APULILO EMBIMBILIYA A TAMBULUIWA

Vana va fa va kuete hẽ elavoko?

Omo okuti oku fa kukasi ndotulo, ci lekisa okuti ava va fa lacimue va kũlĩha. Pole, Ululiki womuenyo okuete unene wo ku pindula omanu va fa. Tu kuete ekolelo liaco momo Suku wa eca unene ku Yesu oco a pindule omanu kolofa.—Tanga Ukundi 9:5; Yoano 11:11, 43, 44.

Suku wa likuminya okuti omanu va fa va kasi vocisimĩlo caye, va ka pinduiwa oco va kaile lomuenyo voluali luokaliye muna mu ka kala esunga. Vana va ka pinduiwa va ka amamako kolofa toke eci Suku aka vaiha vali omuenyo. Suku Ukuonenewosi, o ka tumbulula omuenyo womanu va fa.—Tanga Yovi 14:14, 15.

Epinduko li ka kala ndati?

Eci Suku a ka pindula omanu, va ka tẽla oku li limbuka ovo muẽle, akamba vavo, kuenda epata liavo. Ndaño okuti etimba liomanu vaco lia nyolẽha, Suku o pondola oku va pindula vetimba lio kaliye.—Tanga 1 Va Korindo 15:35, 38.

Etendelo limue litito liomanu va ka pinduiwa oco va kuate omuenyo kilu. (Esituluilo 20:6) Valua vaka pinduiwa va ka kala vofeka yelau palo posi. Komanu vaco va ka pinduiwa, kokuavo ci ka efetikilo lio kaliye lonjongole yoku kala otembo ka yi pui.—Tanga Osamo 37:29; Ovilinga 24:15.