Tu Imbili Yehova Ovisungo!
“Njimbila Suku yange ovisungo viesivayo osimbu ñasi lomuenyo.”—OSA. 146:2.
1. Nye ca vetiya umalẽhe Daviti oku soneha olosamo vimue?
ECI Daviti a kala umalẽhe, wa pita otembo yalua vovisenge via kala ocipepi lo Beteleme oku lava oviunda via isiaye. Osimbu a lava lava olomeme, wa kuata epuluvi lioku vanja eposo lioviluvo via Yehova ndeci: ilu lie yuka olombungululu, ‘ovinyama viusenge,’ kuenda ‘olonjila vi palala.’ Ovina eye a mola, vio komõhisa calua kuenje vio vetiya oku soneha ovisungo vioku sivaya Usovoli wovina viaco. Vialua pokati kovisungo viaco, vi sangiwa Volosamo.a—Tanga Osamo 8:3, 4, 7-9.
2. (a) Ovisungo vi vetiya ndati omunu lomunu? Tukula ulandu umue. (b) Nye tu lilongisila kukamba Daviti a kuata la Yehova ndomo ca lekisiwa Kosamo 34:7, 8 kuenda Kosamo 139:2-8?
2 Otembo Daviti a pita koku lisa oviunda, yo kuatisa oku kala onjimbi yimue ya loñoloha. Omo okuti wa loñolohele, wa lalekiwa oku sikila ohalupa Soma Saulu. (Olosap. 22:29) Ndeci ovisungo via Daviti, via enda oku lembeleka soma, koloneke vilo ovisungo via posoka vi lembelekavo omanu. Olonjanja viosi eci Daviti a sika ohalupa, “Saulu wa tulumũha, wa kala ciwa.” (1 Sam. 16:23) Ovisungo via sonehiwa vioku sivaya Suku kuenda ovisikilo, vi kuete esilivilo toke cilo. Kũlĩhĩsa handi ondaka eyi! Koloneke vilo, ci pitãhala 3.000 kanyamo tunde eci Daviti a citiwa, olohuluwa viomanu viapata aiñi aiñi o kilu lieve, va siata oku kuata elavoko loku lembelekiwa Lolosamo via Daviti.—2 Asa. 7:6; tanga Osamo 34:7, 8; 139:2-8; Amo. 6:5.
Esilivilo Liovisungo Kefendelo Liocili
3, 4. Esokiyo lipi liovisungo vi kola lia lingiwa koloneke via Daviti?
3 Daviti wa loñolohele calua kuenda wa talavaya longavelo yaco koku sivaya Yehova. Daviti noke yoku linga osoma yo Isareli, vovopange o tavernakulu a sokiyile, mua kongelele ovisungo via posoka. Pokati ka va Lewi va soka 4.000 kolonalavayi, pa nõliwile 288, ‘vakuakutumbangiya’ haivo “va longisiwa oku imbila Yehova ovisungo,” vombalaka.—1 Asa. 23:3, 5; 25:7.
4 Daviti wa soneha ovisungo vialua via enda oku imbiwa la va Lewi. Va Isareli vana va kuata esumũlũho lioku kala kapuluvi oku yevelela ndomo olosamo via Daviti via enda oku imbiwa, va vetiyiwa calua. Noke eci ombalaka yovisila ya tualiwa ko Yerusalãi, “Daviti wa popia lasongui va va Lewi okuti va sokiye vamanjavo olonjimbi, ha va siki longusu ovisikilo viavo, ovisumba lolohalupa layundu, loku imba lolusale.”—1 Asa. 15:16.
5, 6. Momo lie ovisungo via kuatela esilivilo lialua vokuenda kuviali wa Daviti? (b) Tua kũlĩha ndati okuti ovisungo via kuata esilivilo kefendelo liocili kotembo ya va Isareli?
5 Momo lie ovisungo via kuatelele esilivilo lialua koloneke via Daviti? Anga hẽ momo soma a kala onjimbi? Sio, kua kala esunga likuavo lieya oku lekisiwa la Soma Hesekiya, una wa tumbulula upange wonembele. Kelivulu lia 2 Asapulo 29:25, tu tangako ndoco: “[Hesekiya] wa kapa va Lewi vonjo ya Yehova. Va kala layundu lovisumba lolohalupa, ndeci ca handelekele Daviti kuenda Gadi, ukuavitumasuku velombe lia Soma kuenda uprofeto Natana, momo ocihandeleko caco ca tunda ku Yehova, yu ca eciwa lovaprofeto vaye.”
