Ove hẽ o Kasi Oku ‘Tuamẽla Loku Sevetiwa’ Ciwa?
ANGA hẽ, eteke limue wa muile ale ndomo uti umue unene u li tuñunya omo liofela? Ndaño u tuñunyiwa lofela, pole, wa pama. Momo lie? Momo olombombo viaco via iñila ciwa posi. Etu tu pondolavo oku kala nduti waco. Eci tu liyaka lovitangi, tu pondola lika oku pandikisa nda tua ‘sevetiwa’ ciwa. (Va Efe. 3:14-17) Ociseveto caco ci lomboloka nye?
Ondaka ya Suku yi tu sapuila okuti, ‘Kristu Yesu eye ewe lievindi’ liekongelo Liakristão. (Va Efe. 2:20; 1 Va Kor. 3:11) Embimbiliya li vetiya Akristão hati: “Kolisiko oku endaenda laye. Olombombo viene vi tuamele vokuaye. Amamiko oku kula vokuaye loku pamisua vekolelo.” Nda tua ci linga, tu pandikisa kovitangi viosi vi seteka ekolelo lietu, oku kongelamo vana va siata oku popia ‘olondaka viusõsele’ vi tunda ‘kovilongua viesanda.’—Va Kol. 2:4-8.
‘Upati, Lusõvi, Loku Lepa, Kuenda Oku Longa Posi’
Tu pondola ndati oku ‘tuamẽla loku sevetiwa vekolelo’? Oku kuata ombili yoku lilongisa Ondaka ya Suku, ci tu kuatisa oku seveta ciwa ekolelo lietu. Yehova o yongola okuti, tu “kuata unene woku kũlĩhila kumue lolosandu upati lusovi lokulepa kilu lokulonga posi” kuocili condaka yaye. (Va Efe. 3:18) Akristão va sukila oku yuvula oku sanjukila lika ukũlĩhĩso wa pita pokati ‘wovina viefetikilo’ vi sangiwa Vondaka ya Suku. (Va Hev. 5:12; 6:1) Pole, vosi yetu tu sukila oku likolisilako oku vokiya ukũlĩhĩso wetu watiamẽla kocili Cembimbiliya.—Olosap. 2:1-5.
Pole, ka ci lomboloka okuti, oco tu ‘tuamẽle loku sevetiwa vocili’ tu sukila oku kuata ukũlĩhĩso walua. Ocili okuti, Satana wa kũlĩha ovina vi sangiwa Vembimbiliya. Omo liaco, kuli ovina vikuavo tu sukila oku linga. Tu sukila oku “kũlĩhavo ocisola ca Kristu cina ca pitahãla ukũlĩhiso.” (Va Efe. 3:19) Eci tu lilongisa Embimbiliya omo liocisola tu kuetele Yehova Suku loku vokiya ukũlĩhĩso wetu watiamẽla Kondaka yaye, tu pamisa ekolelo lietu.—Va Kol. 2:2.
Seteka Ukũlĩhĩso Wove
Momo lie ku setekela ukũlĩhĩso wove wovina vimue via velapo wa lilongisa Vembimbiliya? Nda wa ci linga, ci ku vetiya oku kuata ombili yoku lilongisa Embimbiliya pokolika. Tanga ovinimbu viatete viukanda Paulu a sonehela va Efeso. (Tanga pokakasia losapi hati, “Ku va Efeso.”) Noke yoku tanga ovinimbu viaco, li pula ndoco: ‘Anga hẽ, olondaka evi Viembimbiliya via yendukila ndeti kovaso ndomo via sonehiwa vokakasia, via ndi lomboloka ciwa?’ Tu konomuisi ovinimbu viaco.
Va Nõliwa “Osimbu Oluali ka Lua Sevetiwile”
Paulu wa sonehela vamanjaye Akristão hati: “Suku wa tu nola locisola caye kuenje wa panga ale okuti tu linga omãla vaye.” Suku wa sokiya oku nõla omanu vamue oco va kongeliwe kepata liomãla vaye va lipua kilu. Omãla vaco vaka viala la Kristu ndolosoma kuenda ndovitunda. (Va Rom. 8:19-23; Esit. 5:9, 10) Satana eci a sepula uviali wa Yehova, wa lekisa okuti omanu va hongua. Eli olio esunga lieci Yehova a nõlela omanu vamue okuti, va kuata ocikele coku malako evĩho liosi voluali, oku kongelamo Satana Eliapu ono yevĩho liaco! Pole, kefetikilo Yehova ka nõlele omunu lomunu pokati kavo oco a linge omõlaye. Eye wa sokiyile oku nõla ocisoko comanu vaka viala la Kristu kilu.—Esit. 14:3, 4.
“Oluali” lupi Paulu a tukula eci a sonehela Akristão vana va nõliwa “osimbu oluali ka lua sevetiwile”? Eye ka tukuile otembo eci Suku ka lulikile handi oluali kuenda omanu. Nda Suku wa ci lingile kotembo yaco, nda ka lekisile esunga. Adama la Heva nda va kuata ndati ekandu liovilinga viavo, nda osimbu Suku ka va lulikile wa kũlĩhĩle okuti, vaka lueya? Otembo yipi Suku a sokiya oku tetulula ovitangi Adama la Heva va nena eci va likongela la Satana koku sinila uviali wa Suku? Yehova wa ci linga noke liolonjali vietu viatete oku lueya, osimbu ka va fetikile oku cita omãla.
