Uviali Wa Satana Ka U Koleliwa
“Ka ci kala ciwa londingekandu.”—UKU. 8:13.
1. Momo lie esapulo lioku sombisa olondingaĩvi li lembelekela?
NDOPO muẽle olondingaĩvi ka vi ka kalako vali. Ovio, vi ka sombisiwa omo liovina vĩvi va siata oku linga. (Olosap. 5:22; Uku. 8:12, 13) Esapulo eli li lembeleka calua vana va sole esunga haivo va siata oku talisiwa ohali lolondingaĩvi. U wa velapo pokati kava va ka sombisiwa, isia yolondingaĩvi, Satana Eliapu.—Yoa. 8:44.
2. Momo lie ca sukililile oku eca otembo yoku tetulula ocitangi ca votuiwa vocumbo Cedene?
2 Satana omo liepela, wa vetiya omanu vocumbo Cedene, oku likala uviali wa Yehova. Kuenje omanu va linga vakuakandu omo lioku likongela kusuanji wa Satana. (Va Rom. 5:12-14) Yehova wa kũlĩhile okuti ekambo liavo liesumbilo kuenda esino, li ka va nenela ovitangi. Kuenje elinga liaco lia laikele oku limbukiwa loviluvo viosi. Ca sukilile oku eca otembo yoku tetulula ocitangi caco, loku lekisa okuti ovisuanji ka via kuatele esunga.
3. Tu tenda ndati olombiali violuali?
3 Tunde eci omanu va likala oku songuiwa la Yehova, ovo va litumbikila olosoma viavo muẽle. Upostolo Paulu poku sonehela vamanji ko Roma, wa tukula olosoma viaco okuti ‘olombiali.’ Koloneke via Paulu, olombiali via tiamisiwile Kosoma yo ko Roma, okuti Nero eye wa kala oku viala oku upisa kunyamo wa 54 toke kunyamo wa 68 Kotembo yilo. Paulu wa popia okuti olombiali viaco via “kapiwa la Suku.” (Tanga Va Roma 13:1, 2.) Anga hẽ Paulu wa yonguile oku popia okuti uviali womanu wa velapo okuti wa Suku u sule? Sio. Eye wa lekisa okuti osimbu Yehova a kasi oku ecelela uviali womanu, Akristão va sukila oku tava kesokiyo lia “kapiwa la Suku” poku pokola kolombiali.
Onjila yi Tuala Kenyoleho
4. Lombolola esunga lieci uviali womanu ka u koleliwila.
4 Ocili okuti uviali womanu una u kasi peka lia Satana, ka wa kolelepo. Momo lie? Momo owo ka wa tiamẽlele kolondunge via Suku. Yehova eye lika o kuete olondunge via lipua. Kuenda eye lika o pondola oku tu lekisa uviali wa kolapo. (Yer. 8:9; Va Rom. 16:27) Osimbu okuti omanu va lilongisila kovitangi kuenda kakulueya avo, Yehova otembo yosi o linga ovina viwa. Olombiali vina ka vi pokola kokuaye, ka vi kuata onima yiwa yoku viala. Omo liaco, tunde kefetikilo, onjila omanu va kasi oku viala layo vemehi lia Satana, ka ya kolelepo.
5, 6. Nye ca vetiya Satana oku ñualelapo Yehova?
5 Ukualondunge o likolisilako oku yuvula oku linga eci cĩvi. Momo nda wa lipilika oku linga ocina caco, o ka kisikiwa oku limbuka oku lueya kuaye. Tunde kosimbu, ovolandu a siata oku lekisa okuti oku tamalãla Lululiki wetu, uveke. (Tanga Olosapo 21:30.) Pole, Satana omo liocituwa coku livelisapo kuenda epela, wa sinila Yehova. Eliapu lia nõlapo onjila yina okuti yi ko nenela lika ovitangi.
6 Ocituwa ca Satana ca lekisiwa ciwa lombiali yo ko Bavulono eci ya lipanda hati: “Ndonda kilu, ñapa ocalo kilu liolombungululu via Suku, kuenje numãla komunda yekongelo, kupãla ko Norte; ndonda kilu lialende, ndi lisoka la Cimãlõmata.” (Isa. 14:13-15) Ocisimĩlo combiali yaco ka ca tẽlisiwile, momo uviali wo Bavulono wa kuata esulilo limue lĩvi. Cimuamue haico ci ka pita la Satana kuenda oluali luaye okuti va ka nyõliwa muẽle pe.
Momo Lie Suku a Ecelelela Satana Oku Viala?
7, 8. Omo Yehova a ecelelela evĩho vokuenda kuotembo yimue, nye ceyililako?
7 Omanu vamue pamue va lipula esunga lieci Yehova ka tatekelele omanu oku tiamẽla ku Satana kuenda oku kuama uviali umue ka wa kolelepo. Omo okuti Suku eye Tõlo, nda wa kuata epondolo lioku ci linga. (Etu. 6:3) Pole, ka ci lingile. Momo nda wa ci lingile, nda ka kuatisile omanu oku limbuka onjila ya velapo komuenyo wavo. Yehova o ka kemãlisiwa Ndosoma yesunga kuenda yocisola, kuenje omanu vakuekolelo va ka kuatisiwa poku pokola kolonumbi viaye.
