Kuata Ukamba La Suku

“A Yehova, . . . wa Ñuliha Muẽle”

“KAKULI ocitele cimue ci lema calua komunu okuti oku kũlĩha hati ka kapiwileko la vakuavo ci sule.”a Ove hẽ, wa siata oku limbuka ocili colondaka evi? Wa siata hẽ oku liyeva okuti lomue wa kapako ovisimĩlo viove? Nda oco, o pondola oku sanga ekoliso kolondaka vi popia hati: Yehova wa kapako calua afendeli vaye kuenda o kũlĩhĩsa ovina viosi va pita lavio komuenyo. Olondaka via Daviti vi sangiwa Kosamo 139 vi tu vetiya oku kolela kocili caco.

Daviti omo lioku kolela okuti Suku wo kapako, wa popia hati: “A Yehova, ove wa ñulĩhisa, wa ñuliha muẽle.” (Ocinimbu 1) Daviti vocinimbu eci wa tukula ondaka yimue ya fina. Kelimi lio Heveru ondaka oku “kũlĩhĩsa” yi sokisiwa loku fẽla ulu posi (Yovi 28:3), oku nyula ofeka, (Olonganji 18:2) ale oku pula ciwa ondaka yimue yi sukila esombiso (Esinumuĩlo 13:14). Ocili okuti Yehova wa tu kũlĩha ciwa kuenda o kũlĩhĩsa ovina viosi viatiamẽla kekalo lietu. Daviti poku tukula ondaka yokuti wa “ñuliha,” o tu longisa okuti Suku wa kapako afendeli vaye. Eye o va kũlĩhĩsa lutate kuenda wa kũlĩha omunu lomunu pokati kavo.

Daviti wa situlula vali ciwa oku kũlĩhĩsa kua Suku poku popia hati: “Wa ñuliha poku tumãla lo poku votoka. Wa limbuka ovisimĩlo viange tunde kupãla.” (Ocinimbu 2) Ocili okuti, Yehova o kasi kilu “kupãla.” Pole, wa kũlĩha eci tu tumãla koñolosi kuenda eci tu pasuka komẽle oku enda kovopange etu. Eye wa kũlĩhavo ovisimĩlo vietu, olonjongole, kuenda ovimãho vietu. Anga hẽ Daviti wa kuatele usumba omo lioku lavuluiwa la Yehova? Sio, pole, wo laleka oku ci linga. (Ovinimbu 23, 24) Momo lie?

Daviti wa kũlĩhĩle okuti Yehova poku kũlĩhĩsa afendeli vaye o ci linga lesunga limue liwa. Eye wa tukula esunga liaco poku soneha hati: “Wa ndengusula kolonjila viange lo poku pekela. Ovituwa viange viosi wa vi limbuka.” (Ocinimbu 3) Yehova eteke leteke, o lete olonjila vietu, akulueya etu, kuenda ovilinga vietu viwa. Anga hẽ o tiamisila lika utima kovilinga vietu vĩvi, ale kovilinga viwa? Kelimi lio Heveru ondaka oku “lengusula” yi lomboloka oku “sisa” ale oku “pekula,” ndeci ongunja yi linga poku tepa olomema lovinene. Ondaka yaco yi “sokisiwa” londaka yikuavo ya pongoluiwa kelimi lio Heveru yi lomboloka “oku tata ciwa.” Yehova poku kũlĩhĩsa ovina afendeli vaye va popia, levi va linga eteke leteke, o kapako evi viwa. Momo lie? Momo o sole calua alikolisilo va siata oku linga oco vo sanjuise.

Osamo 139, yi tu longisa okuti Yehova wa kapako calua afendeli vaye. Eye o va kũlĩhĩsa kuenda o lete ovina va linga komuenyo wavo. Handi vali, wa kũlĩha ovitangi va liyaka lavio, kuenda wa kapako esumuo li tunda kovitangi viaco. Anga hẽ ku vetiyiwa oku fendela Suku yaco ukuacikembe? Nda o kasi ale oku ci linga, kolela okuti: Yehova lalimue eteke a ‘ivalako upange wove kuenda ocisola wa lekisa vonduko yaye.’​—Va Heveru 6:10.

[Atosi pombuelo yamẽla]