‘Sola Yehova Suku Yove’

1. Momo lie ocisola ca kala pokati ka Yesu la Isiaye ca livokiyila?

YESU KRISTU omõla a Yehova wa popia hati: ‘Ame ndi sole Isia.’ (Yoa. 14:31) Yesu wa popiavo hati: ‘Isia o sole Omõla.’ (Yoa. 5:20) Olondaka evi ka vi tu komõhisa, momo vokuenda kuanyamo alua osimbu Yesu keyile palo posi, wa kala ‘omesele’ ya Suku. (Olosap. 8:30) Vokuenda kuotembo Yesu a talavaya kumue la Isiaye Yehova, wa lilongisa ovina vialua viatiamẽla kovituwa viaye. Omo liaco, kuli esunga lieci a lekisila ocisola kokuaye. Ocili okuti, ukamba va li kuatela owo wa vokiya ocisola pokati kavo.

2. (a) Nye ca kongela voku lekisa ocisola? (b) Apulilo api tu konomuisa vocipama cilo?

² Voku sola omunu umue, mua kongela oku u kuatela ovisimĩlo viwa. Ukualosamo Daviti wa imba ocisungo hati: “A Yehova hu sole. Ove wungusu yange.” (Osa. 18:1) Tu sukilavo oku lekisa ovisimĩlo viwa viatiamẽla ku Yehova Suku, momo o tu kuetele ocisola. Nda tua pokola kokuaye, o lekisavo ocisola kokuetu. (Tanga Esinumuĩlo 7:12, 13.) Pole, tu lekisa ndati ocisola ku Yehova Suku, nda ka tu pondola oku u mola? Nye ci lomboloka oku sola Yehova? Momo lie tu sukilila oku u kuatela ocisola? Tu pondola oku lekisa ndati ocisola ku Yehova?

ESUNGA LIECI TU PONDUILA OKU SOLA SUKU

3, 4. Momo lie tu ponduila oku lekisa ocisola ku Yehova?

³ Omo okuti Yehova “Suku Espiritu,” ka tu pondola oku u mola. (Yoa. 4:24) Pole, tu pondola oku lekisa ocisola kokuaye, momo, Embimbiliya li tu vetiya oku lekisa ocisola caco. Mose wa sapuilile va Isareli hati: ‘Soli Yehova Suku yene lutima wene yosi, lomuenyo wene wosi, longusu yene yosi.’—Esin. 6:5.

⁴ Momo lie tu ponduila oku lekisa ocisola cocili ku Yehova Suku? Omo okuti wa tu lulika lonjongole yoku lilongisa ovina viatiamẽla kokuaye, tu sukila oku likolisilako oku lekisa ocisola kokuaye. Nda tua siata oku lilongisa ovina viatiamẽla ku Yehova, ocisola cetu kokuaye ci livokiya, kuenda tu kuata esanju lialua. Yesu wa popia hati: ‘Va sumũlũha vana va limbuka okuti va sukila oku kũlĩha ondaka ya Suku, momo Usoma wokilu wavo.’ (Mat. 5:3) Ulume umue o tukuiwa hati, A. C. Morrison, velivulu liaye losapi hati Man Does Not Stand Alone (Omunu ka Kasi Likaliaye), wa popia hati: “Tu sukila oku komõha loku lekisa esumbilo eci tu limbuka okuti, omanu kolonepa viosi violuali va sandiliya oku fendela Suku, kuenda oku tava kokuaye.”

