Ceci Vakuene va ku Sumuisa

OMANU valua va siata oku popia hati, ca sunguluka oku fetuluinya. Momo eci vakuetu va tu linga ovina vimue vĩvi, tua siata oku sumua. Uloño woku tepisa eci ciwa leci cĩvi, u tu vetiya oku tetulula ovina vĩvi. Oco hẽ, ci lingiwa ndati?

Omanu va pondola oku tu linga ovina vĩvi ndeci, oku tu veta, oku tu penya pamue va tu sepula, ale va punda ovina vietu. Eci va ku linga ovina vimue vĩvi, nye o yeva vutima wove? Omanu valua koloneke vilo, va siata oku popia hati, ‘Ndi fetuluinya eci va ndi linga!’

Kofeka yo Estados Unidos, amalẽhe valua va tangela kolosikola vielilongiso lia pita pokati, va siata oku lingila olombonde alongisi vavo loku va fetuluinya omo liepindiso limue va tambula. Ukãi umue o tukuiwa hati, Brenda mitavaso yupange u teyuila alongisi kolupale luo Nova Orleans wa popia hati: “Ocitangi cinene ceci okuti, eci alongisi va lundiliwa ovina ka va lingile, va kuata oluhimo lũvi.” Ndaño okuti noke ondaka yaco yi limbukiwa okuti uhembi, oluhimo luaco lũvi lu amamako.

Kovopange, olonalavayi vialua via siata oku sandiliya olonjila vioku fetuluinya va cime cavo poku nyola ulandu umue wesilivilo u kasi vo kombutador yo kupange. Vakuavo va siata oku nyana asapulo o pokolika atiamẽla kupange, kuenje va a landisa komanu ale va a sandeka. Ukanda umue wasapulo u tukuiwa hati, New York Time, wa lombolola okuti, olonalavayi vimue via siata oku nyana ovikuata vio kupange ndonjila yoku fetuluinya. Ovisoko vimue viupange oco va liteyuile kefetuluinyo liaco, poku tundisa omunu kupange, va kapa ondavululi voseketa yaye loku kũlĩhĩsa ovina a kasi oku ambata, kuenda vo sindikila toke puvelo.

Voku fetuluinya, olonjanja vimue mua kongela omanu vana tu lisungue lavo, akamba, kuenda epata lietu. Oku yeva esumuo omo liondaka yimue va tu popia pamue ocina cimue cĩvi va tu lingila, olonjanja vimue ci tu tuala koku fetuluinya. Nda ekamba limue lia ku popia ondaka yĩvi, anga hẽ o fetuluinyavo ondaka yaco? Nda umue ukuepata liove wa ku sumuisa, anga hẽ o sanda onjila yoku u sumuisavo? Ca leluka calua oku fetuluinya vakuetu omo liocina cimue cĩvi va tu linga!

Oku Fetuluinya Uveke

Olonjanja vimue omanu vana va sandiliya onjila yoku fetuluinya, va ci lingila oku tulumũla onyeño. Embimbiliya li tu sapuila okuti eci omãla va Yakoba u Heveru va yeva okuti Sekeme u Kanana wa putula manjavo ufeko Dina, ‘va ci suvuka, kuenje va tema ca lua.’ (Efetikilo 34:​1-7) Omõla vavali va Yakoba poku fetuluinya ocina cĩvi va lingila manjavo, va sandiliya onjila yoku yambula Sekeme kuenda epata liaye. Simeone la Lewi va iñila volupale luo Kanana lelimbi kuenje va ponda alume vosi, oku kongelamo Sekeme.​—⁠Efetikilo 34:​13-27.

Anga hẽ ungangala wavo wa tetulula ocitangi caco? Eci Yakoba a yeva ovilinga viomãla vaye, wa va pisa loku popia hati: “Wa ndingi lãvi, omo wa suvukisi la vakuafeka. . . . Nda va liñongiliyila oku yaka lame, ame lonjo yange yosi tu nyoleha. ” (Efetikilo 34:​30) Ovilinga viavo viefetuluinyo, ka via tetuluile ovitangi, pole, epata lia Yakoba lia sukilile oku lunguka lomanu va lisunguile lavo omo lionyeño va va kuatelele. Omo liaco, Suku poku va teyuila wa sapuila Yakoba oco a tilile ko Betele lepata liaye.​—⁠Efetikilo 35:​1, 5.

