Ovisungo Viokaliye Viefendelo!
1 Kohongele yunyamo ya lingiwa ndopo ko Watch Tower Bible and Tract Society of Pennsylvania, keteke 4 kosãi ya Mbalavipembe yunyamo wo 2014, kua lingiwa esapulo liesokiyo liokuti, velivulu lietu liovisungo mu ka lingiwa apongoloko amue. Lia kala esapulo limue li sanjuisa! Omanu vosi va kalako va ivaluisiwa esilivilo ovisungo vietu Viusoma vi kuete kefendelo lietu.—Osa. 96:2.
2 Citava okuti o lipula ndoco: “Momo lie elivulu lietu liovisungo li sukilila oku lingiwa apongoloko?” Kuli asunga alua. Liatete, ukũlĩhĩso wetu watiamẽla Kovisonehua, u kasi oku amamako oku pita vapongoloko kuenda eci ci pongololavo elivulu lietu liovisungo. (Olosap. 4:18) Esunga likuavo liapongoloko aco lieli: Olondaka vialua vi kasi velivulu liokaliye liovisungo viopiwa vo Tradução do Novo Mundo liosimbu. Olondaka viaco vi sukila cilo oku pongoluiwa oco vi likuate lapongoloko a lingiwa Vembimbiliya (edição revisada). Omo okuti ci ka sukila upange walua oco ku sokiyiwe olondaka viokaliye, kua lingiwa esokiyo liokuti velivulu liovisungo mu vokiyiwa ovisungo vimue viokaliye.
3 Anga hẽ tu ka fetika lika oku kuama ovisungo viaco viokaliye eci elivulu liovisungo lika sandekiwa? Sio. Tu kuete esanju lioku vu sapuili okuti vokuenda kuolosãi vi keya, ovisungo vimue viokaliye vi ka sandekiwa vonumbi yetu yo Internet jw.org. Eci ovisungo viokaliye vi ka sandekiwa, vi ka kapiwa kesulilo liesokiyo Liohongele Yupange londimbukiso yokuti “ocisungo cokaliye.”
4 Ndomo o Lilongisa Ovisungo Viokaliye: Ocili okuti ka ci leluka oku lilongisa ocisungo cokaliye. Pole, ndeci Ukualosamo a linga, tu yongola oku imba ovisungo kolohongele viekongelo okuti, ‘ka tu ũha.’ (Osa. 30:12) Oco o lilongise ovisungo viokaliye, kuama olonumbi vimue via leluka ndeci:
Yevelela olonjanja vialua ovisungo via ngalavaliwa vi ka kapiwa vonumbi yetu yo Internet. Oku yevelela olonjanja vialua ovisikilo viaco, ci ka ku kuatisa oku vi ivaluka.
Lilongisa olondaka viaco kuenda seteka oku vi patekela.
Kuama ovisikilo kumue lolondaka viaco. Ci linga toke eci o lilongisa ocisungo caco.
Pongiyi ovisungo viokaliye olonjanja vimue vokuenda Kuefendelo Liepata, toke eci epata li lilongisa ovisungo viaco.
5 Vokuenda kuolosãi vikeya, eci ocisungo cokaliye ci ka kapiwa vesokiyo Liohongele Yupange, vamanji vekongelo tete va ka yevelela ovileñi via ngalavaliwa. Noke olonjeveleli vi ka imba loku kuama ovisungo via ngalavaliwa ndeci tu lingainga lovisungo vikuavo.
6 Eci tu sokolola oku imba ovisungo kolohongele vietu, ci tu ĩha esanju lioku kongela olondaka vietu poku eca esivayo ku Yehova. Omo liaco, tu yuvuli ocituwa coku sia ovitumãlo vietu ocipango eci li pitĩlapo epuluvi lioku imba ocisungo kolohongele vietu.
7 Kuli onjila yikuavo tu pondola oku lekisa esanju lietu koku imba ovisungo. Kolohongele vimbo kuenda viofeka, kua siata oku yevalisiwa ovileñi viovisungo osimbu handi ohongele ka ya fetikile. Olonjanja vivali vunyamo vamanji alume lakãi va tunda kavindi akuãla o kilu lieve va linga ungende lolombongo viavo muẽle oco va ende ko Patterson, Nova Yorke, oku ka ngalavala ovisungo via posoka vi imbiwa kefendelo lietu. Omo liaco, eci manji o songola ohongele a tu laleka oku tumala, kuenda oku yevelela lutate ndomo ovisikilo via pongiyiwa, tu sukila oku ci linga. Oku ci linga ci ka tu kuatisa oku pongiya utima wetu kovipama vi ka kuamamo.—Esera 7:10.
8 Tuka malusula ohongele yetu yetaili locisungo cokaliye losapi hati: “Usoma u Kasi Ale Oku Viala—Wiye!” Ocisungo caco ca kuata onepa ya velapo kohongele yunyamo ya lingiwa ndopo, okuti oco, ca pongiyiwa omo lio 100 canyamo tunde eci Usoma wa tumbikiya.
9 Ovisungo viokaliye vimue pokati “kovina viwa” via tunda ku Yehova. (Mat. 12:35a) Omo liaco tu likolisiliko oku kuata onjongole yoku lilongisa ovisungo viokaliye loku vimba lutima wosi loku eca esivayo lesumbilo ku Suku yetu!—Osa. 147:1.