Osimbu Kua Endele Koku Kunda Kũlĩhĩsa Elimi Omanu va Vangula
1. Momo lie esokiyo liovikanjo viakongelo a vangula alimi alua li lingiwa ndomo ci likuata lalimi a vanguiwa pocitumãlo?
1 Ko Pendekoste yo 33 K.K., eci olondonge via Yesu via tambula espiritu sandu via fetika oku “vangula alimi aiñi aiñi” lomanu vana va tunda kolonepa viokupãla. (Ovil. 2:4) Kuenje ci soka 3.000 komanu va papatisiwa. Citava okuti valua va tundile kolonepa vikuavo va tẽlele oku vangula elimi lio Heveru ale o Helasi. Yehova wa panga okuti esapulo Liusoma li kundiwa velimi liavo. Esunga liaco lieli okuti, omanu va tava lonjanga eci va yeva esapulo liusoma velimi liavo. Koloneke vilo, akongelo a sangiwa vovikanjo mu vanguiwa alimi alua va vetiyiwa oku kunda velimi va vangula. (Organzados p. 107, kam. 1-2) Ovimunga vielimi liofeka yikuavo ka vi tambula ocikanjo cimue, pole, vi kundila omanu va vangula elimi liaco vocikanjo cekongelo kuenda cakongelo a kasi ocipepi.
2. (a) Upange woku sandiliya omanu va vangula elimi likuavo u lomboloka nye, kuenda u lingiwila pi? (b) Akongelo a likuatisa ndati pokati poku talavaya vocikanjo cimue okuti omanu va vangula alimi alua? (c) Nye tu sukila oku linga nda tua sanga omunu wa lekisa onjongole pole, o vangula elimi likuavo?
2 Nda o kasi vocikanjo cina okuti omanu va vangula elimi limuamue, o pondola oku kundila vosi. Pole, eci ca li tepa nda o kasi volupale luna okuti omanu va vangula alimi alua. Akongelo alimi akuavo va pondolavo oku kundila vocikanjo caco. Ndaño akongelo akuavo a pondola oku ku lekisa omanu va vangula elimi liove, ocikele ca velapo coku sanga omanu o kundila, cekongelo ale cocimunga ove o panga onepa. (Tala okakasia “Likuatisi Pokati.”) Omo liaco, o sukila oku sandiliya kuenda oku pulisa oco o sange amanu va vangula elimi liaco. Upange waco woku sandiliya omanu u lingiwa ndati?
3. Vepuluvi lipi ekongelo ale ocimunga li sandiliya omanu va vangula elimi likuavo, kuenda otembo yiñami yi pesiwa kupange waco?
3 Ndomo Esokiyo Lioku Sandiliya Ava va Vangula Elimi Likuavo li Lingiwa: Otembo yi pesiwa koku sanda omanu va vangula elimi likuavo ca tamba ño kocitumãlo locitumãlo. Omanu vañami va vangula elimi likuavo vimbo liaco? Akundi vañami va sangiwamo? Ekongelo ale ocimunga lia vangula ale lomanu vañami? Ekongelo ka li sandiliya lika omanu vamue, pole, li sukila oku enda kovitumãlo vina ku sangiwa omanu valua okuti va kasi ocipepi locikanjo. Oku linga esokiyo lioku sandiliya ava va vangula elimi likuavo li ecelela okuti omanu valua va kuata epuluvi lioku vilikiya onduko ya Yehova.—Va Rom. 10:13, 14.
4. (a) Upange woku sandiliya omanu va vangula elimi likuavo u sokiyiwa ndati? (b) Olonjila vipi vi kuamiwa vioku sanga omanu va vangula elimi liove?
4 Oco ka ku ka lingiwe upange wo livova woku sandiliya omanu va vangula elimi likuavo, akulu vekongelo capiãla enene mitavaso yupange, o sukila oku linga esokiyo liwa kuenda oku songuila upange waco. (1 Va Kor. 9:26) Kovimunga vielimi yofeka yikuavo, manji umue wa loñoloha okuti ukulu wekongelo ale oñuatisi yekongelo, wa nõliwa lakulu vekongelo, ci tava okuti o songuila ocimunga caco. Akongelo amue kuenda ovimunga va siata oku konomuisa tete ulala watendelo o telefone ale vo Internet oco va kũlĩhĩse olonduko via siata velimi liaco. Noke va sandiliya omanu va vangula elimi likuavo poku va telefonalela ale oku va pasuisa oco va kũlĩhe etendelo liolonjo ci tava oku kongela vocikanjo. Nda ci tava oku kuama esokiyo liaco, akulu vekongelo li songola ocimunga caco, va pondola oku linga esokiyo liokuti vosi vekongelo va panga onepa koku sandiliya omanu va vangula elimi likuavo kapuluvi amue.—Tala okakasia “Ndomo tu Sanga Omanu va Vangula Elimi Likuavo.”