Ovitangi via pita la Dina, vi tu longisa ovina vialua. Olonjanja vialua oku fetuluinya ku koka okuti ovitangi vi amamako kuenje vokuenda kuotembo ku iyilila vali efetuluinyo. Kofeka yo Alemanya kuli olusapo lumue lu popia hati: Efetuluinyo li nena efetuluinyo.

Ovitangi Vioku Fetuluinya

Oku pesela otembo longusu yetu poku sanda onjila yoku fetuluinya, ci pondola oku tu nyola, momo onyeño yi sindikila ño. Eci ca lekisiwa ciwa velivulu losapi hati, Forgiveness​—⁠How to Make Peace With Your Past and Get On With Your Life, li popia hati: “Onyeño yi nyola. Oyo yi pesela otembo, ongusu yove osimbu o sokolola ovina vĩvi va ku lingila loku siñala ava va ku linga ovina viaco, kuenda oku lipañela oku va fetuluinya.” Embimbiliya li popia hati: “A livelo ãvi a volisa akepa.”​—⁠Olosapo 14:⁠30.

Omunu o pondola oku kuata ndati esanju nda vutima waye muli onyeño locikumbiti? Ulume umue wa popia hati: “Nda ove o sima okuti ‘ca sunguluka oku fetuluinya,’ vanja kovipala via vana va siata oku lekisa ocituwa caco vokuenda kuanyamo alua.”

Kũlĩhĩsa ovina via siata oku pita kolonepa vialua violuali kuna kuli ovoyaki omo liolonepele viakova kuenda viatavo. Eci umue a ponda ukuavo, va lifetuluinya loku liponda, kuenje va amamako oku li suvuka kuenda oku nena olofa viomanu vakuavo. Eteke limue eci olongangala via imba etenda lia ponda 18 kamalẽhe, ukãi umue lesumuo lialua wa popia hati: “Tu sukila oku fetuluinya olongangala viaco, olonjanja vialua omo lielinga liavo.” Ocituwa caco ci vokiya lika ungangala, kuenje omanu va vetiyiwa oku likongela vuyaki.

“Iso Liso”

Omanu vamue eci va fetuluinya va sandiliya esunga poku tukula Embimbiliya. Ovo va popia hati, “Embimbiliya ka lia popele hẽ okuti ‘iso liso, eyo leyo’?” (Ovisila 24:​20) Poku tanga ocisonehua caco, pamue tu sima tuti ocihandeleko coku popia hati, “iso liso,” ci vetiya oku fetuluinya. Pole, ocihandeleko caco, ca vetiyile oku yuvula oku fetuluinya. Ndamupi?

Nda umue u Isareli wa punda ukuavo kuenda o tofola iso liaye, Ocihandeleko ca lekisile okuti omunu waco o yambuiwa. Pole, omunu una va lingila ũvi, pamue epata liaye, hayeko o fetuluinya elinga liaco. Ndomo ca lekisiwa Vocihandeleko, omunu waco wa sukilile oku tuala ocitangi caye kakulu vofeka vana va nõliwile ndolonganji vi tetulula vekanga. Ukũlĩhĩso omanu va kuatele wokuti va fetuluinyiwa ovina viosi vĩvi va lingila vakuavo, wa enda oku tutuiya olondingaĩvi oku linga eci cĩvi. Pole, kuli ocitangi cikuavo.

Osimbu ka kua kaile ocihandeleko caco, Yehova Suku wa sapuilile va Isareli vonduko ya Mose hati: “Ku ka suvukile ukuele vutima wove. . . . Ku ka fetuluinye, ku ka kale locikumbiti.” (Ovisila 19:​17, 18) Omo liaco, ocihandeleko coku popia hati, “iso liso, eyo leyo,” ca tiamẽlele kocisila Covihandeleko viosi vina Yesu a lombolola okuti, via tunda kovihandeleko vivali vi popia hati: “Sola Ñala [Yehova] Suku yove lutima wove wosi lomuenyo wove wosi lolondunge viove viosi” kuenda “Sola u o lisungue love ndeci o lisole ove muẽle.” (Mateo 22:​37-​40) Nye Akristão va sukila oku linga eci va talisiwa ohali?

