Linga Ovina vi Likuata Lohutililo ya Yesu

1, 2. Lombolola ovina Yesu a linga kumue lolondonge viaye noke yoku linga ocipito co Paskoa kunyamo wa 33 K.K.

KOÑOLOSI yeteke 14 kosãi ya Nisana kunyamo wa 33 K.K., Yesu kumue lolondonge viaye va kuata esanju omo lioku linga ocipito co Paskoa. Momo, ca va ivaluisa ndomo Suku a yovola afendeli vaye va kala kupika vofeka Yegito. Pole, olondonge viaye via lavokaile oku tambula “eyovo ka li pui.” Ndaño okuti keteke likuavo Yesu wa laikele oku pondiwa lovanyãli vaye, pole, esuvu liaco lia nena asumũlũho. Momo, ocisembi caye ca lipua, ca yuluila onjila omanu vosi, oco va yovuiwe kekandu kuenda kolofa.—Va Hev. 9:12-14.

² Oco tu ivaluke ombanjaile yaco ya tunda ku Suku, Yesu wa linga esokiyo liocipito conjivaluko okuti, ya piñainya ocipito co Paskoa ca enda oku lingiwa onjanja yimosi vunyamo. Omo liaco, wa tikula ombolo ka yi kuete etumbisa kuenje, wa yi timbula, kuenda wa yeca kueci ci soka 11 kolondonge viaye loku popia hati: “Ombolo eyi, etimba liange lia eciwila oku vu kuatisi. Ci lingili onjivaluko yange.” Cimuamue haico a linga lovinyu poku popia hati: “Okopo eyi ocisila cokaliye ca lingiwa vonduko yosonde yange yi pesekela oku vu kuatisi.”—Luka 22:19, 20.

3. (a) Epongoloko lipi lia lingiwa noke liolofa via Yesu? (b) Apulilo api tu konomuisa atiamẽla kohutililo ya Yesu yi sangiwa kelivulu lia Yoano kocipama 17?

³ Ocihandeleko cocisila ca kapiwile pokati ka Suku la va Isareli, ca kala oku panda kesulilo. Momo ca laikele oku piñanyiwa locihandeleko cokaliye ceya oku kala pokati ka Yehova, kuenda olombuavekua via Yesu. Vepuluvi liaco, Yesu ka yonguile okuti, olondonge viaye vi kala nda va Isareli vana ka va pokuile kokuaye. Momo pokati ka va Isareli vaco pakala olonepele viatavo, levi viakova, kuenda va nenela etombo konduko yi kola ya Suku. (Yoa. 7:45-49; Ovil. 23:6-9) Pole, Yesu wa yonguile okuti, ­olondonge viaye vi amamako oku likuata omunga, loku talavayela kumosi, oco vi sivaye onduko ya Suku. Nye Yesu a linga? Eye wa linga ohutililo yimue okuti, omanu vosi va pondola oku tanga ulandu waco. (Yoa. 17:1-26; tala ociluvialuvia kefetikilo liocipama cilo.) Tu sukila oku lipula ndoco: “Anga hẽ Suku wa tambulula ohutililo ya Yesu?” Tu sukilavo oku kũlĩhĩsa ekalo lietu loku li pula ndoco: “Nda siata hẽ oku linga ovina vi likuata lohutililo ya Yesu?”

OVINA YESU A VELISILEPO

4, 5. (a) Olondaka viefetikilo liohutililo ya Yesu vi tu longisa nye? (b) Yehova wa tambulula ndati epingilo lia Yesu liatiamẽla kovina a laikele oku pita lavio kovaso yoloneke?

⁴ Ovina Yesu a longisa kolondonge viaye toke koñolosi, via va kuatisa oku kuata ukũlĩhĩso wa Suku. Vepuluvi liaco Yesu wa petula ovaso aye vilu, kuenje wa popia hati: ‘A Tate, owola yeya. Muisa Omõlove ulamba oco Omõla a ku muisevo ulamba. Momo wo wĩha omoko yoku viala omanu vosi, haiyo yoku eca omuenyo ko pui ku vosi wo wĩha. Nda ku muisa ulamba kilu lieve, momo nda malusula upange wa nyihile oku u linga. Kaliye, a Tate, muise ulamba kovaso ove. Muise ulamba una nda kaile lawo kumue love, osimbu oluali ka lua lulikiwile.’—Yoa. 17:1-5.