5. (a) Olonumbi vipi akundi va sukila oku kuama poku sandiliya omanu va vangula elimi likuavo? (b) Nye tu pondola oku popia poku sandiliya omanu va vangula elimi likuavo?
5 Tu sukila oku kuata ocimãho poku panga onepa koku sandiliya omanu va vangula elimi likuavo. Olonjanja viosi eci tu sanda omanu vaco, tu sukila oku wala ciwa ndeci tu wala poku enda kupange woku kunda. Omanu valua va limbuka okuti oku pongiya olondaka vioku fetika ombangulo osimbu va sandiliya omanu va vangula elimi likuavo, ci va kuatisa oku lekisa esanju kuenda ci vokiya uloño woku vangula elimi liaco. Ci tava oku tenda otembo tu pesila koku sanda omanu vaco pole, otembo tu pesila koku pongiya olomapa viocikanjo, ka yi tendiwa. Eci tu sanga omunu o vangula elimi liaco, tu sukila oku sapuilako mitavaso yupange ale ukulu ukuavo wekongelo oco ku lingiwe apongoloko vomapa yocikanjo. Eci ci lingiwe ndaño omunu waco ka lekisile onjongole. Ndaño okuti upange woku sandiliya omanu va vangula elimi likuavo u kuete esilivilo, tu sukila oku lekisa esunguluko kuenda oku talavaya kolonepa viosi vioku kunda.—Tala okakasia “Ceci ci Popiwa Poku Sandiliya Omanu va Vangula Elimi Likuavo.”
6. Ovitangi vipi tu pondola oku kuata poku sanda ovisitatũi?
6 Ndomo tu Sandiliya Ovisitatũi: Oku sanda ovisitatũi cambata upange walua okuti ci sukila elikolisilo kuenda epandi. Omunu ocisitatũi ka limbukiwila konduko yaye, kekalo lietimba liaye ale oku wala kuaye. Olonjanja vimue, epata kuenda akamba pamue va yuvula oku eca alomboluilo omunu waco kakundi va va pulisa. Olonumbi vioku sanda ovisitatũi vi pondolavo oku tu kuatisa oku sanda omanu va vangula elimi liofeka yikuavo.
7. (a) Apulilo api a lingiwa kolonjo oco tu sange vana va vangula elimi lioku ilaika? (b) Nye tu sukila oku linga nda omunu tua sanga o kuete ohele yoku tu tambula?
7 Akongelo kuenda ovimunga vielimi lioku ilaika a siata oku kuata onima yiwa poku sandiliya ovisitatũi kolonjo. Ci tava okuti omunu umue wa siata oku mola umue a lisungue laye, va talavayela kumosi, ale va tangela kumosi okuti o vangula elimi lioku ilaika. Pamue omunu waco wa muile ondimbukiso vetapalo yi lungula vakuakuendisa akãlu, yi lekisa okuti posongo pali omãla ovisitatũi. Pamue eye o kuete ngadiaye ocisitatũi. Ivaluka okuti poku pasuisa omanu vaco, ci tava okuti va ku kuatela ohele. Va kuatisa oku tula utima kuenda lekisa ukamba, vangula loku teta onimbu, kala ukuacili kuenda vangula lesumbilo. Vamue va siata oku kuata onima yiwa poku tanga Embimbiliya ale poku lekisa DVD (handi ka kuli velimi lioku ilaika lio Vongola) osimbu va pulisa mueleanjo nda wa kũlĩha umue ocisitatũi. Noke va sapuila okuti ove o yongola oku lekisa komanu vaco elavoko li sangiwa Vembimbiliya. Nda omunu wa sanga ka yongola oku eca alomboluilo, pamue o tava oku tambula onumbi yonjo yove ale esokiyo liolohongele oco a liece ku ngandiaye ale kekamba liaye ocisitatũi.