5. Tua kũlĩha ndati okuti tu pondola oku sanga Yehova?

⁵ Anga hẽ oku sandiliya Yehova Suku ka ci kuete esilivilo? Ci kuete, momo Yehova o yongola okuti, tu u sanda. Upostolo Paulu wa lombolola ciwa ondaka yaco, eci a kundila ocimunga comanu vamue va kala Polusenje. Eye wa lomboluila ovina viaco vonembele yo Parthenon, ya tungiwila osuku yimue yi tukuiwa hati, Atenai okuti, noke olupale lueya oku tukuiwavo londuko yosuku yaco. Sokolola ndeci okuti, wa kala pokati komanu vaco vepuluvi Paulu a lombolola eci catiamẽla ku ‘Suku wa lulika oluali lovina viosi vi kasimo.’ Noke wa lombololavo hati, Suku ‘ka kasi vonembele ya tungiwa lovaka omanu.’ Upostolo Paulu wa amisako hati, ‘apata omanu vosi va kasi kilu lieve, va tunda kocikoti comunu umuamue, kuenje wa va tukuila ovovo lolongave violofeka viavo. Wa ci lingila oco va sande Suku lelavoko liokuti, nda vo sandiliya loku papayata, vo sanga. Momo, ka kasi ocipãla letu.’ (Ovil. 17:24-27) Ocili okuti, omanu va pondola oku sanga Yehova Suku. Ci pitahãla olohuluwa epanduvali Kolombangi Via Yehova, via siata ‘oku u sanga,’ kuenda viu kuetele ocisola cocili.

CECI CI LOMBOLOKA OKU SOLA SUKU

6. ‘Ocihandeleko cipi ca velapo, haico catete’ Yesu a tukula?

⁶ Ocisola tu kuetele Yehova ci sukila oku tunda kutima wetu. Yesu wa lombolola ciwa ondaka yaco eci umue Ufariseo o pula hati: ‘Olongisi, pokati kovihandeleko, ocihandeleko cipi ca velapo?’ Yesu wo tambulula hati: ‘Sola Yehova Suku yove lutima wove wosi, lomuenyo wove wosi, lolondunge viove viosi. Eci oco ocihandeleko ca velapo, haico catete.’—Mat. 22:34-38.

7. Nye ci lomboloka oku sola Yehova (a) ‘lutima wetu wosi’? (b) ‘Lomuenyo wetu wosi’? (c) ‘Lolondunge vietu viosi’?

⁷ Eci Yesu a tukula olondaka viokuti, tu sukila oku sola Yehova ‘lutima wetu wosi, nye a yonguile oku popia? Eye wa yonguile oku popia hati, tu sukila oku sola Yehova lutima wetu wocindekaise, oku kongelamo olonjongole vietu, kuenda ovisimĩlo vietu. Tu sukilavo oku sola Yehova ‘lomuenyo wetu wosi,’ oku kongelamo ovina viosi tu linga. Oku sola Yehova ‘lolondunge vietu viosi,’ ci lomboloka ovina tu sima, kuenda ndomo tu vi sima. Olondaka evi vi lomboloka okuti, tu sukila oku sola Yehova kovina viosi tu linga komuenyo wetu.

8. Oku sola Suku ku tu vetiya oku linga nye?

⁸ Tu lekisa okuti tu sole Yehova lutima wetu wosi, lomuenyo wetu, kuenda lolondunge vietu, eci tu lilongisa Embimbiliya olonjanja viosi, oku linga ovina a yongola, kuenda oku lekisa ombili kupange woku kunda olondaka viwa Viusoma. (Mat. 24:14; Va Rom. 12:1, 2) Ocisola cocili tu kuetele Yehova, ci tu vetiya oku kuata ukamba laye. (Tia. 4:8) Ocili okuti, ka tu pondola oku ­tukula ovina viosi vi lekisa esunga lieci tu sukilila oku sola Yehova. Pole, tu konomuisi ovina vimue viatiamẽla kondaka yaco.

ESUNGA LIECI TU SUKILILA OKU SOLA YEHOVA

9. Momo lie o kuetele ocisola Yehova?

⁹ Yehova eye Ululiki wetu, kuenda o tu ĩha ovina tu sukila. Paulu wa popia hati,: ‘Vokuaye, omo tu muila omuenyo loku lisengasenga.’ (Ovil. 17:28) Yehova wa tu ĩha ongongo yimue ya posoka, oco tu kalemo. (Osa. 115:16) Eye wa siatavo oku tu ĩha okulia, kuenda ovina vikuavo tu sukila oco vi tu kuatise komuenyo. Omo liaco, Paulu wa vangula lomanu va kala volupale luo Lustra okuti va enda oku fendela oviteka poku va sapuila hati: ‘Suku ukuamuenyo ka liwekapo oku eca olondimbukiso viu wimbila uvangi, momo wa lingainga ohenda. Wo wĩhi ombela yi tunda kilu, wo muisi ovovo elau, kuenda wa kutisa ovitima viene, momo wa ku ĩhi okulia kuenda esanju.’ (Ovil. 14:15-17) Ovina evi ka vi ku vetiya hẽ oku lekisa ocisola Kululiki wetu wa siata oku tu ĩha ovina tu sukila?—Uku. 12:1.

