Kuata Ukamba La Suku

Elembeleko Kuava va Sumua

MANJI umue ukãi o kasi oku liyaka luveyi umue wo nenela esumuo lialua wa popia hati: ‘Ndi sima okuti, Yehova ka ndi sole, kuenda ka ndi kapeleko.’ Eye wa sima okuti, Yehova o kasi ocipãla laye. Anga hẽ Yehova o kasi ocipãla lafendeli vaye va sumua? Etambululo lielembeleko li sangiwa volondaka Daviti a popia Vosamo 34:18.

Daviti wa kũlĩhĩle okuti ovitangi vi pondola oku honguisa ekolelo lia fendeli va Yehova. Eci Daviti a kala umalẽhe, wa kala ocingendeleyi omo lioku lambalaliwa la Saulu, osoma yimue ya yonguile oku u ponda omo lionya. Omo liaco, Daviti wa sanda ocitililo cimue volupale luo Gate, ocikanjo ca va Filisiti ovanyali va Saulu, muna asimĩle okuti eye ka tẽla oku u sanga. Pole, eci a limbukiwa lovanyali vaye, wa puluka poku likembisa oku vela uyui. Daviti wa eca olopandu ku Suku omo lioku u popela, kuenje, co vetiya oku soneha Osamo 34.

Anga hẽ, Daviti wa simĩle okuti Suku o yanduluka vana va liyaka lovitangi, ale wa simĩle okuti ka kapiwileko Laye? Daviti wa soneha ndoco: “Yehova [o kasi] ocipepi la vakuavitima via teka. O popela ava va kasi lovitima via samba.” (Ocinimbu 18) Omo liaco, tu konomuisi ndomo olondaka evi vi eca elembeleko kuenda elavoko.

“Yehova [o kasi] ocipepi.” Elivulu limue li lombolola hati, “olondaka evi vi lomboloka okuti, Ñala wa kũlĩha ovitangi viosi omanu vaye va liyaka lavio, o lavulula, o va kuatisa, kuenda o va popela.” Tu sanjuka calua poku kũlĩha okuti, Yehova wa siata oku lava omanu vaye. Eye o lete ovitangi va liyaka lavio ‘koloneke vilo viohali,’ kuenda wa kũlĩha ovina vi kasi vovitima viavo.​—2 Timoteo 3:1; Ovilinga 17:27.

“Vakuavitima via teka.” Kalimi amue, ondaka ‘utima wa teka,’ yi lomboloka omunu o pembuiwa la vakuavo. Pole, onoño yimue ya popia hati, olondaka viukualosamo vi tiamisila etosi liaco “kevalo kuenda kesumuo.” Ocili okuti, afendeli va Suku vakuekolelo olonjanja vimue va siatavo oku liyaka lovitangi vi va nenela esumuo.

‘Vakuavitima via samba.’ Omanu vana va sumua, pamue va sima okuti, ka va kapiwileko, kuenda ka va kuete elavoko. Okalivulu kamue kolonumbi vioku kuatisa vana va pongolola Embimbiliya, ka popia hati, olondaka evi vi lomboloka “vana ka va kuete elavoko liwa lio kovaso.”

Yehova o tenda ndati ‘vana va teka kovitima haivo va sumua’? Anga hẽ, o kasi ocipãla lavo loku sima okuti ka va sesamẽla ocisola caye loku va kapako? Sio, hacoko! Ndeci onjali yimue ukuacisola yi kuata peka omõla waye loku u lembeleka omo liesumuo, cimuamue haico Yehova a siata oku linga okuti, o kasi ocipepi lafendeli vaye va sumua, haivo va pinga ekuatiso liaye. Eye o yongola oku lembeleka vana va teka kovitima haivo va sumua. Yehova o pondola oku va ĩha olondunge loku va pamisa oco va tẽle oku yula ovitangi va liyaka lavio.​—2 Va Korindo 4:7; Tiago 1:5.

Momo lie ku sandiliyila onjila yoku kuata ukamba la Yehova? Suku ukuahenda wa likuminya hati: “Nungavo kumue lomunu we lipua, haeye wonjuka, okuti numbulula utima wu we lipua, kuenda utima wu wonjuka.”​—Isaya 57:15.