8. Akongelo a kasi ocipepi a pondola oku kuatisa ndati ekongelo lielimi lioku ilaika?
8 Onjanja yimosi ale olonjanja vivali vunyamo, ekongelo lielimi lioku ilaika li pondola oku laleka akongelo alimi akuavo a kasi ocipepi oco va va kuatise oku sanda ovisitatũi vi sangiwa vocikanjo caco. Ohongele yoku enda kupange woku kunda yi lingiwa lekongelo lielimi lioku ilaika, mu kongela olonumbi viupange waco kuenda ocindekaise. Vekãlu liocimunga locimunga mu endele ukundi umosi o kasi vekongelo lielimi lioku ilaika kuenda a tambule omapa yi lekisa ocitumãlo oku va sandiliya ovisitatũi.
9. Upange woku sanda ovisitatũi u lingiwa ndati povitumãlo vi liongoluila, vi lingila olomapalo ale papa vi tambuila ekuatiso?
9 Upange woku sandiliya ovisitatũi ci tava okuti u lingiwa povitumãlo vina pa kũlĩhĩwa okuti opo via siata oku liongoluila, oku linga olomapalo ale papa vi tambuila ekuatiso. Akundi va sukila oku wala uwalo u likuata lekalo lio pocitumãlo. Hĩse oku eca uvangi komunu umosi ale vavali, okuti omanu valua hacoko. Nda omunu waco wa tava, ci tava oku u pinga onumbi yonjo yaye, kuenda ove u wĩhavo onumbi yonjo yove.
10. Akundi va pondola oku sandiliya ndati ovisitatũi kovitumãlo violomĩlu?
10 Onjila yikuavo yoku ci linga oku pongiya olomapa vi lekisa ovitumãlo violomĩlu kuenda oku nyula ovitumãlo viaco votembo yecelela. Vomapa yaco ci tava oku kongelamo olombomba vio gasolina. Vomapa yikuavo mu kongela olonjo vioku sukula uwalo, olobare, olowotele kuenda ovitumãlo vikuavo violomĩlu. Nda vomapa lomapa mu sangiwa ovitumãlo ku lingiwila olomĩlu vimuamue, akundi va pondola oku kuama onjila yimuamue yoku fetika ombangulo, kuenje eci ci va kuatisa oku loñoloha kupange waco. Omo okuti volowotele va siata oku tambulavo akombe okuti ovisitatũitu, tu sukila oku teta onimbu poku vangula upange wetu ku una o kuete ocikele coku tambula akombe kuenda oku wĩha o evelope muli o DVD (handi ka kuli velimi lioku ilaika lio Vongola) kuenda okokanda ka lekisa alivala olohongele oco vieciwe kakombe ovisitatũi. Kovitumãlo vimue violomĩlu ci tava okuti tu va pulisa nda va kuete olonalavayi va vangula elimi lioku ilaika ale nda vovenda yavo mua siata oku iya omanu vaco. Nda vocikanjo muli osikola yovisitatũi, tu pondola oku va ĩha o DVD yi lombolola alivulu etu oco va yi kape vociseleko cavo calivulu.
11. Momo lie oku sandiliya omanu va vangula elimi likuavo ci kuetele esilivilo kupange wetu woku kunda?
11 Upange Umue Ukuete Esilivilo: Oku sanga omanu va vangula elimi likuavo cambata upange. Handi vali, oco olomapa viocikanjo vi amameko lulandu umuamue ka ca lelukile, momo omanu vamue va vangula elimi likuavo pamue va ilukila kovitumãlo viñi. Pole, kovitumãlo vialua upange woku sandiliya omanu va vangula elimi likuavo u kuete esilivilo lia velapo koku kunda. Yehova, una wa tu ĩha ocikele coku kunda ka kuete ocame. (Ovil. 10:34) Eye “o yongola okuti omanu vosi va popeliwa ha veya kukũlĩhiso w’Ocili.” (1 Tim. 2:3, 4) Omo liaco, tu talavayeli kumosi la Yehova kuenda la vakuetu oco tu sandi omanu vakuavitima via “lipua haivio via sunguluka.”—Luka 8:15.