8 Nda omanu va yuvuile ovisimĩlo via Satana vioku likala uviali wa Suku, nda ka va kasi oku tala ohali! Pole, ocisimĩlo ca Yehova coku ecelela omanu oku li viala ovo muẽle vokuenda kuotembo yalua, ca siata oku va kuatisa. Eci ca siata oku vetiya vakuavitima via sunguluka oku limbuka esilivilo lioku pokola ku Suku kuenda oku kolela kokuaye. Vokuenda kuanyamo alua, omanu va seteka ale olonjila viñi viñi vioku viala, pole ka va siatele oku kuata onima yiwa. Eci ca siata oku vetiya afendeli va Suku oku kolela okuti onjila ya Yehova yoku viala, oyo ya velapo. Omo Yehova o kasi oku ecelela Satana oku viala, eci ca siata oku nena ohali komanu, oku kongelamo vana va vumba Suku lepandi. Oku amamako kuevĩho kua siatavo oku nenẽla onima yiwa kafendeli vakuekolelo.
Usuanji wa Siata Oku Eca Esivayo ku Yehova
9, 10. Lombolola ndomo uviali wa Satana wa siata oku eca esivayo ku Yehova.
9 Oku ecelela okuti omanu va vetiyiwa la Satana loku li viala ovo muẽle ka ci tu kokela oku kuata atatahãhi onjila ya Yehova yoku viala. Ulandu u sangiwa kelivulu lia Yeremiya u lekisa okuti omanu ka va tẽla oku li viala ovo muẽle, wocili. (Tanga Yeremiya 10:23) Usuanji wa Satana wa siata oku ecelela Yehova oku lekisa ovituwa Viaye viwa vonepa yimue ya velapo. Ndamupi?
10 Ndaño okuti uviali wa Satana wa siata oku kokela omanu ovitangi vialua, lopo tu lete ovituwa via velapo via Yehova. Lonjila yaco, Yehova wa siata oku lekisa unene waye ku vana vo sole. Omo liaco, oku viala kũvi kua Satana ku kasi oku eca esivayo ku Suku. Eci ci lekisa ciwa okuti onjila ya Yehova yoku tetulula ovitangi viatiamẽla kuviali waye ya velapo. Oco o kuate elomboloko liwa, tu konomuisi vimue pokati kovituwa via velapo via Yehova kuenda ndomo oku viala kũvi kua Satana kua siata oku vetiya Yehova oku lekisa ovituwa viaco lonjila yimue ya velapo.
11. Ocisola ca Yehova ca siata oku lekisiwa ndati?
11 Ocisola. Ovisonehua vi tu sapuila okuti, “Suku eye ocisola.” (1 Yoa. 4:8) Tete, Suku wa lekisa ocisola caye, poku lulika omanu. Ndomo tua lulikiwa locikomo, ceca uvangi wocisola ca Suku. Yehova wa eca komanu ocitumãlo ciwa lovina vialua via posoka, vi va sanjuisa. (Efet. 1:29-31; 2:8, 9; Osa. 139:14-16) Pole eci ũvi weya pokati kombuto yomanu, Yehova wa lekisa vali ocisola lonjila yikuavo. Ndamupi? Upostolo Yoano wa tukula olondaka via Yesu okuti: “Omo Suku a sola ndoco oluali, oco a ecela Omõlaye wongunga okuti wosi u kolela ka fi, puãi o mola omuenyo ko pui.” (Yoa. 3:16) Anga hẽ nda kua kala vali onjila yikuavo ya velapo yocisola ca Suku, okuti oku tuma Omõlaye palo posi oco a yovole vakuakandu ci sule? (Yoa. 15:13) Elinga liaco, li eca komanu epuluvi lioku sokolola ndomo va lekisa vomuenyo wavo ocisola ca velapo ca Suku, ndeci Yesu a linga.—Yoa. 17:25, 26.
12. Unene wa Yehova wa siata oku lekisiwa ndati?
12 Unene. ‘Suku Tõlo,’ eye lika o kuete unene woku lulika omuenyo. (Esit. 11:17; Osa. 36:9) Omunu poku citiwa, o kasi ndopapelo ka mua sonehiwile cimue. Toke eci a fa, opapelo yaco yi yuka esapulo liolonjila a nõla, ovilinga viaye, kuenda ovopange omuenyo waye wosi. Ovilinga viaco, vi pondola oku kala vonjivaluko ya Yehova. Kuenje, votembo ya sokiyiwa, Yehova o ka tumbulula omuenyo womunu waco, lovituwa viaye viosi. (Yoa. 5:28, 29) Ndaño okuti ocipango ca Suku, ka ca kaile okuti omanu va fa, pole, olofa vi eca ku Yehova epuluvi lioku lekisa unene waye poku pindula ava va kasi vayambo. Ocili okuti, Yehova eye ‘Suku Tõlo.’
