Yehova o Yevelela Oku Liyula Kuava va Sumua

UKUALONDUNGE, Soma Salomone wo ko Isareli, wa limbuka okuti “cosi ciya ño ci veta ño.” (Uku. 9:11) Ocisalu ale ocitangi cimue, ci pondola oku nyõla omuenyo wetu. Citava okuti umue ngandietu o fa ocipikipiki, noke ci tu kokela esumuo lialua. Kuenje vokuenda kuolosemana ale olosãi, pamue esumuo liaco ka li piti lonjanga. Omunu o sakalala calua kuenje o sima okuti ka sesamẽla vali oku likutilila ku Yehova.

Kepuluvi liaco, omunu o sukila elembeleko, ohenda kuenda ocisola. Ukualosamo Daviti wa imba ocisungo cimue ci lembeleka hati: “Yehova o yakela vosi va yongola oku kupuka. O petula vosi va petama.” (Osa. 145:14) Embimbiliya li tu sapuila ndoco: “Ovaso a Yehova a vanja vanja kuosi kilu lieve ha lekisa unene waye kuvakuavitima vio sungulukila.” (2 Asa. 16:9) Eye o ‘tunga kumue lomunu we lipua, haeye wonjuka, okuti o tumbulula utima wu we lipua, kuenda utima wa teka.’ (Isa. 57:15) Ndamupi Yehova a kuatisa loku lembeleka ukuotima wa teka?

‘Ondaka yi Popiwa Kotembo ya Sesamẽla’

Yehova eca ekuatiso kotembo ya sesamẽla, vonduko yongongela ya vamanji koluali luosi. Eli olio esunga lieci Akristão va vetiyiwila oku ‘kolisa ava va leñela.’ ( 1 Tes. 5:14) Olondaka vielembeleko haivio viocisola vi eciwa la vamanji vakuahenda, vi pondola oku pamisa omunu kotembo yesumuo kuenda yoku lila. Olondaka vielembeleko vi pondolavo oku petula utima wa teka. Citava okuti elembeleko liaco, li eciwa lomunu umue wa liyakavo lovitangi vimuamue. Pamue li eciwa lekamba limue okuti li kuete elomboloko liovitangi o kasi oku pita lavio. Ovina evi, vi lekisa okuti Yehova o tẽla oku petula ukuotima wa teka.

Kũlĩhĩsa ocitangi ca pita Lukristão umue ukulu wekongelo o tukuiwa hati, Alex, okuti ndopo a kuelele kuenje ukãi waye wa fa loku vela. Noke mitavaso o nyula akongelo, wa vangula la manji Alex olondaka vielembeleko. Eye wa fisavo ukãi waye, pole wa kuela vali. Mitavaso o nyula akongelo, wa lombolola ndomo olofa viaco vio kokelele esumuo lialua. Pole, eye wa sanga elembeleko poku endaenda kupange woku kunda kuenda kolohongele. Puãi poku tiuka konjo yaye, noke yoku yika epito, wa enda oku liyeva okuti o kasi ulika. Manji Alex wa popia hati: “Oku kũlĩha okuti kuli umue wa pitavo lovitangi ndevi viange, ca ndi lembeleka calua.” Ocili okuti ondaka “ya sesamẽla otembo yaco,” yeca ongusu komunu una wa sumua.—Olosap. 15:23.

Ukristão ukuavo haeye ukulu wekongelo, okuti wa fisavo ohueli yaye, wa vetiyiwa kuenda wa tambula elembeleko lolondaka via Alex. Eye lohenda yalua kuenda ocisola, wa lekisa okuti Yehova wa kũlĩha ovitangi vietu lovina tu sukila. Manji yaco wa popia hati: “Nda okuti vokuenda kuolosãi ale kuanyamo amue o kala lonjongole yoku kuata ohueli, Yehova o ka linga eliangiliyo liocisola oco o kuele vali.” Pole, havosiko va fisa ohueli yavo, okuti va kuata vali onjongole yoku kuela onjanja yavali. Manji Alex poku ivaluka olondaka via manji yaco, wa popia hati: “Oku sokolola okuti eli eliangiliyo lia Yehova, ci kuatisa oku yuvula ovisimĩlo ka via sungulukile viokuti nda o kuela onjanja yavali, oco o kasi oku lueyela ohueli yove yina ya fa, momo oku soka ndoco, ci pembula eliangiliyo liocisola ca Yehova lioku kuela onjanja yavali.”—1 Va Kor. 7:8, 9, 39.

Ukualosamo Daviti, eci a pita lovitangi kuenda esumuo lialua wa limbuka okuti: “Ovaso a Yehova a vanja vakuesunga, o vonguila ovatũi aye kevilikiyo liavo.” (Osa. 34:15) Yehova o yevelela oku liyula kuava va sumua, kuenje kotembo ya sesamẽla, o va lekisa ohenda lolondaka vielembeleko Liakristão vana va pama. Eli, eliangiliyo limue liwa, hailio lia sunguluka.

Ekuatiso li Tunda Kolohongele Viakristão

Omunu wa teka utima, ca leluka oku kuata ovisimĩlo ka via sungulukile okuti viu vetiya oku likalila. Eli olio esunga lieci elivulu Liolosapo 18:1, li tu lunguila hati: “U wa liamuha la vakuavo o li sandaila ovina viaye muẽle, ha funguila cosi ca sunguluka.” Omo Alex wa limbuka ohele yaco, wa popia hati: “Eci omunu a fisa ohueli, vutima waye muiya ovisimĩlo ka via sungulukile.” Eye ivaluka apulilo a enda oku lilinga: “‘Nda linga hẽ ocina cimue ka ca sungulukile kohueli yange? Nda sukilile oku lekisa vali ohenda lesunguluko kokuaye?’ Ame sia yonguile oku siala lika liange. Sia yonguile oku kala ocimbumba. Oku siapo ovisimĩlo viaco, ka ca lelukile momo nda kũlĩhĩle okuti nda kala lupongo.”

