Embimbiliya li Pongolola Omuenyo Womanu
UMALẼHE UMUE wa kuata utila ka wa lelukile, wa sanga ndati ocimãho komuenyo? Nye ca vetiya umue ukuesino haeye ukuapulitika oku kala ufendeli umue ukuambembua? Limbuka atambululo vovolandu a kuãimo.
“Nda sukilile calua okuti va lekisa ocisola kokuange kuenda ocikembe.”—INNA LEZHNINA
UNYAMO WOKU CITIWA: 1981
KOFEKA NDA CITIWILA: RUSIA
ULANDU WOMUENYO: UTILA KA WA LELUKILE
OMUENYO WANGE KOSIMBU:Olonjali viange ovisitatũi kuenda nda citiwavo ocisitatũi. Anyamo ange atete epandu a kala awa, pole, noke olonjali viange via linyãla. Ndaño nda kala utito, nda kũlĩhĩle eci ci lomboloka oku linyãla kuenda nda sumuile calua. Isiange la kota liange, va kala volupale luo Troitsk, osimbu okuti, ame la Ina yange tua ilukila ko Chelyabinsk. Noke liotembo yimue, eye wa kuela vali. Isiange yokatumba, wa kala oholua kuenda wa enda oku ndi tipula kumue la Ina yange.
Kunyamo 1993 kota liange wa fila vovava. Ca kala ocilunga cimue cinene vepata lietu. Ina yange wa fetika oku nyua calua kuenje ndeci isia yange yokatumba, wa fetikavo oku ndi tata lãvi. Nda fetika oku sanda omuenyo uwa. Nda sukilile calua okuti va lekisa ocisola kokuange kuenda ocikembe. Nda fetika oku endaenda katavo alua oku sanda elembeleko, pole, sia li sangele.
NDOMO EMBIMBILIYA LIA PONGOLOLA OMUENYO WANGE:Eci nda kuata 13 kanyamo umue tua tangela kumosi okuti, wa kala Ombangi ya Yehova, wa ndi lomboluila ovolandu amue Embimbiliya. Nda sola oku lilongisa catiamẽla komanu vamue va tukuiwa Vembimbiliya ndeci, Noha la Yovi, vana va vumba Suku ndaño lovitangi vialua. Votembo yitito, nda fetika oku lilongisa Embimbiliya Lolombangi Via Yehova loku endaenda kolohongele viavo.
Oku lilongisa Embimbiliya ca yikula ovaso ange poku kũlĩha ocili ci komõhisa. Nda komõha calua poku lilongisa okuti, Suku o kuete onduko yimue. (Olosamo 83:18) Oku limbuka ndomo Embimbiliya lia suapo poku popia ovina via laikele oku pita “koloneke via sulako,” ca ndi komõhisa. (2 Timoteo 3:1-5) Nda solavo oku lilongisa catiamẽla kelavoko liepinduko. Sokolola ño: Ndi ka mola vali kota liange!—Yoano 5:28, 29.
Pole, havosiko va kuatele esanju ndeli liange. Ina yange la isiange yokatumba, va enda oku tata lãvi Olombangi Via Yehova. Ovo va enda oku ndi kisika oku liwekapo oku lilongisa Embimbiliya. Pole, nda solele calua ovina nda kala oku lilongisa kuenda sia kuatele ovisimĩlo vioku liwekapo.
Ka ca lelukile oku liyaka lelambalalo liepata liange. Handi vali, ocitangi cikuavo nda liyaka laco, colofa via manjange utito wa endaenda lame kolohongele okuti, wa filavo vovava. Pole, Olombangi Via Yehova via ñuatisa calua. Pokati kavio, nda sanga ocisola kuenda ocikembe nda sandiliyile calua. Nda kũlĩhĩle okuti, eli olio lia kala etavo liocili. Kunyamo 1996 nda papatisiwa Ndombangi ya Yehova.
NDOMO NDA KUATISIWA: Tunde eci nda kuela lulume umue uwa calua okuti Dmitry, pa pita ale epandu kanyamo. Tu talavaya kofiliale Yolombangi Via Yehova ko São Petersburgo. Noke liotembo yimue, ocituwa olonjali viange via fetika oku lekisa catiamẽla ketavo liange, ca pongoloka.
Ndi pandula calua omo lioku kũlĩha Yehova! Oku u vumba ca siata oku eca ocimãho komuenyo wange.
“Nda kuatele atatahãi alua komuenyo.”—RAUDEL RODRÍGUEZ RODRÍGUEZ
UNYAMO WOKU CITIWA:1959
KOFEKA NDA CITIWILA: KUBA
ULANDU WOMUENYO: UKUESINO HAEYE UKUAPULITIKA
OMUENYO WANGE KOSIMBU: Nda citiwila ko Havana ko Kuba kuenda nda kulila vosanjala yolohukũi muna okuti, oku liyaka kua siatele calua. Noke nda fetika oku sola omapalo yi tukuiwa okuti judô kuenda olomapalo vikuavo viuyaki.
