Longisa Londaka ya Suku Momo yi Kasi Lomuenyo!

1, 2. Ocikele cipi Yehova a ecele ku Mose, kuenda nye o likuminyile?

O PONDOLA oku sokolola ndomo o kala, nda wa nõliwile oku sapela lombiali yimue ya velapo voluali lulo oco o teyuile afendeli va Yehova? Citava okuti, nda wa yeva esakalalo, loku sima okuti ku tẽla oku ci linga, kuenda nda wa kuata usumba. Nda wa li pongiya ndati? Omo okuti u numiwa ya Suku ukuonene wa velapo, nye wa sukilile oku linga oco o kuate utõi poku vangula?

² Mose wa kuatavo ocitangi caco. Yehova wa tukula Mose hati, “ulume womboka cimue, omanu vosi kilu lieve va sule,” kuenda wo sapuila hati, wa tumiwa ku Fareo oco a popele afendeli vaye kupika wo Kegito. (Ate. 12:3) Ndomo ovolandu aco a lekisiwa, Fareo wa kala ulume umue ka kuatele esumbilo, haeye ukuepela. (Etu. 5:1, 2) Pole, Yehova wa yonguile okuti, Mose o sapela la Fareo, oco a ecelele omanu valua va kala kupita oku tunda vofeka yaco! Omo liaco, Mose wa pula Yehova hati: “Ame hẽ elie okuti ngenda ku Fareo si kopa va Isareli ve Egito?” Mose wa simĩle okuti, ka pondola oku tẽlisa ocikele caco. Pole, Yehova wo likuminyile hati, wa laikele oku u kuatisa. Kuenje, wo sapuila hati: “Ame ñala love.”—Etu. 3:9-12.

3, 4. (a) Mose wa kuata usumba wa nye? (b) Momo lie pamue o kuatela ovisimĩlo ndevi via Mose?

³ Momo lie Mose a kuatela usumba? Eye wa kuata usumba, momo wa simĩle okuti, Fareo ka ka tava okuti, wa kala onumiwa ya Yehova Suku. Mose wa kuatelevo usumba omo lioku sima okuti, omanu ka va laikele oku tava okuti, eye wa nõliwa oco a va songuile poku tunda vofeka Yegito. Omo liaco, Mose wa sapuila Yehova hati: “Ndi ci ale okuti ka va nava, ka va yevi kondaka yange; momo va popia vati: ‘Yehova ka tukulukile kokuove.’”—Etu. 3:15-18; 4:1.

⁴ Etambululo Yehova a eca ku Mose, kuenda ovolandu eya oku kuamamo, a tu longisa ovina vialua viatiamẽla kunene waye. Citava okuti lalimue eteke wa endele oku ka sapela lomunu umue o kasi pomangu ya velapo yombiali yimue yofeka. Ove hẽ wa kuatele ocitangi coku sapela lomanu wa siata oku li sanga lavo eteke leteke poku va lomboluiwa ovina viatiamẽla ku Suku, kuenda Kusoma waye? Nda wa pitile locitangi caco, konomuisa ulandu Mose a pita lawo.

“NYE ... O KASI LACO PEKA LIOVE”

5. Nye Yehova a kapele peka lia Mose, kuenda co kuatisa ndati oku kuata utõi? (Tala elitalatu kefetikilo liocipama cilo.)

⁵ Eci Mose a sapuila Yehova hati, wa kuata usumba omo lioku sima okuti, omanu ka va ka tava kokuaye, Yehova wo kuatisa oco a kuate utõi woku yula ovitangi a laikele oku liyaka lavio. Ulandu u sangiwa kelivulu Lietundilo u popia hati: “Yehova [wa pula Mose] hati, ‘Nye ... o kasi laco peka liove?’ Eye hati, ‘ombueti.’ Yehova wo sapuila hati: ‘Yimba posi.’ Mose wa yimba posi kuenje ya linga onyõha. Mose wa yi tila. Puãi Yehova wa popia la Mose hati: ‘Olõla eka liove, yi kuata kucĩla.’ Mose wolõla eka, wa yi kuata, kuenje ya lingila ombueti peka liaye; oco va tave okuti Yehova, ... wa ku tukulukila.’” (Etu. 4:2-5) Lekuatiso liunene wa Yehova Suku, ombueti ya kala peka lia Mose, ya pongoloka onyoha, kuenje ya eca uvangi wokuti, Mose wa kala omunga ya Yehova. Ombueti omanu va simĩle okuti ka yi kuete esilivilo, lekuatiso liunene wa Suku, ya linga ocina cimue ci kuete omuenyo! Ocikomo caco, ca eca uvangi wokuti, olondaka Mose a popia, vi lekisa okuti, wa kuatisiwa la Yehova! Omo liaco, Yehova wo sapuila hati: “Ove wambata peka ombueti kuenje o linga layo olondimbukiso.” (Etu. 4:17) Ombueti Yehova a ecele ku Mose, yo kuatisa oku kuata utõi woku sapela lafendeli va Yehova, kuenda la Fareo.—Etu. 4:29-31; 7:8-13.

