aspiritu a pondola oku kuatisa ale oku talisa ohali omanu. Pole, omanu vo ko Melanésia, ka va kuete usumba laspiritu aco, momo va a tenda okuti awa.

Oku kolela kekuatiso liaspiritu aco, ci limbukiwila kovilinga viavo. James tua tukula ale, wa popia okuti otembo a kala umalẽhe, oloneke viosi eci va yeva ocihungulu ci lila, kanjendi umue wo vimbo liavo wa enda oku vilikiya omãla vonjo yaye. Momo lie? Ovo va tavele okuti, nda ocihungulu ci lila, ci nena owima vimbo.

Vovaimbo amue, omanu va siata oku kapa otuvawe tu yela palukuki olonjo viavo. Omo James wa tavele okuti otuvawe tuaco tu teyuila kaspiritu ãvi, wa endavo oku ci linga. Kupange kowola yonanya, James wa enda oku soleka okulia vocipete caye okuti poku tiukila konjo, imba okulia kuaco konẽle yonjila. Eye wa enda oku ci lingila okuti, eci olonganga vi sanga okulia kuaco, ka viu lovi.

Ndaño okuti ovihilahila tua tukula ndeti, ka via siatele pocitumãlo cove, pamue o sima okuti o sukilavo oku li teyuila kaspiritu ãvi, ndeci James a lingaile. Pamue o sima okuti oku kuama ovihilahila viaco ku pondola oku ku nenela omuenyo uwa.

Nda o tava kueci Embimbiliya li popia, o ka kuata onjongole yoku kũlĩha atambululo kapulilo akuãimo: (1) Aspiritu ãvi a pondola hẽ oku ku talisa ohali? (2) Anga hẽ oku kuama ovihilahila ku pondola oku ku yapuisila kaspiritu ãvi? (3) O li teyuila hẽ ndati kolondele loku kuata esanju liocili?

Ndomo Olondele vi Talisa Omanu Ohali

Embimbiliya li lekisa okuti aspiritu ãvi, havilũlu viomanuko va fa. Ondaka ya Suku yi popia hati: “Ava va kasi lomuenyo va kũlĩha okuti va laika oku fa, puãi ava va fa lacimue va kũlĩha.” (Ukundi 9:⁠5) Aspiritu aco ãvi, ovangelo vana va li kongela kusuanji wa Satana, kuenda va siata oku kemba omanu.​—⁠Esituluilo 12:⁠9.

Ovisonehua vi lekisa okuti tu sukila oku li teyuila kaspiritu aco ãvi. Upostolo Paulu wa sonehẽla Akristão vo ko Efeso hati: “Ka tu kasi loku yaka lositu kuenda osonde, te . . . laspiritu ãvi o kilu.” Upostolo Petulu wa popia hati, Satana Eliapu ombiali yaspiritu osi ãvi, “o ñuala ñuala ndohosi yi koma oku sandiliya u a lia.”​—⁠Va Efeso 6:​12, NW; 1 Petulu 5:⁠8.

Satana wa siata oku kemba omanu valua loku va vetiya oku linga ovina vi sumuisa Suku. Embimbiliya li popia hati, “Satana o liluvikiya ndungelo wocinyi.” (2 Va Korindo 11:​14) Eye, o li lekisa ndu o teyuila omanu, pole onjongole yaye oku va kokela ovitangi. Satana wa siata oku tekãvisa ovitima viomanu oco ka va ka limbuke atutu aye loku kũlĩha ocili catiamẽla ku Suku. (2 Va Korindo 4:⁠4) Ocimãho ce eye a kuete poku kemba omanu?

Satana wa siata oku vetiya omanu oku u fendela, ci kale okuti ovo va ci limbuka ale sio. Eci Yesu, Omõla a Suku, a kala palo posi, Satana wa yonguile okuti Yesu u kekamẽla oku u fendela. Yesu wo tambulula hati: “A Satana, tundapo, momo ca sonehiwa citi, Fendela Yehova Suku yove, eye lika o vumba.” (Mateo 4:​9, 10) Yesu ka tavele oku fendela Satana.

unene wa Yehova wa velapo wolondele kuenda Eye ka ka ecelela okuti vana va pokola kokuaye va talisiwa ohali lolondele. (Osamo 83:18; Va Roma 16:​20) Nda okuti tu yongola oku sanjuisa Yehova Suku ndeci Yesu a linga, tu sukila oku likala oku pokola ku Satana kuenda kolondele viaye. Omo liaco, tu sukila oku yuvula ovina viatiamẽla kumbanda kuenda kefendelo liaspiritu ãvi. Ove hẽ o pondola oku ci linga ndati?

Kũlĩhĩsa Ovihilahila vi Sumuisa Suku

Kosimbu, Yehova Suku wa lunguile va Isareli oku yuvula ovituwa violofeka vikuavo. Eye wa popia hati: “Pokati kene ka pa ka sangiwe umue . . . ukuakutãha, ndaño ukuakusingila, ndaño ukuakulova, ndaño onganga, ndaño ukuakuyamba, ndaño ukuakawengo, ndaño ociliangu, ndaño ukuavinjualume.” Catiamẽla komanu va lingainga ovina viaco, Embimbiliya li popia hati: “Wosi o linga ovina evi eye ocimbondo ku Yehova.”​—⁠Esinumuĩlo 18:​10-12.

