Upange Umue Weca Onima
Eci kohongele yofeka ku kamba olosemana vitatu, akongelo a linge upange woku laleka omanu oku enda kohongele yofeka. Kuli esunga lioku linga upange waco. Momo vana va tava kelaleko kuenje va enda kohongele, va ka sola olohundo viopiwa Vembimbiliya, ndomo ovitumãlo mu talavaya vamanji va lieca olumue via pongiyiwa ciwa, kuenda ndomo vamanji yaco va lekisa ovituwa viwa lomunga yi sangiwa pokati kavo. (Osa. 110:3; 133:1; Isa. 65:13, 14) Anga hẽ omanu vana va kasi ocipãla locitumãlo cohongele citava okuti va kuatisiwavo lupange woku laleka?
Noke yohongele yofeka ya lingiwa kunyamo wo 2011, ofiliale yimue ya tambula ukanda wukãi wa sanga okokanda kelaleko pepito lionjo yaye. Ukãi waco wa kuatele ocituwa coku lisalamisa eci a mola Olombangi Via Yehova. Kuenje, wa soneha ndoco: “Nda kuatele onjo ya posoka, ulume umue uwa, kuenda nda simĩle siti nda kuata ovina vi nena esanju. Noke, nda limbuka okuti, si kuete esanju liocili, momo sia kuatele ocimãho komuenyo. Omo liaco, nda nõlapo oku enda lekãlu liange ocinãla ci soka 320 kolokilometulu, oco ndi kale kohongele kovipama via lingiwa Vocasapalo.” Omo ukãi waco wa sola calua ohongele, wa vilikiya ulume waye votelefone loku u sapuila hati, o lala kohongele oco a kalevo kovipama vi lingiwa Vocalumingu. Eye wa amisako hati: “Nda yevelela olohundo viosi, kuenda nda linga ukamba Lolombangi vialua Via Yehova kuenje, nda limbuka okuti oco ocina nda sukilile komuenyo wange.” Eci a tiukila konjo yaye, wa fetika oku lilongisa Embimbiliya, kuenje noke yoku pita olosãi vikuãla, wa linga ukundi ka papatisiwile. Noke popia hati: “Ñuete esanju lialua omo lioku sanga okokanda kelaleko pepito lionjo yange, momo kaliye omuenyo wange u kuete ocimãho!”
Omanu vamue va ka tambula otuikanda va ka kala kohongele yofeka. Omo liaco, oku kuata ombili yoku linga upange waco ci kuete esilivilo. Otuikanda tuna tu supapo tu ambatiwe kohongele yofeka, kuenda citava oku talavaya latuo poku eca uvangi ka wa sokiyiwile.
Tu Eca Ndati Otuikanda Tuaco?
Oco tu tokeke ocikanjo cetu, tu sukila oku yuvula oku vangula calua. Tu pondola oku popia ndoco: “Kalunga. Tu kasi oku eca ovikanda vielaleko lioku enda kohongele yofeka yi ka lingiwa voluali luosi. Okokanda aka kove. Olonumbi vikuavo vi sangiwa vokokanda kaco.” Vangula lesanju. Poku eca otuikanda tuaco kesulilo liosemana, tu pondolavo oku eca olorevista nda cecelela.