6. (a) Nye tu pondola oku kuata peka lietu, eci tu enda kupange woku kunda, kuenda momo lie? (b) Lombolola ndomo “ondaka ya Suku yi kasi lomuenyo,” kuenda ndomo “yi kuete unene.”

⁶ Citava okuti eci tu kundila omanu esapulo Liembimbiliya, va tu pulisavo ndoco: “Nye ... o kasi laco peka liove?” Ocili okuti, Embimbiliya li pondola oku kala peka lietu, momo olio ocimãleho ci tu kuatisa poku longisa omanu. Ndaño omanu vamue va sima lika okuti Embimbiliya elivulu limue liwa, pole, Yehova o sapela letu lekuatiso lielivulu liaco. (2 Pet. 1:21) Vembimbiliya mu sangiwa olohuminyo via Yehova Suku, viatiamẽla kovina vi ka lingiwa vemehi Liusoma waye. Eli olio esunga lieci upostolo Paulu a sonehela ndoco: “Ondaka ya Suku yi kasi lomuenyo, kuenda yi kuete unene.” (Tanga Va Heveru 4:12.) Ondaka ya Suku yi kasi ndati lomuenyo? Yi kasi lomuenyo momo, tu lete ovina Yehova a siata oku linga, kuenda olohuminyo viaye viosi vi ka tẽlisiwa kovaso yoloneke. (Isa. 46:10; 55:11) Eci omunu a kuata elomboloko Liondaka ya Yehova, ovina viosi a lilongisa Vembimbiliya, vi pongolola ekalo liomuenyo waye.

7. Tu pondola oku ‘likolisilako ndati oku talavaya ciwa londaka yocili’?

⁷ Yehova wa kapa peka lietu Embimbiliya li eca uvangi wokuti, esapulo tu kundila omanu li tunda kokuaye. Eli olio esunga lieci Paulu noke yoku sonehela va Heveru a vetiyila Timoteo, oco a ‘likolisileko oku talavaya ciwa londaka yocili.’ (2 Tim. 2:15) Tu pondola ndati oku pokola kelungulo lia Paulu? Tu ci linga poku tanga lolukandi ovinimbu vimue Viembimbiliya tua nõla, oco vi vetiye ovitima viomanu vana va ka tu yevelela. Otuikanda tua sandekiwa kunyamo wo 2013, tua pongiyiwila oku tu kuatisa kupange woku kunda.

TANGA OCINIMBU CEMBIMBILIYA WA NÕLA!

8. Nye manji umue mitavaso yupange woku kunda a popia catiamẽla kotuikanda?

⁸ Otuikanda tuosi tuo kaliye tua lisoka. Nda tua lilongisa ndomo tu kundila omanu lokokanda kamosi, ci tu kuatisa oku va kundila lotuikanda tuaco tuosi. Anga hẽ ca leluka oku ci linga? Manji umue mitavaso yupange woku kunda, wo kofeka yo Estados Unidos volupale luo Havaí, wa soneha ndoco: “Vamue pokati ketu, ka va limbukile ndomo otuikanda tuaco tu pondola oku va kuatisa poku kundila konjo lanjo, kuenda volokololo.” Eye wa limbuka okuti, otuikanda tuaco, tua sonehiwa lonjila yimue okuti, tu vetiya omanu oku lekisa onjongole, kuenda oku sapela lavo. Eye o sima okuti, va siata oku ci linga omo liepulilo li kasi kemẽla liatete, kuenda atambululo omunu a pondola oku nõla. Omunu tu sapela laye, ka sukila oku sakalala nda wa eca etambulo ka lia sungulukile.