6 Vonduko yovaprofeto, Yehova wa handelekele afendeli vaye oku u sivaya lovisungo. Olonjimbi viepata liovitunda ka via lingaile upange una wa eciwile ku va Lewi oco va kuate otembo yoku imba loku pitolola ovisungo viaco.—1 Asa. 9:33.
7, 8. Catiamẽla koku imba ovisungo Viusoma, ocina cipi ca velapo okuti oku loñoloha ci sule?
7 Pamue ove o popia ndoco: “Ku va Lewi oku imba ovisungo ka ca kaile ocitangi, pole ame nda nda kaile kotembo yaco, mbi nda sia nõliwile oku kala onjimbi yo votavernakulu momo sia loñolohele!” Pole va Lewi havosiko va loñolohele koku sika. Ndomo ca lomboluiwa kelivulu lia 1 Asapulo 25:8, vamue pokati kavo, va kala oku ‘pindisiwa.’ Handi vali, citava okuti pokati kapata akuavo a va Isareli, pa kalavo olonjimbi vialua via loñoloha, pole Yehova wa ecele lika ocikele caco ku va Lewi. Omo liaco, ci kale ava va ‘loñolohele’ kuenda vana va kala oku ‘pindisiwa’ okuti va Lewi vakuekolelo, vosi yavo va likolisilako lutima wosi oku tẽlisa ovikele viavo.
8 Daviti wa solele oku imba ovisungo kuenda wa loñolohele koku sika. Anga hẽ oku loñoloha kuaco, okuo lika Suku a tendele? Kelivulu Liosamo 33:3, Daviti wa soneha ndoco: “Siki luloño locileñi ca lua.” Tu ivaluki okuti: Ocina ca velapo, oku ‘linga eci tu tẽla’ koku sivaya Yehova.
Esilivilo Liovisungo Noke Yotembo ya Daviti
9. Lombolola eci ove nda wa mola loku yeva nda wa kaile kocipito coku tumbika onembele vokuenda kuviali wa Salomone.
9 Kuviali wa Salomone, ovisungo via kuata esilivilo lialua kefendelo liocili. Poku tumbika onembele, kua kala olonjimbi vakuakusika ovivela vi ñoña lalumbeta okuti ocimunga cavo ca tẽla 120 komanu. (Tanga 2 Asapulo 5:12.) Embimbiliya li tu sapuila okuti, “[ovitunda la] vakuakusika olombeta lolonjimbi” va enda oku “katuila pamosi ocisungo coku sivaya loku pandula Yehova, . . . Momo uwa, momo ohenda yaye ka yi pongoloka yenda ño hũ.” Kuenje eci ocileñi cesanju ca lisandula yu ‘onjo ye yuka lelende’ ca lekisa okuti Yehova wa ci sanjukilile. Hesanjukuolio va yeva eci vakuakusika olombeta kumue lolohuluwa violonjimbi va katuila pamosi ondaka!—2 Asa. 5:13.
10, 11. Nye ci lekisa okuti Akristão vatete va imbaile ovisungo kefendelo?
10 Ovisungo via kuatavo esilivilo kefendelo Liakristão vatete. Ocili okuti, kocita catete afendeli vaco, ka va fendelaile votavernakulu, ale vonembele, pole va fendelaila volonjo. Omo lioku kuamaiwa kuenda ovitangi vikuavo, olonjanja vimue ka ca lelukile oku ci linga. Ndaño lovitangi viaco, Akristão vaco va sivaya Suku lovisungo.
11 Upostolo Paulu wa vetiya vamanjaye Akristão va Kolosai hati: “Lilunguli pokati lolosamo vioku sivaya Suku, loku imbaimba ovisungo viespiritu lolopandu.” (Va Kol. 3:16, NW) Paulu la Siluano eci va kapiwa vokayike, ndaño okuti ka va kuatele elivulu liovisungo, va ‘imbila Suku ovisungo viesivayo.’ (Ovil. 16:25) Nda eteke limue ove o kapiwa vokayike, ovisungo viñami Viusoma o tẽla oku ivaluka?
