Esunga Lieci o Edene yi Kuetele Esilivilo Kokuove

Ondaka yimue yi komõhisa olonoño via siata oku popia catiamẽla kulandu wo Edene, wowu wokuti owo ka u kuete ekuatiso liovolandu akuavo Embimbiliya. Ndeci, Paul Morris, ulongisi wosikola ya velapo Walongiso Atavo wa soneha ndoco: “Ka kuli ovinimbu Viembimbiliya vi lombolola lonjila ya suapo ulandu wo Edene.” “Olonoño” vialua pamue vi tava kolondaka viaco. Pole, eci ka ci likuata locili.

Ocili ceci okuti, Vembimbiliya mu sangiwa ovinimbu vialua vi lombolola catiamẽla kocumbo Cedene, ku Adama, ku Eva kuenda konyõha.a Pole, ocisimĩlo colonoño vimue hacimueko koku sokisa locisimĩlo cikuavo ca velapo. Poku likala oku tava ulandu welivulu Liefetikilo catiamẽla kocumbo Cedene, asongui vatavo kuenda vakuakupatãla ovina vi sangiwa Vembimbiliya, va kasi oku lambalala Embimbiliya liosi. Ndamupi?

Oku kuata elomboloko liovina via pita ko Edene, ci kuete esilivilo oco tu kuate elomboloko liovinimbu vikuavo Viembimbiliya. Ndeci, ondaka ya Suku yi kuete ocimãho coku limbuka atambululo kapulilo ondongosi, ana omanu va kuete. Olonjanja viosi atambululo Embimbiliya atiamẽla kapulilo aco, a likuata lovina via li pita vocumbo Cedene. Tala ovolandu amue.

● Momo lie tu kukila kuenda tu fila? Adama la Eva nda va pokuile ku Yehova, nda va kala komuenyo otembo ka yi pui. Ovo nda va fa lika nda okuti va lekisa esino. Eteke ovo va ci linga, oco olofa via fetika. (Efetikilo 2:16, 17; 3:19) Va pumba omuenyo wa lipua kuenda va ponduile lika oku eca komãla vavo ekandu kuenda ekambo lioku lipua. Omo liaco, Embimbiliya li popia hati: “Eli olio esunga lieci ekandu lia iñilila voluali omo liomunu umosi kuenda oku fa omo liekandu kuenje oku fa, kua li sanduila komanu vosi, momo vosi va linga ekandu.”​—Va Roma 5:12.

● Momo lie Suku ecelela evĩho? Vocumbo Cedene, Satana wa tukula Suku okuti uhembi okuti ka eci koviluvo viaye ovina viwa. (Efetikilo 3:3-5) Omo liaco, eye wa popia okuti Yehova ka tẽla oku viala. Adama la Eva va nõlapo oku kala konele ya Satana kuenje va likala uviali wa Yehova; va kala ndu okuti va popia hati omunu o pondola oku linolela eye muẽle eci ciwa leci cĩvi. Yehova omo liesunga liaye kuenda olondunge viaye via lipua, wa kũlihile okuti kua kala lika onjila yimosi yoku tambulula ciwa elundi liaco: oku ecelela otembo oku pita, loku eca komanu epuluvi lioku liviala ovo muẽle lonjila va panga. Evĩho lieyililako, omo liovilinga via Satana kamue kamue lia situlula ocili cimue ci kuete esilivilo liokuti: omunu ka tẽla oku liviala eye muẽle okuti ka kuata ekuatiso lia Suku.​—Yeremiya 10:23.

● Cipi ocipango ca Suku catiamẽla kongongo? Kocumbo Cedene, Yehova wa tumbika onumbi yimue yoku posuisa ongongo. Eye wa handeleka Adama la Eva oku yi yukisa lovitumbulukila viaye loku ‘yi viala’ oco okuti ongongo yosi li kuata eposo limuamue kuenda oku li kuata omunga. (Efetikilo 1:28) Omo liaco, ocipango ca Suku catiamẽla kongongo ceci cokuti oyo yi kala ocumbo celau kuenda yi tungiwa lepata limue li likuete omunga halio lia lipua, okuti ocitumbulukila ca Adama la Eva. Onepa yalua Yembimbiliya yi kuete elitokeko lonjila Suku a ka panga oco a tẽlise ocipango caye ca tete.