[Okakasia kemẽla 5]
Likuatisi Pokati
Nda ekongelo ale ocimunga ci sukila ekuatiso koku sanga omanu va vangula elimi liove, mitavaso yupange o pondola oku sapela lakulu vakongelo a kasi ocipepi okuti va vangula elimi likuavo. Hĩse oku vangula lika lakongelo a kasi ocipepi okuti va kuete akundi va vangula elimi li vanguiwa lomanu va sangiwa vocikanjo cene. Akongelo va pingiwa ekuatiso va sapuile akundi okuti, nda umue wa sanga omunu o vangula elimi liaco, o sukila oku soneha onumbi yonjo yaye loku yeca ku mitavaso yupange oco a yece kekongelo ale kocimunga ca pinga ekuatiso. Olomitavaso viupange viakongelo aco vi pondola oku linga esokiyo lioku tokeka ocikanjo mu vanguiwa alimi alua loku kuatisa vana va lekisa onjongole oku enda kekongelo ale kocimunga celimi liaco.
Nda akundi va sanga umue o vangula elimi likuavo okuti wa lekisa onjongole (ale umue ocisitatũi), va sukila oku soneha o formulariu Queira Visitar (S-43) kuenda oku yeca ku mitavaso usonehi. Eci ci ka ecelela okuti omunu o tambula ekuatiso lonjanga konepa yespiritu.—Tala km 5/11 kem. 3.
[Box on page 6]
Ndomo tu Sanga Omanu va Vangula Elimi Likuavo
• Pulisa vakuene: vana va lilongisa Embimbiliya, epata, vana u talavayeli kumosi kuenda omanu vakuavo.
• Vanja vulala watendelo o telefone oco o sange olonduko via siata velimi liaco. Ci tava oku sanga ulala wolonduko kuenda olonumbi violonjo vo Internet ale kocisoko cupange wolo telefone.
• Pulisa lutate kovitumãlo vieca ekuatiso komanu, kolonjo vioku soleka alivulu, oloseketa mu lingiwila ovopange aiñi aiñi, kuenda kolosikola.
• Tala vojornal asapulo atiamẽla kovopange owiñi mua kongela alimi o kolofeka vikuavo.
• Nyula olovenda kuenda ovitumãlo violomĩlu viava va vangula elimi lio kofeka yikuavo.
• Pinga kasongui vocitumãlo colomĩlu, kosikola, kovitumãlo vioviendelo nda ci tava oku kapa omesa yalivulu alimi a vanguiwa lomanu va sangiwa povitumãlo viaco.
• Nda ocihandeleko cofeka cecelela, kuata ulala wovitumãlo violomĩlu ale ocipama vo kombutador cu ku kuatisa oku konomuisa ovitumãlo viowiñi vo Internet.
[Okakasia kemẽla 7]
Ceci ci Popiwa Poku Sandiliya Omanu va Vangula Elimi Likuavo
Oku lekisa ukamba poku vangula, loku kala ukuacili, kuenda oku teta onimbu ci kuatisa omunu okuti ka tu kuatela ohele. Ciwa oku lekisa alivulu kelimi liomunu waco.
Noke yoku lama omunu, o pondola oku vangula ndoco: “Tu kasi oku sapela lomanu va vangula ․․․․․ oco tu va lekise esapulo lieca elavoko li sangiwa Vembimbiliya. Ove wa kũlĩha umue tu pondola oku sapela laye?”
Poku sandiliya ocisitatũi, popia ndoco: “Kalunga. Ci tava okuti ndu ku lekisa ocina cimue? [Lekuatiso lio video, u lekisa ocinimbu cimue copiwa vo Tradução do Novo Mundo—DVD (handi ka kuli velimi lioku ilaika lio Vongola).] Onepa eyi Yembimbiliya yi sangiwa velimi lioku ilaka lioko Amerika. Cilo ka tu kuete lika Embimbiliya, pole tu kuetevo olo video via pangiwila oku kuatisa ovisitatũi konepa yespiritu. Ove hẽ wa kũlĩha umue ocisitatũi ale ka yevite ciwa okuti o sapela ño lekuatiso lielimi lioku ilaika?” Nda omunu tua sanga ka kũlĩhĩle laumue, pamue o tu kula ovitumãlo vikuavo kuli ovisitatũi, ndeci kupange, kosikola, ale posongo.