12. Tu lekisa ndati okuti tua sanjukila ovisungo Viusoma?
12 Omo okuti ovisungo vi kuete esilivilo kefendelo lietu, tu sukila oku lipula ndoco: ‘Ndukuakueca hẽ olopandu kokuavio? Nda siata hẽ oku likolisilako oku pitĩla selo kolohongele viekongelo, levi vimbo, kuenda viofeka oco ndi imbile kumue la vamanji ocisungo catete kuenda ndi ci linga lesanju? Nda siata hẽ oku lemẽla omãla vange okuti poku imba ovisungo kolohongele ndeci, Osikola Yupange Wakristão, Ohongele Yupange, ohundo yowiñi, Lelilongiso Liutala Wondavululi, ka va vi tendi ndepuluvi lioku tunda kolomangu viavo loku ka ñuala ñuala, pole va tenda epuluvi liaco ndesokiyo lioku ketũlula vovolu? Ovisungo vi panga onepa kefendelo lietu. Ci kale okuti tua ‘loñoloha’ ale tu kasi oku ‘pindisiwa,’ vosi yetu tu pondola oku eca esivayo ku Yehova lolondaka vietu. —Ci sokisa la 2 Va Korindo 8:12.
Apongoloko a Pita Vokuenda Kuotembo
13, 14. Oku imba ovisungo lutima wosi vekongelo ku kuete esilivilo lie? Ci lombolola.
13 Vokuenda kueci ci soka 100 kanyamo a pita konyima o Torre de Vigia de Sião, ya lomboluile esilivilo liovisungo Viusoma. Oyo ya popele ndoco: “Oku imba ovisungo oyo onjila yoku kapa ocili vutima lo vovisimĩlo viafendeli va Suku.” Vialua pokati kovisungo vietu, viopiwa Vovisonehua, kuenda ca leluka oku vi lilongisa loku vi patekela. Omanu vana veya onjanja yatete kolohongele vietu, utima wavo u vetiyiwa calua poku yeva ndomo ovisungo vi imbiwa vekongelo.
14 Eteke limue koñolosi, kunyamo wo 1869, C. T. Russell poku tunda kupange, osimbu a kala oku enda konjo, wa yeva omanu va kala oku imba ocisungo vonjo yimue. Kotembo yaco, eye wa puile elavoko lioku sanga ocili catiamẽla ku Suku. Omo liaco, wa litumbika kolomĩlu oco a kuatise omanu lolombongo viaco, momo wa simĩle okuti ka kuatele epondolo lioku va kuatisa konepa yespiritu. Manji Russell wa iñila vohondo yaco mue yuka oneketela kuenda wa sanga omanu va kala oku fendela. Eye wa tumãla loku va yevelela. Kovaso yoloneke vimue, wa tukula ovina a yeva poku soneha hati, “Suku wa tumbulula onjongole yange yoku kolela kondaka yaye, Embimbiliya.” Ivaluka okuti eci ca vetiya Manji Russell, ocisungo ca kala oku imbiwa kohongele yaco.
15. Apongoloko api a lingiwa velivulu liokaliye liovisungo?
15 Vokuenda kuotembo, kua lingiwa apongoloko alua a kuatisa oku kuata elomboloko Liovisonehua. Elivulu Liolosapo 4:18, li popia ndoco: “Onjila yolondingesunga ya soka ndocinyi congula, camamako kokutua toke ca linga utanya.” Evokiyo liocinyi lia kuatisa oku linga apongoloko a ecelela oku ‘imba ovisungo viefendelo liocili.’ Vokuenda kuanyamo 24, Olombangi via Yehova kolofeka vialua, via talavaya lelivulu liovisungo losapi hati, Cantemos Louvores a Jeová.b Votembo yaco omo ocinyi ca amamako oku tua, olondaka vimue via enda oku tukuiwa velivulu liovisungo via pongoluiwa. Ndeci, ondaka “nova ordem,” ya pongoluiwa hati, “novo mundo” okuti oluali luokaliye. Cilo tu popia tuti, onduko ya Yehova yi ka kemãlisiwa, ka yi ka teyuiwa. Omo liaco, kua lingiwa apongoloko kalongiso amue kuenda kua sokiyiwa elivulu liokaliye liovisungo.
16. Elivulu liokaliye liovisungo li tu kuatisa ndati oku kuama elungulo lia Paulu li sangiwa kelivulu lia va Efeso 5:19?
16 Osungu Yolombangi Via Yehova ya sokiya okuti ku lingiwa elivulu liokaliye liovisungo li kuete osapi hati, Tu Imbili Yehova Ovisungo. Kuenje velivulu liaco muli lika 135 kovisungo. Omo okuti ovisungo viaco ka via luile, ca leluka oku patekela vimue pokati kavio. Eci ci li kuata lelungulo lia Paulu li sangiwa kelivulu lia va Efeso 5:19.—Tanga.