● Momo lie Yesu eyilile palo posi? Esino lia lingiwa Vocumbo Cedene lia koka okuti Adama, Eva kuenda ocitumbulukila caye cosi va kuata onima yolofa pole Suku locisola wa eca elavoko limue. Eye wa tuma Omõlaye palo posi oco a tu ĩhe eci Embimbiliya li tukula okuti ocisembi. (Mateo 20:28) Eci ci lomboloka nye? Yesu okuti “Adama wa sulako”; wa li tunda ciwa kocina Adama a lueya. Yesu wamamako oku kuata omuenyo wa lipua omo lioku pokola ku Yehova. Omo liaco, eye wa li eca olumue poku eca omuenyo waye ndocilumba ale ndocisembi, oco omanu vosi vakuekolelo va eceliwe akandu avo loku va ĩha elavoko lioku kuata omuenyo Adama la Eva va kuatele osimbu ka va lingile ekandu. (1 Va Korindo 15:22, 45; Yoano 3:16) Poku ci linga, Yesu wa eca uvangi wokuti ocipango ca Yehova coku pongolola ongongo oco yi linge ocumbo celau ndeci ca kala o Edene ci ka tẽlisiwa.b

Ocipango hacisimĩloko caño. Oco ci kasiko muẽle. Ndeci ocumbo Cedene ca kala muẽle palo posi lovinyama kuenda omanu, ohuminyo ya Suku ya tiamẽla kovaso yoloneke yi ka tẽlisiwa muẽle. Anga hẽ o ka mola oku tẽlisiwa kuolohuminyo viaco? Catamba lika kokuove. Suku o yongola okuti omanu valua va mola oku tẽlisiwa kuohuminyo yaco, ndaño muẽle vana okuti omuenyo wavo ka u likuata lolonumbi viaye.​—1 Timoteo 2:3, 4.

Eci Yesu a kala oku fa, eye wa sapela lulume umue wa nolele olonjila vĩvi komuenyo waye. Ulume waco wa kala ongangala kuenda wa sesamẽlele oku pondiwa. Pole, eye wa pinga ku Yesu elembeleko kuenda elavoko. Nye Yesu a linga? Eye wa likuminya kulume waco hati: “Ove o ka kala kumue lame Vocumbo Celau.” (Luka 23:43) Nda Yesu o yongola okuti ulume waco wa kala ongangala o pinduiwa loku tambula esumũlũho lioku kala otembo ka yi pui vocumbo celau ndeci ca kala o Edene, ku simi hẽ okuti eci oco a ku yonguilavo? Ocili okuti oco! Kuenda eci oco Isiaye a ku yonguilavo. Nda okuti o yongola ekalo liaco kovaso yoloneke, likolisilako oku lilongisa catiamẽla ku Suku una wa lulika ocumbo Cedene.

[Atosi pombuelo yamẽla]

[Okakasia/Oviluvialuvia kemẽla 10]

CI TOKEKISA EMBIMBILIYA LIOSI

“Ñapa ukuse pokati kove [onyõha] lukãi kuenda pokati kocitumbulukila cove locitumbulukila cukãi. Eye o ka sasõla utue wove kuenda ove o ka lumana kocisendemãhi caye.”—Efetikilo 3:15.

Eyi ocitumasuku catete Cembimbiliya, Suku a linga vo Edene. Velie omanu vakuãla va tukuiwa: ukãi, ocitumbulukila caye, onyõha kuenda ocitumbulukila caye? “Ukuse” wa tukuiwa pokati kavo u lipita ndati?

ONYÕHA

Satana, Eliapu.—Esituluilo 12:9.

UKÃI

Onepa yokilu yocisoko ca Yehova mua kongela oviluvo viespiritu. (Va Galatia 4:26, 27) Isaya wa tukula “ukãi,” poku popia okuti eye kovaso yoloneke wa laikele oku cita ofeka yimue yokaliye konepa yespiritu.—Isaya 54:1; 66:8.

OCITUMBULUKILA CONYÕHA

Vana va nõlapo oku linga ocipango ca Satana.—Yoano 8:44.

OCITUMBULUKILA CUKÃI

Tete Yesu Kristu, una wa tunda konepa yokilu yocisoko ca Yehova. “Vocitumbulukila” mua kongelavo va manji a Kristu konepa yespiritu, okuti ocikelecavo oku viala kumue laye Kilu. Akristão vaco olombuavekua, va linga ofeka yespiritu okuti, o “Isareli ya Suku.”—Va Galatia 3:16, 29; 6:16; Efetikilo 22:18.

OKU LUMANIWA KOCISENDEMÃHI

Epute limue lia valuiwa ku mesiya okuti lia vala calua, pole, ka lia kaile otembo yalua. Satana wa tela oku koka okuti Yesu o pondiwa, pole Yesu wa pinduiwa.

OKU SASÕLA UTUE

Oku valula Satana toke eci a fa. Yesu o ka kundula Satana otembo ka yi pui. Pole, osimbu otembo yaco ka ya pitĩlile, eye o ka malako evĩho Satana a fetika ko Edene.—1 Yoano 3:8; Esituluilo 20:10.

Oco o kũlĩhĩse osapi Yembimbiliya, tanga vombrochura losapi, A Bíblia—Qual É a sua Mensagem?, ya sandekiya Lolombangi via Yehova.

[Ociluvialuvia kemẽla 11]

Adama la Eva va tala ohali yalua omo liekandu va linga