⁵ Kũlĩhĩsa ovina Yesu a pitisile kovaso, kefetikilo liohutililo yaye. Esakalalo a kuata lioku kemainya onduko ya Isiaye, tu li limbukila kolondaka viatete a tukula vohutililo yaye hati: “A Tate, onduko yove yi sumbiwe.” (Luka 11:2) Yesu wa lekisa esakalalo likuavo liatiamẽla kovina olondonge viaye via sukilile oco ‘a ece omuenyo ko pui kokuavo.’ Noke, Yesu wa pinga ku Isiaye poku popia hati: ‘Kaliye, a Tate, muise ulamba kovaso ove. Muise ulamba una nda kaile lawo kumue love, osimbu oluali ka lua lulikiwile andi.’ Yehova wa sumũlũisa Yesu poku u wĩha ovina vialua okuti, evi a pinga vi sule, momo wa eca kokuaye ‘onduko ya velapo okuti’ yovangelo yi sule.—Va Hev. 1:4.

‘KŨLĨHA LIKA SUKU YOCILI’

6. Nye ovapostolo va sukilile oku linga oco va kuate omuenyo ko pui? Tua kũlĩha ndati okuti va kuata onima yiwa?

⁶ Yesu wa likutililavo catiamẽla kovina tu sukila oku linga, ndaño ka tualipuile, oco tu kuate omuenyo ko pui. (Tanga Yoano 17:3.) Eye wa popia hati, tu sukila ‘oku kuata ukũlĩhĩso’ wa Yehova Suku kuenda wa Kristu. Tu ci linga poku lilongisa ovina vialua viatiamẽla ku Yehova kuenda Komõlaye. Onjila yikuavo tu sukila oku kuama oco tu kuate ukũlĩhĩso wa Suku, oku sokolola lutate kesanju li tunda koku kapako ovina tua lilongisa viatiamẽla kokuaye. Ovapostolo va kapeleko ovina via tukuiwa ndeti, ndomo Yesu a ci popia vohutililo yaye hati: - ‘Olondaka wa nyiha nda va vi ĩhavo kuenje va vi tava.’(Yoa. 17:8) Pole, oco va kuate omuenyo ko pui, va sukilile oku sokolola kovina Suku a va sapuila, kuenda oku vi kapako komuenyo wavo. Anga hẽ ovapostolo va tẽla oku ci linga toke kesulilo liomuenyo wavo palo posi? Ocili okuti, va ci linga. Momo tua kũlĩha okuti, olonduko viavo via sonehiwa kueci ci soka 12 kovawe a panga onepa ko Yerusalãi Yokaliye yokilu.—Esit. 21:14.

7. Oku kuata “ukũlĩhĩso” wa Yehova Suku ci lomboloka nye? Momo lie ci kuetele esilivilo?

⁷ Olonoño vimue vio ko Helasi via lombolola okuti, ondaka “ukũlĩhĩso,” kelimi lio Helasi yi lombolokavo “oku amamako oku kuata ukũlĩhĩso.” Ndaño okuti olondaka evi vivali vi kuete elomboloko limuamue, pole, vi kuete esilivilo. Momo nda omunu o yongola oku kuata ‘ukũlĩhĩso wa suapo wa Yehova,’o sukila oku amamako oku lilongisa. Voku kuata ukũlĩhĩso wa Yehova okuti, eye omunu wa velapo voluali, mua kongela oku lilongisa ovina vialua viatiamẽla kokuaye, okuti oku kũlĩha lika ovituwa viaye locipango caye ci sule. Voku kũlĩha Yehova mua kongelavo oku u kuatela ocisola cocili, kuenda oku sola afendeli vaye. Momo, Embimbiliya li popia hati: ‘Omunu wosi ka kuete ocisola, ka kũlĩhĩle Suku.’ (1 Yoa. 4:8) Voku kũlĩha Yehova Suku mua kongelavo oku pokola kokuaye. (Tanga 1 Yoano 2:3-5.) Oku kala lomanu vana va kũlĩha Yehova, esumũlũho liocili! Pole, tu sukila oku lavulula oco ka tu ka nyõle ukamba wetu laye, ndeci Yuda Isikariote a linga. Omo liaco, tu likolisiliko oku pamisa ukamba wetu la Yehova. Nda tua ci linga, tu ka kuata omuenyo ko pui.—Mat. 24:13.

“VA LAVELA VONDUKO YOVE”

8, 9. Ocina cipi Yesu a velisilepo eci a kala kupange waye woku kunda palo posi? Oviholo vipi viatavo esanda Yesu a likala?