Poku konomuisa ovihilahila via siata pocitumãlo cove, kũlĩhĩsa apulilo ava: Ovihilahila viaco vi ku vetiya oku tava kumbanda? Ocituwa caco cu ku vetiya oku sima okuti oviteka vi kuete unene woku ku teyuila? Vovihilahila viaco mua kongela hẽ oku tãha ale oku li teyuila kumbanda? Oku kuama ovihilahila viaco ci ku vetiya hẽ oku pokola kolondele okuti ku Yehova kuenda ku Yesu hakoko?​—⁠Va Roma 14:11; Va Filipoi 2:​9, 10.

Oku yuvula ovihilahila viaco ci kuete esilivilo lialua. Momo lie? Upostolo Paulu wa vetiyiwa oku soneha ndoco: “Ene ko tela oku nyua okopo ya [Yehova] loku nyuavo okopo yolondele.” Eye wa lungula vana va seteka oku sanjuisa Suku kuenda olondele okuti va ‘kokela Yehova esepa.’ (1 Va Korindo 10:​20-​22) Yehova Suku o yongola okuti eye lika tu fendela.​—⁠Etundilo 20:​4, 5.

Kũlĩhĩsavo apulilo ava: Ovituwa viaco vi vetiya hẽ omunu oku sima okuti ka kuete eko liovilinga viaye? Kolofeka vialua ka va ecelela ukahokolo loku lipekela eci handi omanu ka va likuelele, kuenda Embimbiliya li pisa ovituwa viaco. (1 Va Korindo 6:​9, 10) Pole, kolofeka vi sangiwa ko Pacifico, afeko vamue ka va kuete osõi yoku popia hati va tambula “emẽla limue”a okuti li vetiya alume oku va sola oco va linge lavo ukahonga.

Embimbiliya li longisa okuti omunu lomunu o ka lilombolola ku Suku omo liovilinga viaye. (Va Roma 14:12; Va Galatia 6:⁠7) Heva, ukãi watete, eci a vetiyiwa la Satana oku sinila Suku, wa popia hati: “Onyõha ya ndueyisa kuenje nda lia.” Yehova wa vetela evelo Heva omo lielinga liaye. (Efetikilo 3:​13, 16, 19) Etu tu ka talamavo kovaso a Suku oku li lombolola omo liovilinga vietu.​—⁠Va Heveru 4:⁠13.

Nye Ove o Sukila Oku Linga?

Nda okuti o yongola oku sanjuisa Suku, kuenda oku kuama olonumbi Viembimbiliya, o sukila oku ci lekisila kovilinga viove. Omanu va kala volupale luo Efeso kocita catete va eca ongangu yiwa konepa eyi. Oco ka va ka vetiyiwe vali laspiritu ãvi, va nena alivulu avo osi atiamẽla kumbanda, kuenje “va a yokela kovaso” ya vosi.​—⁠Ovilinga 19:⁠19.

Tete va timĩha alivulu avo, noke veya oku “sapula ovilinga viavo viumbanda.” (Ovilinga 19:​18) Ovina Paulu a va longisa via tiamẽla ku Kristu, via va vetiya oku timĩha alivulu avo. Kuenje va pongolola ovisimĩlo viavo viatiamẽla koku tãha.

Ocili okuti oku siapo ovina viaco ka ca lelukile. James tua tukula ale kefetikilo liocipama cilo, wa pitavo locitangi caco. Eye wa fetika oku lilongisa Embimbiliya Lolombangi Via Yehova kuenje wa sola calua ovina a lilongisa. Pole handi wa amamako oku tãha. Ndaño okuti wa tavele kolohuminyo via Yehova, lopo wa simĩle okuti oco a li teyuile kaspiritu ãvi wa sukilile oku kuama ovihilahila viaco.

Nye ca kuatisa James oku siapo ocisimĩlo caco? Eye wa popia hati: “Ame nda likutilila ku Yehova oco a ndi teyuile kuenda oku ñuatisa oco ndu u kolele. Vokuenda kuotembo nda siapo ovihilahila viaco.” Anga hẽ kuli cimue co linga lãvi? James wa kumbulula hati, “Sio, kovina viosi, nda lilongisa oku kolela Yehova. Otembo yosi ndi lete ndomo Yehova a linga ekamba liange.” Noke yanyamo epanduvali James wa litumbika kupange wotembo yosi oku kuatisa omanu oku lilongisa ovina viatiamẽla Kembimbiliya.

Momo lie ku kuamẽlavo ongangu ya James? Konomuisa ovituwa vimue pocitumãlo cove kuenda ‘luloño woku sokolola’ limbuka nda vi li kuata ‘locipango ca Suku.’ (Va Roma 12:​1, 2) Noke, ove o sukila oku kuata utõi woku yuvula ovituwa viatiamẽla kumbanda. Nda wa ci linga, kolela okuti Yehova o ka ‘kala love’ kuenda o ka ku teyuila. (2 Va Korindo 6:​16-​18) Ndulandu wa pita la James, ove o pondola oku kolela kohuminyo Yembimbiliya yokuti: “Onduko ya Yehova ocikolo ca pama, ukuesunga o tililamo ha koki.”​—⁠Olosapo 18:⁠10.

[Atosi pombuelo yamẽla]

[Ofoto ya Eciwa]

Ofoto yopiwa la Dr. Bakshi Jehangir

[Elitalatu kemẽla 13]

“Ocihungulu”

[Elitalatu kemẽla 13]

Kafeko u ongolola olosisi viokulia oco ka va ka linge lavio umbanda