Kuata Ukamba La Suku
‘Yehova o Vanja Vutima’
EPOSO lietimba, li kemba. Momo ndomo omunu a moleha ketimba hacoko a tuwa vutima. Omanu va siata oku vanja lika keposo lietimba. Pole, tu eca olopandu ku Yehova Suku omo okuti eye ka vanji lika kemolẽho liomunu. Uvangi waco wa lekisiwa kolondaka vi sangiwa kelivulu lia 1 Samuele 16:1-12.
Kũlĩhĩsa ulandu owu. Yehova wa laikele oku nõla osoma yokaliye oco yi viale ofeka yo Isareli. Suku wa sapuila uprofeto Samuele hati: “Hu tuma ku Jese u Beteleme momo pokati komãla vaye valume opo nda linolẽla osoma.” (Ocinimbu 1) Yehova ka tukuile onduko yomunu waco, pole, wo sapuila lika okuti wa nõla umue pokati komãla valume va Jese. Citava okuti osimbu Samuele a kala oku enda ko Beteleme, wa lipula ndoco: ‘Ndi ka limbuka ndati omõla wa Jese una wa nõliwa la Yehova?’
Eci Samuele a pitila ko Beteleme, wa laleka Jese lomãla vaye valume oco va lie kumuamue okulia kuocilumba. Eci Eliava a iñila vonjo, Samuele wa komõha eposo lietimba liaye. Samuele wa sima hati, Eliava eye o sesamẽla oku linga osoma omo liutunga waye kuenje wa popia lutima waye hati: “Ombuavekua ya Suku yi kasi kovaso aye.”—Ocinimbu 6.
Pole, Yehova o lete ovina lonjila ya litepa. Eye wa sapuila Samuele hati: “Ku ka vanje keposo liocipala caye pamue kokulepa kutunga waye momo ndo pañula.” (Ocinimbu 7) Yehova ka vetiyiwile lutunga wa Eliava kuenda eposo liaye. Momo ovaso a Yehova a lete ovina viosi viatiamẽla komunu kuenda oku ku sangiwa eposo liocili.
Yehova wa sapuila Samuele hati: “[Suku] ka vanji ndeci omunu a vanja, omunu o vanja okumõleha kuokilu, Yehova puãi o vanja vutima.” (Ocinimbu 7) Ocili okuti, ocina ca velapo ku Yehova, utima, momo owo ono yovisimĩlo, lolondunge kuenda ovilinga viomunu. Yehova, una “o pataisa itima,” wa pañula Eliava kuenda omãla vakuavo epandu va Jese vana va molẽha kovaso a Samuele.—Olosapo 17:3.
Jese wa kuatele omõla ukuavo umalẽhe o tukuiwa hati, Daviti, una wa kala “loku lisa olomeme.” (Ocinimbu 11) Noke vo vilikiya kuenje weya ku Samuele. Yehova wa sapuila Samuele hati: “Votoka, u waveka momo eye muẽle.” (Ocinimbu 12) Daviti wa kala umalẽhe umue okuti “ovaso aye a posoka, oku u vanja wa posoka muẽle.” Pole, Suku wa sanjukilile vali calua utima waye.—1 Samuele 13:14.
Voluali lulo, omanu va velisapo calua eposo lioketimba, pole, tu lembelekiwa calua poku kũlĩha okuti Yehova Suku ka vetiyiwa leposo lietimba liomunu. Eye ka velisilepo utunga wove ale eposo liove. Yehova wa velisapo utima wove. Anga hẽ, ukũlĩhĩso owu ka u ku vetiya oku likolisilako oku kuata ovituwa vi sanjuisa Suku?