⁸ Noke yoku tanga ohutililo ya Yesu yi sangiwa kelivulu lia Yoano kocipama 17, ka tu limbuka hẽ okuti Yesu wa lekisa ocisola calua kolondonge viaye kuenda kokuetu? (Yoa. 17:20) Pole, tu sukila oku kuata elomboloko liokuti, epopelo lietu halioko lika Yesu a pitisile kovaso. Momo tunde kefetikilo toke kesulilo liupange waye woku kunda palo posi, wa velisilepo oku kemãlisa loku sivaya onduko ya Isiaye. Eci vosunangonga yo ko Nasara mua lingiwa esapulo liupange wa Yesu, eye wa tanga vociña ca Isaya hati: “Espiritu lia Yehova lia mbuila, momo lia ­mbuaveka. Lia numa oku kundila olosuke ondaka yiwa.” Ocili okuti, eci Yesu a tanga ulandu watiamẽla kupange waye, wa tukula onduko ya Suku.—Luka 4:16-21.

⁹ Oviholo via va Yudea vi lekisa okuti, osimbu Yesu keyile handi palo posi, asongui vatavo esanda va enda oku vetiya omanu oco ka va ka tukule onduko ya Suku. Pole, Yesu ka tavele koviholo viaco, momo ka vi sangiwa Vembimbiliya. Eye wa sapuila ovanyãli vaye hati: “Ndeyilila vonduko ya Tate, kuenje ka wa nambuili. Nda umue wiñi iyilila vonduko yaye muẽle, nda wo tambuli.” (Yoa. 5:43, NW) Eci pa kambele oloneke vimue osimbu Yesu ka file handi, wa lekisa esakalalo liaye poku likutilila hati: “A Tate, muisa onduko yove ulamba.” (Yoa. 12:28) Omo liaco, ohutililo ya Yesu tu kasi oku konomuisa cilo, yi lekisa okuti, wa velisilepo oku sivaya onduko ya Isiaye.

10, 11. (a) Vupange wa Yesu woku longisa omanu oco va kũlĩhe onduko ya Isiaye mua kongelele nye? (b) Olondonge via Yesu vi sukila oku talavaya locimãho cipi?

¹⁰ Yesu wa likutilila hati: ‘Nda situlula onduko yove komanu vana wopa voluali, kuenje wa va nyiha. Va kala vove, kuenje wa va nyiha, yu va pokola kondaka yove. Ame si kasi vali voluali, ovo puãi, va kasi voluali, kuenje ndiya kokuove. A Tate o kola, va lavela vonduko yove wa nyiha, oco va kale vamuamue ndetu muẽle.’—Yoa. 17:6, 11.

¹¹ Eci Yesu a longisa onduko ya Isiaye kolondonge viaye, wa kongelelemo ovina vialua okuti, oku tukula lika onduko yaco ci sule. Eye wa vi kuatisa oku kuata elomboloko liatiamẽla ku Yehova. Wa vi longisa ovituwa vi komõhisa via Yehova, kuenda wa lekisa ndomo a siata oku tu tata locisola. (Etu. 34:5-7) Ndaño okuti Yesu o kasi komangu yaye yuviali wo kilu, pole, wa siata oku kuatisa olondonge viaye oco vi longise omanu onduko ya Suku voluali luosi. Locimãho cipi? Eye o yongola okuti, osimbu esulilo lioluali lulo ka lieyile, omanu valua va kongeliwa oco va popeliwe. Eci esulilo liya, Yehova o ka popela afendeli vaye vo kolela, kuenje, omanu vosi va ka kũlĩha onduko yaye!—Esek. 36:23.

“OLUALI LU TAVE OKUTI WA NUMA”

12. Ovina vipi vitatu tu sukila oku kapako oco tu amameko lupange wetu woku popela omanu?

¹² Eci Yesu a kala palo posi, wa likolisilako oku kuatisa olondonge viaye oco vi yule ahonguo avo. Ovina viaco via va kuatisa oku amamako lupange Yesu a fetikile. Yesu wa likutilila hati: ‘Ndeci ove wa numa voluali, haico ovo nda va tuma voluali.’ Yesu wa tukula ovina vitatu va sukilile oku linga oco va amameko lupange woku popela omanu. Catete, Yesu wa likutilila oco olondonge viaye ka vi ka linge onepa koluali lulo lua Satana. Cavali, wa likutilila oco olondonge viaye vi pokole Kondaka ya Suku, kuenda oku amamako oku kala omanu va kola. Catatu, wa likutilila oco olondonge viaye vi likuate omunga loku lekisa ocisola ndeci ci kasi pokati kaye la Isiaye. Ovina via tukuiwa ndeti, vi tu vetiya oku lipula ndoco: ‘Nda siata hẽ oku pokola kovina vitatu Yesu a tukula ndeti?’ Noke yoku tukula ovina viaco Yesu wa popia hati: “Oluali lu tave okuti wa numa.”—Tanga Yoano 17:15-21.