9, 10. (a) Otuikanda tuetu tu pondola oku tu kuatisa ndati oku longisa Lembimbiliya? (b) Pokati kotuikanda tuaco, okokanda kapi ka siata oku ku kuatisa oku kuata onima kupange woku kunda, kuenda momo lie?

⁹ Okokanda lokokanda, ka kuete ocinimbu cimue Cembimbiliya ca nõliwa tu pondola oku tangela omunu tu sanga. Tala okokanda losapi hati: Anga hẽ ohali yi ka pua? Ndaño tua sanga omunu o tambulula hati, “yi ka puako,” “ka yi ka puako,” ale “pamue yi ka puako,” yulula kemẽla likuavo liokokanda kaco ku popia hati: “Ceci Embimbiliya li Popia.” Noke, tanga Esituluilo 21:3, 4.

¹⁰ Nda o kasi oku kundila omanu lokokanda losapi hati: O tenda ndati Embimbiliya?, citava okuti, omunu o sapela laye o nõla limue pokati katosi atatu a sangiwa kemẽla liatete liokokanda kaco. Pole, yulula kemẽla liavali, kuenda popia ndoco: “Embimbiliya li popia hati, ‘Ovisonehua viosi via tunda ku Suku.’” Noke, amisako ndoco: “Ocinimbu eci, ci kuete elomboloko lialua.” Kuenje, yulula Embimbiliya liove, kuenda tanga 2 Timoteo 3:16, 17.

11, 12. (a) O pondola oku kuatisiwa ndati lotuikanda kupange woku kunda oco o kuate esanju? (b) Otuikanda tu pondola oku ku kuatisa ndati oku lipongiya oco o linge apasu?

¹¹ Ocituwa omunu tu kundila a lekisa, oco ci tu kuatisa oku limbuka nda tua amamako oku sapela laye catiamẽla kondaka yaco. Nda wa eca komanu otuikanda, o kuata esanju, poku va tangela ovinimbu vimue Viembimbiliya ale cimosi kepasu liatete. Noke, o pondola oku amamako lombangulo yaco.

¹² Kemẽla lia sulako liotuikanda tuaco, kuli osapi yokuti, “Sokolola Epulilo Eli,” kuenda ovinimbu Viembimbiliya o pondola oku tanga poku linga epasu. Okokanda losapi hati,“O Tenda ndati oloneke vi keya kovaso?,” ka kuete epulilo li tu kuatisa oku linga epasu. Epulilo liaco lieli: “Suku o ka pongolola ndati oluali lulo oco mu kale ekalo liwa?” Vokokanda kaco, mu sangiwa elivulu lia Mateo 6:9, 10, kuenda Daniele 2:44. Okokanda losapi hati: Omanu va fa va pondola oku kuata vali omuenyo?, ka kuete epulilo liokuti: “Momo lie tu kukila kuenda tu fila?” Vokokanda kaco, mu sangiwa elivulu Liefetikilo 3:17-19, kuenda Va Roma 5:12.

13. Lombolola ndomo otuikanda tu pondola oku tu kuatisa oku fetika oku longisa Embimbiliya komanu.

¹³ Kupange woku kunda, kuatisiwa lotuikanda oco o fetike oku longisa Embimbiliya komanu. Nda omunu wa konomuisa onumbi yo QR yi sangiwa kemẽla lia sulako liokokanda, yu kuatisa oku iñila vo Internet, kuenje, o vetiyiwa oku lilongisa Embimbiliya. Otuikanda tuaco, tu tukulavo ombrochura losapi hati: Olondaka Viwa vi Tunda ku Suku! okuti, yi lekisa ocipama cimue ci likuata letosi wa sapela lomunu umue. Okokanda losapi hati: Helie o kasi oku viala oluali?, ka kuatisa omunu oku tanga ocipama 5, vombrochura yaco. Okokanda losapi hati, Nye ci kuatisa epata oku kuata esanju?, ka kuatisa omunu oku tanga ocipama 9. Nda tuambata otuikanda kupange woku kunda, ci tu kuatisa oku tangela Embimbiliya komunu tua sanga onjanja yatete, kuenda oku linga apasu. Nda tua ci linga, ci tu kuatisa oku longisa Embimbiliya komanu valua. Nye o pondola oku linga oco o kuate onima yiwa poku longisa Londaka ya Suku kupange woku kunda?

