Tambula Asumũlũho Kosoma Ya Nõliwa Lespiritu Lia Suku!
“Espiritu lia Yehova li kala laye.”—ISA. 11:2.
1. Nye vamue va siata oku popia eci va mola ovitangi vi pita voluali?
“OLUALI lue yuka ndeti ombuanja yo pulitika, lovitangi viñi viñi, kuenda ekalo lĩvi, ombuto yomanu yi ka kala ndati vanyamo 100 a ka kuamamo?” Epulilo eli, lia lingiwa la Stephen Hawking, ukuakukonomuisa olombungululu kunyamo wo 2006. Vukanda wasapulo New Statesman mua sandekiwa ocipama cimue ca lombolola ndoco: “Ka tua malẽleko uhukũi ndaño oku tunga oluali luombembua. Ci kasi ndu okuti tu lingainga ño eci cĩvi. Eci ka ci lekisa okuti ka tua la seteka oku linga eci ciwa. Tua seteka ale oku linga ovina vialua, tunde ko komunismu toke ko kapitalismu, ko Liga das Nações toke kuyaki wekundu lialua. ‘Ovoyaki alua tua linga oco tu maleko uyaki,’ ci lekisa okuti ka tu tẽla oku malako uyaki.”
2. Yehova o ka lekisa ndati esunga lunene waye woku viala ilu lieve?
2 Olondaka viaco ka vi saluisa afendeli va Yehova. Momo Embimbiliya li lekisa okuti omanu ka va lulikiwile oco va liviale ovo muẽle. (Yer. 10:23) Yehova eye lika Ombiali yetu yesunga. Eye o kuete omoko yoku tumbika olonumbi vi tu lekisa ndomo tu songuila omuenyo wetu lonjila yimue yiwa. Handi vali, o talavaya lunene waye oco a maleko ovitangi omanu va likokela poku seteka oku liviala ovo muẽle. Omo liaco, eye o ka kundula vana okuti poku likala uviali waye wesunga, va kapa omanu vupika wekandu levĩho kumue ‘losuku yoluali lulo,’ Satana Eliapu.—2 Va Kor. 4:4.
3. Nye Isaya a popele catiamẽla ku Mesiya?
3 Voluali luokaliye, Yehova o ka viala omanu locisola, vonduko Yusoma wa Mesiya. (Dan. 7:13, 14) Poku tukula Soma yaco, uprofeto Isaya wa popia hati: “Ocinjovelela ci tunda kocisingi ca Jese, kuenje ocanja ci tunda kolombombo viaco. Espiritu lia Yehova li kala laye, espiritu liolondunge luloño, espiritu lielungulo lunene, espiritu liukũlĩhĩso lusumba wa Yehova.” (Isa. 11:1, 2) Volonjila vipi espiritu lia Suku lia eca unene “[k]ocinjovelela ci tunda kocisingi ca Jese”—Yesu Kristu oco a viale omanu? Asumũlũho api a tunda kuviali waye? Kuenda nye tu sukila oku linga oco tu tambule asumũlũho aco?
Wa Tambula Ocikele Coku Viala
4-6. Ukũlĩhiso upi u ka kuatisa Yesu oku kala Soma yohenda, ukualondunge, Ocitunda Cinene haeye Onganji yiwa?
4 Yehova o yongola okuti omanu va lipua vemehi liuviali wo Soma yina yohenda haeye ukualondunge, Ocitunda Cinene kuenda Onganji yiwa. Eli olio esunga lieci Suku a nõlela Yesu Kristu, una wa kuatisiwa lespiritu sandu oku tambula ovikele via velapo. Konomuisa esunga lieci Yesu a ka tẽlisila ovikele a tambula ku Suku.
5 Yesu o kuete ukũlĩhĩso wa velapo wa Suku. Omõla wongunga, wa kũlĩha ciwa Isiaye okuti vakuavo ci sule, omo wa kala kumue laye olohuluwa vialua vianyamo. Vokuenda kuotembo yaco, Yesu wa tambula ukũlĩhĩso walua ku Yehova, kuenje ca sunguluka oku tukuiwa okuti, “esetahãlo lia Suku u ka muiwa lovaso.” (Va Kol. 1:15) Yesu wa popia hati: “U wa mola ame haeye wa mola Isia”—Yoa. 14:9.