13. Kocita catete, ohutililo ya Yesu ya tambuluiwa ndati?

¹³ Poku lilongisa elivulu Liovilinga, tu pondola oku limbuka okuti, Yehova wa tambulula olohutililo via Yesu. Pokati Kakristão vo kocita catete, pa kala va Yudea, Vakualofeka, olohuasi, olohukũi, kuenda apika. Ndaño okuti pokati kavo pa kala ovisoko via litepa, pole, va likuatele omunga, kuenda upostolo Paulu wa va sokisa ndolonepa via litepa vietimba okuti, Yesu eye utue wavo. (Va Efe. 4:15, 16)Akristão vaco, va tẽla lika oku likuata omunga voluali lulo lua Satana, omo lioku kuatisiwa lespiritu sandu lia Yehova!—1 Va Kor. 3:5-7.

14. Ohutililo ya Yesu ya siata oku tambuluiwa ndati koloneke vilo?

¹⁴ Ukamba wa kala pokati Kakristão weya oku sulila noke yolofa viovapostolo. Ndomo ovitumasuku via ci popele, unanguluke weya oku li sanduila vekongelo, kuenje kua moleha atavo alua Akristão vesanda. (Ovil. 20:29, 30) Pole, ­kunyamo wo 1919, Yesu wa popela olombuavekua viaye kalongiso atavo esanda, kuenje wa vi kongela oco ‘vi likuate omunga.’ (Va Kol. 3:14) Upange wavo woku kundila olondaka viwa voluali luosi wa kuata onima yipi? Ci pitahãla olohuluwa epanduvali ‘violomeme vikuavo’ okuti, omanu va tunda ‘kolofeka viosi lo kapata osi, haivo va vangula alimi a litepa,’ va kasi oku kongeliwa kolombuavekua oco va fendele Yehova. (Yoa. 10:16; Esit. 7:9) Etambululo liohutililo Yesu a linga ku Yehova, li limbukiwila volondaka a popia hati: ‘Oluali lu limbuke okuti ove wa numa, kuenje o va sole, ndeci o ndi sole ame’!—Yoa. 17:23.

OKU MALUSULA OHUTILILO

15. Epingilo lipi lilikasi Yesu a lingila olombuavekua viaye?

¹⁵ Koñolosi yeteke 14 kosãi ya Nisana, Yesu wa lekisa esumbilo kovapostolo vaye, poku linga ocisila coku viala lavo Vusoma waye. (Luka 22:28-30; Yoa. 17:22) Yesu wa kongela vohutililo yaye vana va laikele oku linga olombuavekua viaye poku popia hati: “A Tate, njongola okuti ava wa nyiha lavovo va kala oko ñasi, ha va moli ulamba wange wa nyiha locisola cove osimbu oluali ka lua sevetiwile.” (Yoa. 17:24) Olomeme vikuavo ka vi kuetele onya olombuavekua omo lionima vi lavoka oku tambula. Uvangi waco tu u limbukila kelitokeko li kasi pokati kavo koloneke vilo.

16, 17. (a) Kesulilo liohutililo Yesu a linga, olondaka vipi a popia vi lekisa okuti wa yonguile oku amamako oku vi tẽlisa? (b) Nye tu sukila oku amamako oku linga?

¹⁶ Asongui vatavo esanda va siata oku vetiya omanu oco ka va ka tave kuvangi wokuti, Yehova o kasi oku kongela omanu oco vo kũlĩhe. Omanu vo kotembo ya Yesu va kuatavo ocituwa caco. Omo liaco, Yesu wa malusula ohutililo yaye lolondaka viokuti: ‘A Tate, ukuesunga, oluali ka lua ku kũlĩhile, ame puãi, nda ku kũlĩha, kuenje ava va kũlĩha okuti ove wa numa. Nda va lomboluila onduko yove, kuenje, lopo ndi va yi lomboluila, oco ocisola wa ndi sola laco, ci kale lavo, kuenje, ame ndi likuata omunga kumue lavo.’—Yoa. 17:25, 26.

¹⁷ Helie ka tava okuti Yesu wa siata oku linga ovina vi likuata lohutililo yaye? Omo okuti Yesu eye Utue wekongelo, o kasi oku amamako oku tu kuatisa oco tu kũlĩhe onduko ya Isiaye kuenda ocipango caye. Omo liaco, tu sukila oku pokola kokuaye poku lekisa ombili kupange woku kunda olondaka viwa Viusoma, loku longisa omanu oco va linge olondonge. (Mat. 28:19, 20; Ovil. 10:42) Tu sukilavo oku likolisilako oco tu amameko oku li kuata omunga. Nda tua lekisa epokolo, tu linga ovina vi likuata levi Yesu a tukula vohutililo yaye, oco tu sivaye onduko ya Suku lelavoko lioku kuata esanju ka li pui.