APULILO EMBIMBILIYA A TAMBULUIWA
Anga hẽ atavo osi a sumbila Suku?
Poku yevelela a sapulo oluali, pamue wa limbuka okuti ovina vialua vĩvi vi lingiwa vonduko yetavo. Atavo hasiko a tunda ku Suku yocili. (Mateo 7:15) Omo liaco, omanu valua va siata oku yapuisiwa.—Tanga Yoano 5:19.
Yehova wa kũlĩha omanu vakuacili vana va sole eci ciwa haivo va sandiliya ocili catiamẽla kokuaye. (Yoano 4:23) Eye o kasi oku laleka omanu vaco oco va lilongise ocili ci sangiwa Vondaka yaye, Embimbiliya.—Tanga 1 Timoteo 2:3-5.
Ove o pondola ndati oku limbuka etavo liocili?
Yehova Suku o kasi oku kongela omanu va tunda katavo osi poku va longisa ocili Condaka yaye kuenda oku lisola pokati. (Mika 4:2, 3) Omo liaco, ove o pondola oku limbuka vakuetavo liocili poku kũlĩhĩsa ndomo va likapako.—Tanga Yoano 13:35.
Yehova Suku o kasi oku kongela omanu vosi lekuatiso liefendelo liocili.—Osamo 133:1
Afendeli vocili va kunamisila ekolelo liavo lekalo liomuenyo wavo Kembimbiliya. (2 Timoteo 3:16) Ovo va sumbilavo onduko ya Suku. (Osamo 83:18) Handi vali, va kolela okuti Usoma wa Suku owo lika u ka mãlako ovitangi viomanu. (Daniele 2:44) Ovo va kuãi ongangu ya Yesu poku tuisa “ocinyi cavo,” poku kundila olondaka viwa omanu va lisungue lavo. (Mateo 5:16) Akristão vocili va limbukiwavo poku nyula kuavo omanu posongo locimãho coku kundila olondaka viwa Viusoama wa Suku.—Tanga Mateo 24:14; Ovilinga 5:42; 20:20.