VANGULA OVINA OMANU VA PONDOLA OKU SOKOLOLA

14, 15. O pondola oku kuama ndati ongangu Paulu a lekisa kupange woku kunda?

¹⁴ Paulu wa kuatele onjongole yoku ‘nganyala omanu va lua’ kupange woku kunda. (Tanga 1 Va Korindo 9:19-23.) Ivaluka okuti, Paulu wa kuatele elavoko lioku “nganyala va Yudea, ... vakuavihandeleko, ... ava ka va kolela ovihandeleko, ... [kuenda] Ava va leñela.” Eye, wa yonguile oku kundila ‘omanu vosi, oco a popele vamue.’ (Ovil. 20:21) Tu pondola oku kuama ndati ongangu ya Paulu oco tu kundile “omanu vosi” va sangiwa vocikanjo cetu?—1 Tim. 2:3, 4.

¹⁵ Osãi losãi, Vupange Wetu Wusoma mua siata oku sandekiwa olonumbi vi tu kuatisa oku linga ovindekaise. Seteka oku vi linga. Pole, nda ovindekaise viaco ka vi kuatisa omanu va kasi vocikanjo cove, linga ovindekaise vikuavo vi kuatisa omanu o sanga kupange woku kunda. Sokolola ekalo lio vimbo o kasi, ekalo liomanu vaco, kuenda ovina via siata oku va kokela asakalalo. Noke, sokololavo ocinimbu cimue Cembimbiliya ci pondola oku va kuatisa. Manji umue ukuakunyula akongelo wa tukula onjila a siata oku kuama kumue lukãi waye, poku kundila omanu lekuatiso Liembimbiliya poku popia hati: “Omanu valua va ka tava oku va tangela ocinimbu cimue Cembimbiliya, nda tu teta onimbu poku sapela lavo etosi tua nõla. Noke yoku lama omunu Lembimbiliya lietu peka, tu tanga laye ocinimbu cimue.” Povinimbu vi kuãimo, sapela laye olosapi vimue, apulilo, kuenda ovinimbu Viembimbiliya o pondola oku tangela omanu vocikanjo cove.

16. Lombolola ndomo o pondola oku kuatisiwa lelivulu lia Isaya 14:7, kupange woku kunda.

¹⁶ Nda o kasi vimbo limue okuti ka muli ombembua, o pondola oku pula komunu wa sanga ndoco: “O tava hẽ okuti kovaso yoloneke omanu va ka yeva esapulo lieteke leteke li popia hati: ‘Oluali luosi lua puyuka, kuenje lua talala; [kuenda omanu va ka] imba ovisungo’? Olondaka evi vi sangiwa kelivulu lia Isaya 14:7. Embimbiliya li kuete olohuminyo vialua via Suku viatiamẽla kombembua tu ka kuata kovaso yoloneke.” Noke, tanga yimue pokati kolohuminyo viaco Vembimbiliya.

17. O pondola oku fetika ndati ombangulo lekuatiso lielivulu lia Mateo 5:3?

¹⁷ Anga hẽ vimbo o kasi ka ca lelukile komanu valua oku sanga okulia kuoku tekula epata? Nda ka ca lelukile, o pondola oku fetika ombangulo poku pula ndoco: “Ciñami omunu a sukila oku nganyala oco epata liaye li kuate esanju?” Eci omunu a eca etambululo, o pondola oku popia ndoco: “Kuli omanu va nganyala olombongo vialua okuti, evi wa tukula ndeti vi sule, pole, epata liavo ka li kuete esanju. Nye va sukila?” Noke tanga laye Mateo 5:3, kuenda u laleka oco o fetike oku u longisa Embimbiliya.

18. Oco o lembeleke omanu, o pondola oku va kuatisa ndati lelivulu lia Yeremiya 29:11?

¹⁸ Anga hẽ omanu va tunga vimbo liene va kasi oku liyaka locitangi covilunga via pita ndopo? O pondola oku fetika ombangulo yove poku popia ndoco: “Ndeya kulo konjo yove, oco ndu ku sapuile ondaka yimue yelembeleko. (Tanga Yeremiya 29:11.) Wa limbuka hẽ ovina vitatu Suku a yongola okuti tu vi kuata? Eye o yongola okuti, tu kuata ‘ombembua,’ ‘elavoko,’ kuenda ‘ovina vi keya kovaso yoloneke.’ Ovina via tukuiwa ndeti ka vi lekisa hẽ okuti, Yehova o yongola okuti, tu kuata ekalo liwa komuenyo? Pole, otembo yipi ci ka lingiwa?” Noke, lekisa komunu waco ocipama ci sangiwa vombrochura Olondaka Viwa okuti, ci likuata lovina wa sapeli.