Vana va teka utima va sukila oku kala otembo yalua lakamba vakuavituwa viwa. Akamba vaco, va sangiwa vekongelo. Eci ci kuatisa oku imba ovaso ku Suku loku kuata ovisimĩlo via sunguluka haivio vi pamisa.

Olohongele vietu, vi tu kuatisavo oku kuata ovisimĩlo via sunguluka. Osimbu tu yevelela loku sokolola ovolandu Embimbiliya, tu ka tiamisila lika ovisimĩlo vietu kovina vi kuete esilivilo ndeci, oku teyuila Usoma wa Yehova, kuenda oku sivaya onduko yaye, kuenje ka tu ka sokolola vali ovitangi vietu. Handi vali, osimbu tu pindisiwa kespiritu, tu ka pamisiwa poku kũlĩha okuti, ndaño omanu vakuavo ka va tu kapeleko ale ka va tẽla oku limbuka esumuo lietu, pole Yehova wa tu kapako. Eye wa kũlĩha okuti, “utima wa sumua u honguisa omuenyo.” (Olosap. 15:13) Suku yocili o yongola oku tu kuatisa kuenda o tu ĩha utõi longusu yoku amamako lesanju.—Osa. 27:14.

Eci Soma Daviti a lambalaliwa lovanyãli vaye, wa vilikiya Suku hati: “Espiritu liange ka li kuete vali ongusu, lutima vokati kange u kasi lupongo.” (Osa. 143:4) Olonjanja vimue, ohali yi kokela omunu ekavo, esakalalo, kuenda oku teka utima. Ohali yaco, pamue oku vela kuna ku kala otembo yalua. Tu koleli okuti Yehova o ka tu kuatisa oco tu pandikise lovitangi viaco. (Osa. 41:1-3) Ndaño okuti koloneke vilo, Suku ka lingi vali ovikomo, eye o tu ĩha olondunge vi tu kuatisa oku pandikisa kohali. Ivaluka okuti eci Daviti a lambalaliwa, wa vilikiya Yehova. Eye wa imba ocisungo hati: “Njivaluka oloneke vionahũlu. Sokolola ovilinga viove viosi. Sinyanyẽha upange wovaka ove.”—Osa. 143:5.

Omo okuti ovisimĩlo viaye via sonehiwa Vondaka ya Suku, ci lekisa okuti Yehova wa kũlĩha ovitangi vietu. Olondaka evi, vi lekisavo okuti Yehova o yeva apingilo etu. Nda tu kolela kokuaye, eye ‘o tu kuatisa.’—Osa. 55:22.

‘Likutilila Olonjanja Viosi’

Kelivulu lia Tiago 4:8, ku popia hati: “Ameli ku Suku kuenje eye amela kokuene.” Onjila yimue yoku amẽla ku Suku, oku likutilila. Upostolo Paulu o tu vetiya ndoco: “Kali locituwa coku likutilila.” (1 Va Tes. 5:17) Ndaño olonjanja vimue ka tu tẽla oku ivaluka olondaka tu sukila oku tukula, haimo espiritu li “tu livondelelako laleñoleño ka a popiwa.” (Va Rom. 8:26, 27) Ocili okuti, Yehova wa kũlĩha ovisimĩlo vietu.

Manji Monika, omo o kuete ukamba waco la Yehova, wa popia hati: “Olohutililo, oku tanga Embimbiliya, kuenda elilongiso lio pokolika, via ndi kuatisa oku limbuka okuti Yehova Ekamba liange. Kaliye nda kolela kokuaye kuenda nda siata oku mola ekuatiso liaye vomuenyo wange. Oku limbuka okuti eye wa kũlĩha ovitangi viange, ndaño ame si tẽla oku lombolola ovina viosi ndi yevite, ci ndembeleka calua. Ame nda kũlĩha okuti ohenda kuenda asumũlũho aye, ka vi pui.”

Omo liaco, tu tavi kocisola, kuenda kolondaka vielembeleko vi eciwa la vamanji Akristão, loku kapako alungulo tu yeva okuti a pamisa ekolelo lietu, kuenda tu amamiko oku sapuila Yehova volohutililo ovina viosi vi kasi vutima wetu. Aliangiliyo a eciwa kotembo ya sesamẽla, a lekisa okuti, Yehova o tu tata. Manji Alex poku lombolola ulandu waye wa popia ndoco: “Nda tu kapako aliangiliyo a Yehova, tu pamisiwa kespiritu, kuenda tu kuata ‘unene wa piãla’ loku pandikisa kovitangi viosi tu liyaka lavio.”—2 Va Kor. 4:7.

[Okakasia Lelitalatu kemẽla 18]

Elembeleko Kuava va Sumua

Olosamo vie yuka olondaka viomanu vana va lekisa olopandu, okuti vi tu kuatisa oku limbuka ndomo Yehova a yevelela oku liyula kuava va sumua. Konomuisa ovihasu vi kuãimo:

“Eci nda sakalala nda vilikiya Yehova, nda litetelela ku Suku yange. Vonembele yaye wa yeva ondaka yange. Okulitetela kuange kua yevala kokuaye.”—Osa. 18:6.

“Yehova yu ocipepi la vakuavitima via teka. O popela ava va kasi lovitima via samba.”—Osa. 34:18.

“[Yehova] o sakola ava va teka kovitima, kuenje itika apute avo.”—Osa. 147:3.

[Elitalatu kemẽla 17]

“Ondaka ya sesamẽla otembo yaco” yi lembeleka calua keteke liesumuo!