Ndomo o Lekisa Olopandu
17. Nye ci ka tu kuatisa oku yula osõi poku imba ovisungo vekongelo?
17 Nye ci ka tu kuatisa oku yula osõi yoku imba ovisungo kolohongele vekongelo? Sokolola ndoco: Ku tava hẽ okuti olondaka, “tuakuaku lueya lueya lovina via lua” viocili? (Tia. 3:2) Etu ka tu ecelela okuti omo ka tua lipuile tu liwekapo oku sivaya Yehova kupange wonjo lanjo. Oco hẽ, momo lie tu ecelela okuti ekambo lioku lipua, li tu tateka oku sivaya Suku lovisungo? Yehova una “wa sovola omẽla womunu” o sanjuka calua eci a yeva ndomo tu wimbila ovisungo viesivayo.—Etu. 4:11.
18. Tukula ovina vimue vi kuatisa oku kũlĩha elaka liovisungo.
18 O CD losapi hati; Cantemos a Jeová—Orquestra e Coral, ya sandekiwa ale valimi alua. Vo CD yaco, mu sangiwa ovisungo viokaliye via posoka. Ovisikilo viaco via posoka calua oku vi yevelela. Vi yevelela olonjanja vialua oco o lilongise oku imba ovisungo vimue viokaliye. Ovio, via sokiyiwa lonjila yiwa okuti poku kuama elaka liaco, o ka tẽla oku patekela olondaka vi kuãimo osimbu handi kua pitilile petosi liaco. Poku sika o CD, momo lie ku setekela oku kuama ovisikilo viaco letaviyo? Nda weya oku kũlĩha ciwa elaka liovisungo konjo yove, o ka tẽla oku imba ciwa kolohongele Vonjango Yusoma.
19. Upange upi wa kongeliwa koku pongiya ovisikilo Viusoma?
19 Ca leluka oku ivalako upange woku sokiya ovisikilo vi imbiwa kolohongele vilikasi, vimbo, kuenda kolohongele viofeka. Pole, kua siata oku lingiwa upange walua. Noke yoku nõla ovisungo viaco, etendelo lia vamanji li soka 64, okuti va panga onepa ko orquestra yo Torre de Vigia, va kũlĩhĩsa lutate ovisungo via sonehiwa kuenje va vi sika. Olonjimbi viaco, vi pesela olowola vialua koku pongiya loku pitolola ovisungo viaco, osimbu handi ka via endele ko estudio yo ko Patterson, Nova Yorke, oku ngalavaliwa. Kuli vamanji ekũi alume lakãi okuti ka va kasi ko Estados Unidos. Va tenda upange waco ndesumũlũho poku pongiya ovisungo vietu via posoka vioku fendela Suku. Tu pondolavo oku lekisa olopandu omo liupange wavo. Eci usongui wonepa kolohongele vimbo kuenda viofeka a tu laleka oku tumãla kolomangu, tu ci lingi lonjanga oco tu yevelele ovisikilo via pongiyiwa locisola.
20. Ocimãho cipi ove o kuete?
20 Yehova wa kapako ovisungo vietu viesivayo. Ovio, vi kuete esilivilo lialua kokuaye. Eci tu liongolola kefendelo, tu pondola oku sanjuisa utima waye poku imba ovisungo lesanju. Omo liaco, ci kale okuti tua loñoloha, ale tu kasi oku lilongisa, vosi yetu tu ‘imbili Yehova ovisungo!’—Osa. 104:33.
[Atosi pombuelo yamẽla]
a Eci pa pita ohulukãi yanyamo, noke yolofa via Daviti, olohoka viovangelo, via sapula oku citiwa kua Mesiya, kangombo vana va enda oku lava olomememe viavo vovisenge via kala ocipepi lo Beteleme.—Luka 2:4, 8, 13, 14.
b Ci soka 225 kovisungo via kala velivulu liaco via sandekiwile kueci ci pitãhala 100 kalimi.
O Tambulula Ndati?
• Ovolandu api a sangiwa Vembimbiliya a lekisa okuti ovisungo vi kuete esilivilo kefendelo lietu?
• Elitokeko lipi li kasi pokati koku pokola kocikundi ca Yesu ci sangiwa kelivulu lia Mateo 22:37, kuenda oku imba ovisungo Viusoma lutima wosi?
• Tu lekisa ndati olopandu kovisungo vietu Viusoma?
[Elitalatu kemẽla 23]
Wa siata hẽ oku lemẽla omãla vove okuti ka va tundi polomangu oku ñuala ñuala osimbu ocisungo ci imbiwa?
[Elitalatu kemẽla 24]
Wa siata hẽ oku lilongisa ovisungo viokaliye konjo?