Kuama Onjila Yombembua

Embimbiliya li tukula Yehova hati, “Suku yombembua” kuenda li vetiya afendeli vaye oku ‘sanda ombembua loku yi landula.’ (Va Heveru 13:20; 1 Petulu 3:​11) Anga hẽ, oku sanda ombembua ci tẽliwa muẽle ?

Yesu vokuenda kupange waye woku kunda palo posi, vo siyila, wa tipuiwa, wa lambalaliwa lovanyali vaye, wa pakuiwa lekamba liaye, kuenda wa yandulukiwa lolondonge viaye. (Mateo 26:​48-50; 27:​27-​31) Nye eye a linga? Upostolo Petulu wa popia hati: “Eci vo lavisa, ka va tiuwilile elaviso, leci vo talisa ohali, ka sokoluile oku va fetuluinya, puãi wa talamela u o tetulula olondaka lesunga.”​—⁠1 Petulu 2:23.

Petulu wa lombolola hati: “Kristu wo taleli ohali, kuenje wo sili ongangu yokuti vu kuama volomãi viaye.” (1 Petulu 2:​21) Akristão va vetiyiwa oku kuama ongangu ya Yesu, oku kongelamo ocituwa a lekisa eci a talisiwa ohali. Catiamẽla kondaka eyi, Yesu Vohundo a lingila Komunda, wa popia hati: “Soli ovanyali vene, likutilili ava vo fũkĩlisa; Oco vu linge omãla va Isiene o kasi kilu.”​—⁠Mateo 5:​44, 45.

Omanu vana va kuama ongangu yocisola ca Kristu, nye va sukila oku linga eci va lingiwa eci cĩvi? Elivulu Liolosapo 19:​11, li popia hati: “Olondunge viomunu vi kandangiya onyeño yaye, ulamba waye oku siluila ũvi vo linga.” Handi vali, va kapako elungulo li popia hati: “Ku ka yuliwe leci cĩvi, puãi eci cĩvi ci yula leci ciwa.” (Va Roma 12:​21) Elungulo eli lia litepa locituwa coku fetuluinya ca siata voluali! Ocisola Cakristão vocili ci tu kuatisa oku yuvula ocituwa coku fetuluinya kuenda “oku siluila ũvi” va tu linga, momo ocisola “ka ci patekela onyeño.”​—⁠1 Va Korindo 13:⁠5.

Anga hẽ, eci ci lomboloka okuti nda tu kasi oku talisiwa ohali ale va tu lipañela oku tu linga eci cĩvi, ka tu liteyuila vali? Hacoko! Eci Paulu a popia hati: “Eci cĩvi ci yula leci ciwa,” ka ci lomboloka okuti Ukristão o sukila oku lieca kolofa. Pole, eci tu talisiwa ohali, tu sukila oku sanda onjila yoku liteyuila. Eci va ku linga cĩvi, pamue va nyõla ovikuata viove, o sukila oku vilikiya osipayu. Nda vocitangi caco mua kongela ekamba lietu lio kupange ale lio kosikola, tu sukila oku sandiliya ekuatiso liasongui vaco.​—⁠Va Roma 13:​3, 4.

Tu sukila oku ivaluka okuti, voluali lulo ka ca lelukile oku sanga onganji yi tetulula ovitangi lesunga. Omanu valua va siata oku yi sandiliya, pole, eci onjongole yavo ka yi tẽlisiwa, va kuata ocikumbiti lonyeño yalua kutima.

Nda omanu va tepa ukamba wavo omo lioku lifetuluinya kuenda onya, Satana o sanjuka calua. (1 Yoano 3:​7, 8) Omo liaco, tu sukila oku ivaluka olondaka Viembimbiliya vi popia hati: “Ko ka lifetuluinyi. Efetuluinyo li kale konyeño ya Suku, momo ca sonehiwa citi, Efetuluinyo, liange. Ame fetuluinya. Oco ca popia Ñala [Yehova].” (Va Roma 12:​19) Poku eca ovitangi viosi peka lia Yehova, tu yuvula evalo kutima, lonyeño, kuenda ungangala.​—⁠Olosapo 3:​3-6.

[Elitalatu kemẽla 18]

“Sola Ñala [Yehova] Suku yove lutima wove wosi lomuenyo wove wosi lolondunge viove viosi” kuenda “Sola u o lisungue love ndeci o lisole ove muẽle.”

[Elitalatu kemẽla 19]

Ocisola “ka ci patekela onyeño.”​—⁠1 Va Korindo 13:⁠5.