6 Noke ya Yehova, u o kuete lika elomboloko liwa lioviluvo viosi, oku kongelamo omanu, Yesu. Kelivulu lia va Kolosai 1:16, 17, tu tangako ndoco: “Ovina viosi via sovuiwila vu Kristu [Omõla a Suku]. Ovina viosi viokilu, levi vioposi, evi vi muiwa, levi ka vi muiwa. . . . Eye tete kovina viosi, kuenje ovina viosi via tokekisua vokuaye.” Sokolola handi olondaka evi! Yesu wa talavaya “ndomesele” koku lulika ovina viosi. Eye o kuete elomboloko lioviluvo viosi vi sangiwa voluali, oku kongelamo owoño womunu. Omo liaco, ca sunguluka oku tukula Kristu hati, ndunge!—Olosap. 8:12, 22, 30, 31.
7, 8. Espiritu lia Suku lia kuatisa ndati Yesu kupange woku kunda?
7 Yesu wa wavekiwa lespiritu sandu lia Suku. Eye wa popia hati: “Espiritu lia Yehova lia mbuila, momo lia mbuaveka. Lia numa oku kundila olosuke ondaka yiwa, loku sakula ava va teka kovitima. Lia numa oku sapula eyovo kolohute, kuenda eletuluko kolomeke. Lia numa oku pandulula ava va pandekua loku sapula unyamo wocili ca Yehova.” (Luka 4:18, 19) Eci Yesu a papatisiwa, espiritu sandu lio kuatisa oku ivaluka ovina vialua a lilongisile otembo a kala kilu, kuenda eci Suku o tumile oku linga vokuenda kupange waye palo posi nda Mesiya. —Tanga Isaya 42:1; Luka 3:21, 22; Yoano 12:50.
8 Omo eye wa tambuile unene wespiritu sandu haeye wa lipuile ketimba lo kovisimĩlo, Yesu ka tukuiwa lika okuti ulume wa velapo wa kala palo posi, eye o tukuiwavo hati, Ulongisi wa velapo. Ocili okuti, “owiñi womanu wa komoha okulongisa kuaye.” (Mat. 7:28) Catete, Yesu o ka malako eci ca kokela omanu ovitangi viosi—ekandu, evĩho, kuenda oku kala konumbi konepa yespiritu. Eye o tẽla oku limbuka eci ci kasi vutima womanu kuenda oku tetulula ovitangi viavo ndomo ci sesamẽla.—Mat. 9:4; Yoa. 1:47.
9. Poku sokolola ovina Yesu a linga palo posi ci pamisa ndati ekolelo liove kokuaye Ndosoma?
9 Yesu weya oku citiwa ndomunu. Eci a kala palo posi wa mola oku hongua kuomanu ka va lipuile, kuenje ovina viaco via kuatisa Yesu oku linga Osoma yiwa. Upostolo Paulu wa soneha ndoco: “[Yesu] co sesamela oku lisetahãla la vamanjaye kovina viosi, okuti o linga ocitunda cinene cohenda, haico ca kolelua vupange woku vumba Suku ha ci tuvika akandu omanu. Momo, omo eye muele a tala ohali loku yonjiwa, oco o tela oku kuatisa ava va yonjiwa.” (Va Hev. 2:17, 18) Omo Yesu wa “yonjiwa” o kuetele ohenda vana va talisiwa ohali. Ohenda ya Yesu, ya muiwa ciwa vokuenda kupange waye woku kunda palo posi. Olombei, ovilema, omanu va talisiwa ohali, kuenda omãla va lianjele laye. (Mar. 5:22-24, 38-42; 10:14-16) Ambombe kuenda vana va kuatele onjala kespiritu lavovo va amẽla kokuaye. Pole, vakuepela, vakualonamalala, kuenda vana ka va “kuete ocisola ca Suku vovitima” viavo, eye wa va nyehũla, wa va suvuka kuenda wa va likala.—Yoa. 5:40-42; 11:47-53.
10. Ndamupi Yesu a lekisa ocisola ca velapo kokuetu?
10 Yesu wa eca omuenyo waye oco tu kuatisiwe. Uvangi wa velapo wokuti Yesu eye o sesamẽla oku kala Osoma yetu, onjongole yaye yoku tu fila. (Tanga Osamo 40:6-10.) Kristu wa popia hati: “Ocisola ca velapo eci ka kuli, cokuti omunu o pesila akamba vaye omuenyo waye.” (Yoa. 15:13) Ocili okuti, Yesu ka kaile ndolombiali viomanu vina vi sole lika oku lia elau osimbu omanu va tumila va tala ohali. Yesu wa fila omanu vosi.—Mat. 20:28.