10. Tu kapako ndati esokiyo Yehova a linga lioku malako ekandu kuenda olofa?

¹⁰ Yehova Suku wa linga esokiyo lioku malako ekandu lolofa tua piñala ku Adama. (Va Rom. 5:12) Ocili okuti, ‘Yehova wa lekisa ocisola kokuetu, eci tua kala vakuakandu, kuenje Kristu wa tu fila.’ (Va Rom. 5:8) Omo liaco, tu kuete esanju lioku lekisa ocisola ku Yehova, momo wa linga esokiyo liokuti, nda tua likekembela akandu etu loku lekisa ekolelo kocisembi ca Yesu, tu tambula ongecelo yakandu.—Yoa. 3:16.

11, 12. Ndamupi Yehova a tu ĩha elavoko?

¹¹ Yehova ‘eca kokuetu elavoko li tu ĩha esanju lombembua.’ (Va Rom. 15:13) Elavoko liaco, li tu kuatisa oku pandikisa lekolelo poku liyaka lovitangi. Olombuavekua ‘vi pandikisa lekolelo toke kolofa, vi ka tambula ekolowa liomuenyo kilu.’ (Esit. 2:10) Omanu vakuavo va kuete elavoko lioku kala Voluali Luokaliye palo posi, nda va pandikisa, va ka tambula asumũlũho omuenyo ko pui. (Luka 23:43) Tu tenda ndati elavoko liaco? Ka tu kuete hẽ esanju, ombembua, kuenda ocisola omo Suku a tu ĩha ‘ovina viosi viwa lombanjaile ya lipua’?—Tia. 1:17.

¹² Suku wa tu ĩha elavoko liepinduko li tu sanjuisa. (Ovil. 24:15) Ocili okuti, tu sumua nda umue ukuepata lietu o fa, pole, esumuo liaco ka li sokisiwa leli ‘liomanu vana ka va kuete elavoko.’ (1 Va Tes. 4:13) Omo liocisola Yehova Suku a kuete, o ka pindula omanu va fa, ca piãla enene afendeli vaye va enda oku u lingila upange ndeci Yovi ukuesunga a linga. (Yovi 14:15) Sokolola esanju omanu va ka kuata poku li sanga lomanu vana va ka pinduiwa palo posi. Tu vetiyiwa oku kuatela ocisola Isietu wo kilu, omo a tu ĩha elavoko li komõhisa liepinduko!

13. Uvangi upi tu kuete u lekisa okuti Yehova wa siata oku tu tata ciwa?

¹³ Yehova wa siata oku tu tata ciwa. (Tanga Osamo 34:6, 18, 19; 1 Petulu 5:6, 7.) Omo lioku kũlĩha okuti Yehova wa siata oku kuatisa afendeli vana va kolela kokuaye, tua kolapo, momo, ‘tulomeme viusenge waye.’ (Osa. 79:13) Handi vali ocisola Yehova a tu kuetele tu ka ci limbukila kovina a ka tu lingila lekuatiso Liusoma wa Mesiya. Omo okuti Yesu Kristu eye soma wa nõliwa, o ka malako ungangala u kasi voluali, ohali, kuenda ovitangi vikuavo. Noke, omanu vakuepokolo va ka kuata asumũlũho alua kuenda ombembua. (Osa. 72:7, 12-14, 16) Ku tava hẽ okuti, elavoko liaco li tu ĩha epuluvi lioku kuatela ocisola Yehova lutima wetu wosi, lomuenyo wetu wosi longusu yetu yosi, kuenda lolondunge vietu viosi?—Luka 10:27.

14. Esumũlũho lipi Yehova a tu ĩha?

¹⁴ Yehova wa tu ĩha esumũlũho lioku kala Olombangi viaye. (Isa. 43:10-12) Tu kuetele ocisola Yehova omo a tu ĩha epuluvi lioku kuatisa kupange woku kemãlisa unene waye, kuenda oku eca elavoko komanu va kasi ­voluali lulo lua vĩha. Handi vali, tu pondola oku vangula lekolelo, momo, tu kasi oku kunda olondaka viwa vi sangiwa Vembimbiliya okuti, olohuminyo viaco vi ka tẽlisiwa. (Tanga Yehosua 21:45; 23:14.) Ocili okuti, asumũlũho tu ka tambula kuenda esunga lieci tu sukilila oku lekisa ocisola ku Yehova, ka a sulila. Pole, tu lekisa ndati ocisola kokuaye?

