Ndomo o Kuatisiwa Lesapulo Lia Yesu Kristu

“Ame ndeyilila okuti va kuata omuenyo, kuenda okuti omuenyo waco u supoka.” —YOANO 10:10.

YESU Kristu weyilila voluali oku eca, keyilile oku tambula. Poku linga upange waye woku kunda, wa eca ombanjaile yimue ya velapo komanu okuti, esapulo lina lia situlula ocili ca Suku kuenda ocipango Caye. Omanu vana va tava kesapulo liaco, va pondola oku kuata esanju cilo, ndeli li sangiwa pokati kolohuluwa Viakristão vocili.a Pole, ocina ca velapo vali Yesu a eca okuti esapulo a kunda ci sule, omuenyo waye wa li pua oco a tu yovole. Oco tu kuate omuenyo ko pui, tu sukila oku tava lesanju kesapulo liaco.

Ombanjaile Suku la Yesu va eca Yesu wa kũlĩhĩle okuti wa laikele oku talisiwa ohali peka liovanyãli vaye toke kolofa. (Mateo 20:17-19) Pole, wa popia olondaka via kũlĩhĩwa ciwa vi sangiwa kelivulu lia Yoano 3:16, hati: “Omo Suku a sola ndoco oluali, oco a ecela Omõlaye wongunga okuti wosi u kolela ka fi, puãi o mola omuenyo ko pui.” Yesu wa popelevo hati, weyilila oku “eca omuenyo waye ndocimuenyo coku yovola va lua.” (Mateo 20:28) Momo lie Yesu ka popelele hati, omuenyo waye u upiwa, pole wa popia hati weciwa?

Suku omo liocisola caye ca piãla, wa linga eliangiliyo lioku yovola omanu kekandu va piñala, kuenda kovitangi viyililako ndeci, oku fa lekambo lioku lipua. Eye wa ci linga poku tuma Omõlaye wongunga palo posi oco a ece omuenyo waye ndocilumba. Yesu wa tava oku pesela omuenyo waye wa lipua oco a tu yovole. Eliangiliyo liaco li tukuiwa hati ocisembi, olio ombanjaile ya velapo Suku a eca komanu.b Ombanjaile yaco yi pondola oku tu nenela omuenyo ko pui.

Ceci o sukila oku linga Anga hẽ ocisembi ombanjaile yimue ya eciwa kokuove? Ocili okuti, ca eciwa kokuove. Kũlĩhĩsa ocindekaise eci: Sokolola ndeci okuti omunu umue wa ku ĩha ombanjale yimue yi kasi vokakasia. Pole, ombanjaile yaco yi linga lika yove nda o tava oku yi tambula. Cimuamue haico catiamẽla ku Yehova. Eye wa sokiya oku eca ocisembi komanu vosi, pole, ove o kuatisiwa lika lombanjaile yaco nda wa tava oku yi tambula. O pondola ndati oku lekisa okuti o yongola oku yi tambula?

Yesu wa popia hati wosi “u kolela,” o ka kuata omuenyo ko pui. Vekolelo mua kongela ovilinga viosi viomuenyo wove. (Tiago 2:26) Oku kolela Yesu ci lomboloka oku ambata omuenyo u litava lovina a linga levi a popia. Oco o tẽlise ovina viaco, o sukila oku kũlĩha ciwa Yesu kuenda Isiaye. Yesu wa popia hati: “Omuenyo ko pui wowu, oku ku kũlĩha, ove lika vu Suku yocili, loku kũlĩhavo Yesu Kristu, u wa tuma.”—Yoano 17:3.

Ci soka 2.000 kanyamo a pita, Yesu Kristu wa kunda esapulo limue lia pongolola omuenyo wolohuluwa viomanu koluali liosi. Anga hẽ o yongola oku kũlĩha ovina vikuavo viatiamẽla kesapulo liaco, kuenda ndomo ove kumue la vangandiove vu kuatisiwi lesapulo liaco cilo kuenda otembo ka yi pui? Olombangi via Yehova vi ka sanjukila oku ku kuatisa.

Ovipama vi kuãimo vi ka ku kuatisa oku kũlĩha ciwa Yesu Kristu, una wa kunda esapulo li pondola oku pongolola omuenyo wove otembo ka yi pui.

[Atosi pombuelo yamẽla]