19. Lombolola ndomo elivulu Liesituluilo 14:6, 7, li pondola oku ku kuatisa poku kundila omanu vakuetavo.

¹⁹ O kasi hẽ vimbo limue okuti omanu vaco va lekisa onjongole ketavo? Nda va lekisa onjongole, o pondola oku fetika ombangulo poku pula ndoco: “Nda ungelo umue o yongola oku sapela love, o tava hẽ oku yevelela ovina a ku sapuila? (Tanga Esituluilo 14:6, 7.) Omo okuti ungelo waco wa popia hati ‘sumbili Suku,’ ku sukila hẽ oku kũlĩha Suku yaco a tukula? Ungelo o tu sapuila ovina viatiamẽla ku ‘una wa lulika ilu longongo.’ Helie ululiki waco?” Noke, tanga Osamo 124:8, yi popia ndoco: “[Ekuatiso lietu li] kasi vonduko ya Yehova, U wa lulika ilu longongo.” Noke, lombolola ovina vikuavo viatiamẽla ku Yehova Suku.

20. (a) Tu pondola oku kuatisiwa ndati lelivulu Liolosapo 30:4, poku longisa omunu umue onduko ya Suku? (b) Ocinimbu cipi Cembimbiliya wa siata oku tangela omanu kupange woku kunda oco o kuate onima yiwa?

²⁰ O pondola oku fetika ombangulo lumalẽhe umue poku popia ndoco: “Ndi yongola oku tanga ocinimbu cimue Cembimbiliya mu sangiwa epulilo limue li kuete esilivilo lia velapo. (Tanga Olosapo 30:4.) Ka kuli omunu la umue o tiamisiwila kolondaka via tukuiwa vocinimbu eci, pole, vi tiamisiwila lika Kululiki wetu.a Tu pondola oku kuata ndati elomboloko lionduko yaye? Ndi yongola oku ku lekisa elomboloko liaco Vembimbiliya.”

ECELELA OKUTI ONDAKA YA SUKU YI KU KUATISA KUPANGE WOKU KUNDA

21, 22. (a) Ocinimbu Cembimbiliya wa nõla, ci pondola oku pongolola ndati omuenyo womunu umue? (b) Nye wa nõlapo oku linga kupange woku kunda?

²¹ Kua kũlĩhĩle ndomo omanu va ka tenda ocinimbu Cembimbiliya wa nõla oco o tange lavo. Onjanja yimue, vamanji vavali kofeka yo Australia, va totola kepito liufeko umue. Noke umue pokati kavo wo pulisa ndoco: “Ove hẽ wa kũlĩha onduko ya Suku?” Kuenje, wa tanga laye Embimbiliya kelivulu Liosamo 83:18. Noke, ufeko waco wa popia hati: “Nda komõha calua! Eci vamanji va tiukila, nda linga ungende weci ci soka 56 kolokilometulu toke vonjo yoku seleka alivulu, oco ndi konomuise onduko yaco Vambimbiliya akuavo. Noke, nda sandiliyavo onduko yaco vondisionaliu yimue. Eci nda limbuka okuti onduko ya Suku yi tukuiwa hati, Yehova, nda li pula nda kuli vali ovina vikuavo sia kũlĩhĩle.” Ka pa pitile otembo yalua, eye kumue lukuenje waye, va fetika oku lilongisa Embimbiliya, noke liotembo yimue, va papatisiwa.

²² Embimbiliya li pongolola omuenyo womanu vana va li tanga, kuenda va lekisa ekolelo kolohuminyo via Yehova. (Tanga 1 Va Tesalonike 2:13.) Esapulo Liembimbiliya li kuete unene walua okuti, ka li sokisiwa lovina tu pondola oku popia, oco tu vetiye utima womunu umue. Omo liaco, kupange woku kunda, tu sukila oku longisa Lembimbiliya olonjanja viosi. Momo, li kasi lomuenyo!