NDOMO TU PONDOLA OKU LEKISA OCISOLA KU SUKU

15. Oku lilongisa ondaka ya Yehova loku kapako ovina tu lilongisa ci tu kuatisa ndati?

¹⁵ Tu lekisi ombili kelilongiso Liondaka ya Yehova Suku, kuenda oku yi kapako. Nda tua ci linga, tu lekisa okuti, tu sole Yehova, kuenda tu yongola okuti, ondaka yaye yi linga ‘ocinyi conjila yetu.’ (Osa. 119:105) Nda tu kasi oku liyaka lovitangi, tu pondola oku tambula elembeleko liolondaka Viukualosamo wa popia hati: ‘A Yehova, ove ku yanduluka utima wa teka, haiwo wa samba. Ocisola cove ka ci pui, a Yehova, ca njakela. Eci atatahãi a nduila vutima, oku lemba kuove okuo ku ñolisa.’ (Osa. 51:17; 94:18, 19) Yehova o lekisa ohenda komanu vana va tala ohali, kuenda Yesu wa siatavo oku kuama ongangu yaco. (Isa. 49:13; Mat. 15:32) Eci tu tanga Embimbiliya, tu pondola oku lilongisa ovina viatiamẽla kocisola Yehova a tu kuetele. Nda tua ci linga, ocisola tu u kuetele ci livokiya.

16. Oku likutilila olonjanja viosi ci vokiya ndati ocisola tu kuetele Yehova Suku?

¹⁶ Tu likutilili ku Yehova Suku olonjanja viosi. Olohutililo vietu vi tu kuatisa oku kuata ukamba la Yehova ‘ukuakuyeva olohutililo.’ (Osa. 65:2) Eci tu limbuka okuti Suku wa siata oku tambulula olohutililo vietu, ocisola tu u kuetele ci livokiya. Pamue tua siata oku limbuka ovolandu a lekisa okuti, Yehova ka ecelela okuti, tu setekiwa lovina ka tu tẽla oku pandikisa lavio. (1 Va Kor. 10:13) Nda tu kuete ovitangi, ohutililo tu linga ku Yehova, yi tu kuatisa oku kuata ‘ombembua yi tunda kokuaye.’ (Va Fil. 4:6, 7) Pamue tu pondola oku linga ohutililo yimue kutima, ndeci Nehemiya a linga, kuenje tu limbuka okuti, yi kasi oku tambuluiwa. (Neh. 2:1-6) Osimbu tu ‘pandikisa loku likutilila,’ loku limbuka okuti, Yehova o tambulula olohutililo vietu, ocisola cetu kokuaye ci livokiya, kuenje, tu kolela okuti, o pondola oku tu kuatisa poku liyaka lovitangi vi kapa voseteko ekolelo lietu.—Va Rom. 12:12.

17. Nda tu sole Yehova, tu tenda ndati ocituwa coku endaenda kolohongele?

¹⁷ Kuata ocituwa coku endaenda kolohongele viekongelo, vimbo, vilikasi, kuenda viofeka. (Va Hev. 10:24, 25) Va Isareli va enda oku liongolola locimãho coku yevelela ovina viatiamẽla ku Yehova loku lilongisa, oco vi va kuatise oku lekise esumbilo kokuaye, kuenda oku pokola Kocihandeleko caye. (Esin. 31:12) Nda tu kuetele ocisola Yehova tu limbuka okuti, oku linga ocipango caye ka ci lemi. (Tanga 1 Yoano 5:3.) Omo liaco, ka tu ka eceleli okuti, ovina vimue vi tu tateka oku endaenda kolohongele olonjanja viosi. Momo, ka tu yongola okuti, ocisola tua lekisile tete ku Yehova ci tepuluka.—Esit. 2:4.