Wa Tambula Omoko Yoku Yovola Omanu Locisembi
11. Momo lie tu sukilila oku kolela okuti Yesu eye Onjovoli yetu?
11 Omo Yesu eye Ocitunda Cinene, ca sunguluka okuti eca ocilumba cocisembi oco a tu yovole! Eci Yesu a linga upange waye palo posi, wa eca uvangi wokuti o ka kala Onjovoli yetu vokuenda Kuviali waye Wohulukãi Yanyamo, muna tu ka tambula asumũlũho nda tua amamako lekolelo. Eye wa sakula olombei lovilema, wa pindula ava va fa, wa tekula owiñi, kuenda wa lemẽla ofela. (Mat. 8:26; 14:14-21; Luka 7:14, 15) Ocili okuti, poku linga ovina viaco, ka ci lingilile oku lekisa unene waye, puãi wa vetiyiwa lohenda kuenda ocisola. Eye wa sapuila ulume umue ukuavilundu wa pinga kokuaye oku sakuiwa hati: “Nda ci panga.” (Mar. 1:40, 41) Yesu o ka lekisa ohenda yaco vokuenda Kuviali waye Wohulukãi Yanyamo, pole o ka ci linga voluali luosi.
12. Ocitumasuku ca Isaya 11:9, ci ka tẽlisiwa ndati?
12 Kristu kumue loloñuatisi viaye va kasi oku linga upange woku longisa konepa yespiritu okuti tunde eci Yesu a u fetika pa pita ale 2.000 kanyamo. Kuenje olondaka vi sangiwa kelivulu lia Isaya 11:9, viokuti: “Kilu lieve ku yuka ukũlĩhĩso wa Yehova ndeci ovava eyuka vokalunga,” vi ka tẽlisiwa. Velongiso liaco konepa yespiritu, mu ka kongela olonumbi vioku tata ilu lieve kuenda oviluvo ndocikele Adama a tambuile. Kesulilo lianyamo 1.000, ocipango ca Suku ci sangiwa kelivulu Liefetikilo 1:28, ci ka tẽlisiwa kuenda omanu va ka kuatisiwa locilumba cocisembi.
Wa Tambula Omoko Yoku Linga Onganji
13. Yesu wa lekisa ndati okuti wa solele esunga?
13 Kristu eye lika “Suku a tukuila oku linga onganji yava va kasi lomuenyo lava va fa.” (Ovil. 10:42) Ci lembeleka calua oku kũlĩha okuti Yesu ka fi, kuenje esunga lesunguluko liaye vi sokisiwa luvia wa tõla vombunda yaye! (Isa. 11:5) Eye wa suvukile epela, ombambe lovina vikuavo vĩvi, kuenda wa pisa vana ka va kuatele ohenda ava va tala ohali. (Mat. 23:1-8, 25-28; Mar. 3:5) Handi vali, Yesu ka komõhaile eposo liokilu, momo wa kũlĩhĩle “eci ci kasi vutima womunu.”—Yoa. 2:25.
14. Koloneke vilo, Yesu o lekisa ndati okuti o sole eci ciwa lesunga, kuenda apulilo api tu sukila oku lipula?
14 Yesu o kasi oku amamako oku sola esunga lesunguluko poku songuila upange woku kunda u lingiwa voluali luosi koloneke vilo. Ka kuli omunu laumue, ndaño ombiali yimue pamue ociluvo cimue cĩvi cespiritu ci tẽla oku tateka oku tẽlisiwa kuocipango ca Suku. Omo liaco, tua kolela okuti ko Harmagedo esunga lia Suku lika yula. (Tanga Isaya 11:4; Mateo 16:27.) Lipula ove muẽle ndoco: ‘Nda siata hẽ oku lekisa komanu ovituwa ndevi via Yesu eci ngenda kupange woku kunda? Ñasi hẽ oku eca ku Yehova eci ca velapo ndaño pamue uhayele, ale ekalo liange ka li ecelela oku linga eci ndi pondola?’
15. Nye tu sukila oku ivaluka oco tu ece ovina via velapo ku Suku?
15 Eci ci ka tu kuatisa oku vumba Suku lutima wosi, oku limbuka okuti upange woku kunda tu kasi oku linga, hawetuko. Eye wa eca ocikundi caco vonduko Yomõlaye una o kasi oku songuila upange waco, kuenje lunene wespiritu sandu eye o kuatisa vana va litumbika kupange waco. Ove wa sanjukila hẽ oku kala ondingupange ya Suku loku songuiwa Lomõlaye wa nõliwa lespiritu sandu? Velie va tambula ku Yehova ocikundi coku kunda esapulo Liusoma pokati ko 236 kolofeka, nda havanako va tendiwa ndomanu “vaño, haivo ka va longisiwile” okuti etendelo li pitahãla epanduvali kolohuluwa viomanu?—Ovil. 4:13.
Sumũlũhila Vonduko ya Kristu!