13. Momo lie ocilumba ca Yesu, ca lekisila esunga lia Yehova?
13 Esunga.Yehova, ka kembi kuenda ka lingi ũvi. (Esin. 32:4; Tito 1:2) Eye otembo yosi o kakatela kolonumbi viaye viocili kuenda viesunga, ndaño okuti olonjanja vimue ovina viaco vi u kokela evalo. (Va Rom. 8:32) Yehova wa yeva evalo lia piãla poku mola Omõlaye wa soliwa oku fila kuti, leci va pembula Yesu ndukuakupopia atonãi! Omo a sola calua vakuakandu, Yehova wa tava oku yeva evalo momo otembo yosi eye o kakatela kolonumbi viaye viesunga. (Tanga Va Roma 5:18-21.) Evĩho lioluali li eca ku Yehova epuluvi lioku lekisa esunga lonjila yimue ya velapo.
14, 15. Volonjila vipi Yehova a siata oku lekisa olondunge lepandi?
14 Olondunge. Noke ya Adama la Heva oku linga ekandu, vonjanja yaco, Yehova wa lekisa ndomo a laikele oku potolola ovitangi viosi via kokiwa lusuanji wavo. (Efet. 3:15) Yehova wa lekisa olondunge poku situluila kafendeli vaye ovina viosi viatiamẽla kocipango caye vokuenda kuotembo. (Va Rom. 11:33) Ka kuli lacimue ci pondola oku tateka unene wa Suku woku tetulula ovitangi. Omo okuti voluali mue yuka ukahonga, uyaki, ekambo liolondunge, esino, ekambo liohenda, ocame, kuenda ombambe, Yehova wa siata oku lekisa olondunge koviluvo viaye. Ndonge Tiago wa popia hati: “Olondunge viokilu, tete via pua evĩho, vali viombembua, haivio vionjuka kuenda via sunguluka, haivio vie yuka ohenda lapako awa, kuenda via pua atatahãi lelimbi.”—Tia. 3:17.
15 Epandi. Epandi, ocituwa cimue ca velapo Yehova a siata oku lekisa. Momo nda hacoko, nda ca tĩla oku linãlisa lomanu ka va lipuile, haivo vakuakandu, kuenda vakuakulueya. Omo okuti, Yehova wa siata oku lekisa epandi vokuenda kuolohulukãi vianyamo lonjila yimue ya velapo, vosi yetu tu sukila oku lekisa olopandu kokuaye. Upostolo Petulu o tu vetiya oku ivaluka okuti, “epandi lia Ñala yetu olio eyovo.”—2 Pet. 3:9, 15.
16. Momo lie onjongole ya Yehova yoku ecela yi tu sanjuisila?
16 Ukuakuecela. Vosi yetu tu vakuakandu kuenda tua siata oku lueya olonjanja vialua. (Tia. 3:2; 1 Yoa. 1:8, 9) Tu eca olopandu ku Yehova, omo a siata oku tu ecela ‘calua!’ (Isa. 55:7) Kũlĩhĩsa ocina cikuavo: Omo tu vakuakandu eci Suku a ecela akandu etu, tu yeva esanju lialua. (Osa. 51:5, 9, 17) Epandi lia Yehova, li pamisa ocisola tu u kuetele kuenda li tu vetiya oku kuama ongangu yaye poku tata vakuetu.—Tanga Va Kolosai 3:13.
Esunga Lieci Oluali Lua Vĩhila
17, 18. Kolonepa vipi uviali wa Satana ka u koleliwa?
17 Omo oluali luosi lu kasi oku vialiwa la Satana, vokuenda kuanyamo alua, lua siata oku lekisa evĩho lia piãla. Kunyamo wo 1991, o jornale European ya linga epulilo liokuti: “Anga hẽ evĩho li kasi voluali li tunda ku Suku? Sio, ka li tundi ku Suku. Olio lia siata oku kokiwa lomanu.” Eci ocili muẽle! Omo lioku vetiyiwa la Satana olonjali vietu viatete, via nõlapo uviali womanu okuti oku vialiwa la Yehova hacoko. Uviali waco, wa va kokela ovitangi vialua. Ohali kuenda ovitangi vikuavo via siata oku pita lomanu voluali, ondimbukiso yokuti omanu ka va kuete omoko yoku viala.
18 Uviali wa Satana wendisiwa locipululu. Pole, ocipululu ka ci yuli ocisola Yehova a kasi oku viala laco. Uviali wa Satana ka wa nenẽle elianjo, oku kolapo lesanju. Uviali wa Yehova u ka kemãlisua! Ondimbukiso ye tu lete koloneke vilo? Tu ka konomuisa ondaka yaco vocipama ci kuãimo.
Nye Tua Lilongisa Catiamẽla Kuviali Poku Tanga . . .
[Elitalatu kemẽla 25]
Uviali wa Satana lalimue
eteke u ka kuatisa omanu
Ofoto yasualali vo ko E.U.A
Ofoto yo WHO, ya eciwa la P. Almasy
[Elitalatu kemẽla 26]
Yehova o ka lekisa unene waye poku pindula ava va kasi vayambo
[Elitalatu kemẽla 27]
Ocisola ca Yehova kuenda esunga liaye, via lekisiwa poku eca Omõlaye ndocilumba