‘Okulua Kuocali ca Suku’
Paulu vukanda a sonehela va Efeso, wa lombolola eci catiamẽla keliangiliyo Yehova a linga kefetikilo. Momo lie a popela hati, eliangiliyo liaco lia lingiwa omo ‘liokulua kuocali ca Suku’? Eye wa popia olondaka evi oco a lekise okuti, Yehova ka kisikiwa oku yovola omanu vakuakandu.
Lomue pokati ketu o sesamẽla oku yovuiwa. Pole, omo liocisola Yehova a tu kuetele, wa linga eliangiliyo lioku tu yovola. Nda tua kũlĩhĩsa ekambo lietu lioku lipua, kuenda akandu etu, tu limbuka okuti, eyovo lietu li tunda kocali ca Suku, ndomo Paulu a ci popia.
Elumbu li Kola Liocipango ca Suku
Kefetikilo, Suku ka situluile ndomo aka malako ovilinga via Satana. Momo ca kala ‘elumbu li kola.’ (Va Efe. 3:4, 5) Noke eci kua tumbikiwa ekongelo Liakristão, Yehova wa situlula ndomo aka tẽlisa ocipango caye catiamẽla komanu kuenda koluali. Paulu wa lombolola okuti, ‘eci otembo yaco yeya,’ Suku wa linga ‘esokiyo’ lioku kongela oviluvo viosi.
Onepa yatete yoku kongela oviluvo viosi, ya lingiwa ko Pendekoste yunyamo wa 33 kotembo yovapostolo eci Yehova a fetika oku kongela vana vaka viala la Kristu kilu. (Ovil. 1:13-15; 2:1-4) Onepa yavali, ya lingiwa eci Yehova a fetika oku kongela vana vaka kala voluali luokaliye vemehi Liusoma wa Kristu Mesiya. (Esit. 7:14-17; 21:1-5) Ondaka ‘esokiyo,’ ka yi lomboloka Usoma wa Mesiya, momo Usoma waco wa tumbikiwa lika kunyamo wo 1914. Pole, yi lomboloka eliangiliyo lia Yehova lioku tẽlisa ocipango caye coku kongela oviluvo viaye viosi vio kilu levi vio posi.
“Kolondunge, Lingi Ndakulu Vendamba”
Elilongiso lio pokolika, li ku kuatisa oku kũlĩha “upati lusovi lokulepa kilu lokulonga” kuocili condaka ya Suku. Pole, Satana o pondola oku tu yapula omo liasakalalo omuenyo okuti, ka tu kuata otembo yoku lilongisa. Kuka ecelele oku yapuisiwa lovitangi viaco. Kuatisiwa ‘lukũlĩhĩso’ wa tambula ku Suku okuti, ‘kolondunge o linga ndukulu wendamba.’ (1 Yoa. 5:20; 1 Va Kor. 14:20) Olonjanja viosi, likolisilako oku limbuka esunga lieci wa kolelela ovina wa lilongisa, kuenda oku eca etambululo komunu wosi ‘o pula oku kũlĩhĩsa elavoko liove.’—1 Pet. 3:15.
Sokolola ndeci okuti, o kasi ko Efeso eci ukanda wa Paulu, wa tangiwa onjanja yatete. Anga hẽ, olondaka viaye nda ka via ku vetiyile oku ‘kuata ukũlĩhĩso watiamẽla Komõla a Suku’? (Va Efe. 4:13, 14) Ocili okuti, nda via ku vetiya! Omo liaco, koloneke vilo o sukila oku kapako olondaka via Paulu. Oku sola Yehova lutima wosi, loku kuata ukũlĩhĩso Wondaka yaye, ci ku kuatisa oku kolapo loku ‘tuamẽla kuenda oku sevetiwa’ vu Kristu. Nda wa ci linga, oka tẽla oku pandikisa koloseteko viosi via Satana osimbu esulilo lioluali lulo lũvi ka lieyile.—Osa. 1:1-3; Yer. 17:7, 8.
[Okakasia kemẽla 27]
“Ku va Efeso”
“Suku, Isia ya Ñala yetu Yesu Kristu, a sivayiwe! Wa tu sumũlũisila vu Kristu lasumũlũho osi espiritu a tunda kilu. Osimbu oluali ka lua sevetiwile handi wa tu nola okuti vu Kristu tu kola kuenda tu lipua evelo kovaso aye. Suku wa tu nola locisola caye kuenje wa panga ale okuti tu linga omãla vaye la Mitakati Yesu Kristu. Wa ci lingila okuti tu sivaya ulamba wocali caye ca lua, cina a tu ihĩla [Vomõlaye] wa soliwa. [Vomõlaye,] okuti vosonde [Yomõlaye,] omo tu kuetele eyovo longecelo yakandu. Via tunda kokulua kuocali caye, cina a tu muisa lolondunge toke ca tu supokaila. Wa tu lumbuluila elumbu liocipango caye ca sunguluka ndeci a panga ale. Ocipango caco caye ceci, Wa panga okuti, eci otembo yaco yiya, oco ovina viosi, okuti evi viokilu levi vioposi, vi kongeliwa kuenje vi lingiwa vu Kristu.”—Va Efe. 1:3-10.