18. Ocisola tu kuetele Yehova ci tu vetiya oku linga nye catiamẽla kolondaka viwa?

¹⁸ Lekisa ombili yoku kundila omanu ‘ocili colondaka viwa.’ (Va Gal. 2:5) Ocisola tu kuetele Yehova Suku, ci tu vetiya oku kundila omanu ovina viatiamẽla Kusoma wa Mesiya Omõlaye o soliwe, una o ka “teyuila ocili” vuyaki wo Harmagedo. (Osa. 45:4; Esit. 16:14, 16) Tu kuete esanju lialua omo lioku panga onepa kupange woku kuatisa omanu oku lilongisa ovina viatiamẽla kocisola ca Yehova, kuenda kolohuminyo viaye voluali luokaliye!—Mat. 28:19, 20.

19. Momo lie tu sukilila oku sanjukila eliangiliyo lia Yehova lioku nõla angombo oco va lise ocunda caye?

¹⁹ Sanjukila eliangiliyo lia Yehova Suku lioku nõla angombo oco va lise ocunda caye. (Ovil. 20:28) Yehova wa linga esokiyo liokuti, ku kala akulu vekongelo va tu lingila ovina vi tu kuatisa. Akulu vekongelo va kasi “ndocivundilo coku tila ofela pamue ndocipundo coku tila ombela. Va soka ndolondui viovava vekango, pamue ndulembo wewe linene vofeka yekavo.” (Isa. 32:1, 2) Tu sanjuka calua nda tu sanga onjo yimue yi tu teyuila kehunguhungu liofela, ale kombela yalua! Tu sanjukavo nda eci utanya u tua tu sanga ocitumãlo cimue ci kuete ulembo u tu teyuila kolosongo viekumbi. Cimuamue haico akulu vekongelo va siata oku linga okuti, va tu kuatisa, kuenda va tu vetiya eci tu sukila ekuatiso, oco tu amameko oku vumba Yehova, ndaño lovitangi. Nda tu pokola ku vamanji va kuete ocikele coku tu songuila, tu lekisa okuti tua kapako ‘olongavelo viomanu,’ kuenda tu kuetele ocisola Yehova kuenda Kristu utue wekongelo.—Va Efe. 4:8; 5:23; Va Hev. 13:17.

AMAMAKO OKU PAMISA OCISOLA COVE KU SUKU

20. Nda o kuetele ocisola Yehova Suku, o kapako ndati olondaka vielivulu lia Tiago 1:22-25?

²⁰ Nda wa kuata ukamba wocili la Yehova, ‘o linga ukuakupokola kondaka okuti, ku kala lika ukuakuyeva.’ (Tanga Tiago 1:22-25.) Omunu ‘ukuakupokola,’ o kuete ekolelo liu kuatisa oku lekisa ombili kupange woku kunda, kuenda oku endaenda kolohongele. Ocisola o kuetele Yehova, ci ku vetiya oku pokola ‘kocihandeleko caye ca lipua’ okuti, mua kongela oku linga ovina viosi a yongola oco o vi tẽlise.—Osa. 19:7-11.

21. Olohutililo o linga lutima wosi vi sokisiwa la nye?

²¹ Ocisola o kuetele Yehova Suku, ci ku vetiya oku likutilila kokuaye lutima wosi. Ukualosamo Daviti poku popia eci catiamẽla koku timĩha insensu eteke leteke ndomo ca lekisiwile Vocihandeleko, wa imba ocisungo hati: “Ohutililo yange [ku Yehova], yi linge ndinsensu. Oku tulika kuovaka ange ku linge ndocilumba coñolosi.” (Osa. 141:2; Etu. 30:7, 8) Olohutililo o linga lumbombe, apingilo ove, olondaka vioku sivaya Yehova vi tunda kutima wove, kuenda olopandu eca kokuaye, vi kale ndisensu vielemba liwa vina vi lomboloka olohutililo vi taviwa laye.—Esit. 5:8.

22. Nye tu ka konomuisa vocipama ci kuãimo?

²² Yesu wa popia hati, tu sukila oku sola Suku kuenda omanu tu lisungue lavo. (Mat. 22:37-39) Ocisola tu kuetele Yehova kuenda olonumbi viaye, ci tu kuatisa oku lekisa ocisola komanu tu lisungue lavo. Vocipama ci kuãimo, tu ka konomuisa elomboloko liondaka yaco.