Nda kala ondonge yiwa kuenda olonjali viange via ndi vetiya oku ka tangela kosikola ya velapo. Osimbu nda kala oku tangelako, nda fetika oku limbuka okuti, onjila yopulitika yofeka yange, yi sukila oku pongoloka kuenje nda linga ukuesino. Ame la umue tua tangela kumosi, tua tipula ukuenje umue welombe oco tu nyane uta waye. Uyaki waco, wa kokela kukuenje welombe apute anene vutue. Tua kapiwa vokayike kuenda tua pisiwila olofa kovaso yocimunga ca vakuakuponda. Nda kuatele lika 20 kanyamo kuenda nda pandele ale oku fa!
Vohondo yokayike nda kala lika liange, nda enda oku seteka ocituwa ndi ka lekisa kovaso yocimunga ca vakuakuponda. Sia yonguile oku lekisa usumba. Vepuluvi limuamue nda enda oku lipula ndoco: ‘Momo lie ku kasilili ekambo lialua liesunga voluali? Kuli lika omuenyo owu?’
NDOMO EMBIMBILIYA LIA PONGOLOLA OMUENYO WANGE: Noke liotembo yimue, ekangiso lietu lia pongoluiwa okuti, tu kala 30 kanyamo vokayike. Eli olio epuluvi nda kũlĩha Olombangi vimue Via Yehova via kala vokayike omo liekolelo liavo. Nda komõha lekalo liavo. Va kuatele utõi, pole, va kala vakuambembua. Va kapiwile vokayike omo liekambo liesunga, pole, ka va lekisile esino ale ombuanja.
Olombangi Via Yehova via ndi longisa ocipango ca Suku catiamẽla komanu. Ovio via ndi lekisa Vembimbiliya okuti, eye o ka pongolola ongongo yilo oco yi kale ocumbo celau muna ka mu ka kala vali ungangala kuenda ekambo liesunga. Nda lilongisa okuti, ongongo yi keyuka lomanu vawa vana va ka kuata epuluvi lioku kala komuenyo otembo ka yi pui vekalo limue lia lipua.—Olosamo 37:29.
Nda solele ovina nda kala oku lilongisa Lolombangi Via Yehova, pole, ekalo liomuenyo wange lia litepele calua leli liavo. Nda simĩle okuti, oku kala okuti si litengi vopulitika, ale oku lekisa ovituwa vietulumũho kuenda ombembua ndeci Olombangi Via Yehova, nda ka ca lelukile kokuange. Kuenje nda nõlapo oku tanga Embimbiliya lika liange. Eci nda mala oku li tanga, nda limbuka okuti, Olombangi Via Yehova ovio lika vi kuete ovituwa ndevi Viakristão vatete.
Elilongiso Liembimbiliya lia ndi lekisa okuti, nda sukilile oku linga apongoloko amue vocipikipiki. Ndeci, ame nda kuatele ocituwa coku vangula olondaka viukãlu kuenje nda sukilile oku mioñolola onjila yange yoku vangula. Nda sukililevo oku liwekapo oku sipa. Sia ponduilevo oku litenga vali kovina viopulitika. Ka ca lelukile oku linga apongoloko aco, pole, lekuatiso lia Yehova, kamue kamue nda ci tẽla.
Ocina cimue ka ca lelukile kokuange, oku likandangiya konyeño. Handi, nda siata oku likutilila ku Yehova oco ndi tẽle oku likandangiya. Nda siata oku kuatisiwa calua locisonehua Colosapo 16:32, ci popia hati: “Omunu o livala konyeño wa velapo okuti ulume wa pama o sule, kuenda una o likandangiya wa velapo okuti, una o tambula olupale lumue o sule.”
Kunyamo 1991 nda papatisiwa Ndombangi ya Yehova. Epapatiso lia lingiwa vetangi limue vokayike. Vunyamo wa kuamamo, ame lolomandekua vikuavo, tua yovuiwa kuenda tua tumiwa ko Espanya omo okuti, tua kuateleko epata. Eci nda pitĩlako, haico nda fetika oku endaenda kolohongele Violombangi Via Yehova. Va ndi yolela ciwa ndu okuti, tua li kũlĩhĩle ale vokuenda kuotembo yalua kuenda va ndi kuatisa oku fetika omuenyo wokaliye.
NDOMO NDA KUATISIWA: Ndi kuete esanju lialua, ame lukãi wange kuenda omãla vetu, tu vumba Suku. Ndi kuete esumũlũho lioku kuatisa vokuenda kuotembo yalua omanu vakuavo oku lilongisa catiamẽla Kembimbiliya. Olonjanja vimue, nda siata oku sokolola kumalẽhe una wa pandele oku fa kuenda ndi pandula asumũlũho nda tambula. Si kasi lika lomuenyo, pole, ñuetevo elavoko limue. Ndi lavoka calua Ocumbo Celau ca likuminyiwa, eci esunga lika amamako kuenda “oku fa ka ku ka kalako vali.” —Esituluilo 21:3, 4.
[Blurb on page 19]
“Nda komõha calua poku lilongisa okuti, Suku o kuete onduko yimue”
[Picture on page 20]
Ame lulume wange tu sole oku sapela lovisitatũi olonumbi Viembimbiliya kelimi lioku ilaika