16. Esumũlũho lipi lia Suku lia tukuiwa kelivulu Liefetikilo 22:18?
16 Yehova wa sapuila Avirahama hati: “Olofeka viosi viokilu lieve vi sumũlũhila kombuto yove momo wa pokola kondaka yange.” (Efet. 22:18) Eci ci lomboloka okuti vana va kolela kohuminyo yaco, va ka tambula asumũlũho a tunda Kombuto ya Mesiya. Omo liasumũlũho va kasi oku lavoka, ovo va sakalala loku linga upange wa Suku koloneke vilo.
17, 18. Ohuminyo yipi ya Yehova tu tanga kelivulu Liesinumuĩlo 28:2, kuenda oyo yi lomboloka nye kokuetu?
17 Suku wa sapuila vali ombuto ya Avirahama, ofeka ya Isareli hati: “Asumũluho alo osi [ana a tukuiwile Vocihandeleko] a ku wila kuenje a ku sanga, nda o yevelela kondaka ya Yehova, Suku yove.” (Esin. 28:2) Olondaka viaco vi tiamisiwilavo kafendeli va Suku vo koloneke vilo. Oco ove o tambule asumũlũho a Yehova, te o “yevelela” ondaka yaye. Kuenda asumũlũho aco, “a ku wila kuenje a ku sanga.” Nye ca kongeliwa voku “yevelela”?
18 Voku yevelela mua kongela oku kapako eci Ondaka ya Suku yi popia kuenda oku litekula lokulia kuespiritu eye a ecaeca. (Mat. 24:45) Ci lombolokavo oku pokola ku Suku kuenda Komõlaye. Yesu wa popia hati: “Havosiko va popia lame vati, A Ñala, a Ñala, va iñila vusoma wokilu, te u o linga ocipango ca Tate o kasi kilu.” (Mat. 7:21) Oku yevelela Suku ku lomboloka oku pokola lutima wosi kesokiyo eye a tumbika vekongelo Liakristão, kakulu va nõliwa haivo “olongavelo komanu.”—Va Efe. 4:8.
19. Tu tambula ndati asumũlũho?
19 Pokati ‘kolongavelo viaco komanu’ pa sangiwa Osungu Yolombangi Via Yehova, haiyo ocindekaise cekongelo Liakristão koluali luosi. (Ovil. 15:2, 6) Ocili okuti, ndomo tu tata vamanji a Kristu konepa yespiritu cilo, oco ci ka lekisa ndomo tu ka sombisiwa kohali ya piãla. (Mat. 25:34-40) Ekuatiso tu eca kolombuavekua via Suku, oyo onjila yecelela oku tambula asumũlũho.
20. (a) Ocikele cipi “olongavelo komanu” va kuete? (b) Tu lekisa ndati okuti tua sanjukila vamanji vaco?
20 ‘Volongavelo komanu’ mua kongelavo Ocisoko Cakulu vo Filiale, olomitavaso vi nyula akongelo, kuenda akulu vekongelo vana va nõliwa lespiritu sandu. (Ovil. 20:28) Vamanji vaco, va kuete ocikele ca velapo coku pamisa afendeli va Suku “toke . . . vosi tu pitila kongongela yekolelo, leyi yoku kũlĩha Mõla a Suku, kuenje toke tu linga omanu vendamba va soka loseteko yutunga wokuyuka kua Kristu.” (Va Efe. 4:13) Ocili okuti, ovo ka va lipuilevo ndetu. Pole, nda tu sanjukila upange wavo woku tata ocunda locisola, tu ka sumũlũha.—Va Hev. 13:7, 17.
21. Momo lie tu sukilila oku pokola lonjanga Komõla a Suku?
21 Ndopo muẽle Kristu o ka nyõla oluali lulo lua Satana. Eci otembo yaco yi ka pitĩlapo, epopelo lietu li ka tiamẽla kesombiso Yesu a ka linga, momo eye o ka tambula ku Suku omoko yoku songuila “owiñi wakahandangala,” “kolono viovava omuenyo.” (Esit. 7:9, 16, 17) Omo liaco, cilo muẽle, tu likolisiliko oku pokola kuenda oku lekisa olopandu ku Soma wa nõliwa lespiritu lia Yehova.
Nye wa Lilongisa Poku Tanga . . .
• Isaya 11:1-5?
• Marko1:40, 41?
[Elitalatu kemẽla 17]
Ohenda ya Yesu ya muiwa eci a pindula omõla ufeko wa Yairo
[Elitalatu kemẽla 18]
Yesu Kristu eye usongui wupange unene woku kunda u kasi oku lingiwa koluali luosi