Esokiyo Lioku Eca Otuikanda Tuo Kaliye!
1. Ovimalẽho vipi viokaliye via sokiyiwa oco vi tu kuatise kupange woku kunda?
1 Kohongele yofeka yunyamo wo 2013, losapi hati: “Ondaka ya Suku oyo Ocili,!” kua sandekiwa otuikanda tutãlo. Esapulo Liusoma No.38, losapi hati: “Omanu va fa va Pondola Oku Kuata Vali Omuenyo?” lia vokiyiwa kotuikanda tuaco. Otuikanda tuaco tua soka epandu, tua tiamẽlavo kesokiyo liaco liokaliye. Momo lie kua lingiwila esokiyo liaco liokaliye? Poku eca otuikanda tuaco kupange woku kundila omanu konjo lanjo, tu pondola ndati oku talavaya latuo ciwa?
2. Esokiyo liokaliye lia lingiwa li kuete ocimaho cipi?
2 Momo Lie Kua Lingiwila Esokiyo Liokaliye? Voku fetika ombangulo yoku kundila konjo lanjo, mua kongela atosi akuãla: (1) Oku linga epulilo lioku fetika ombangulo. (2) Oku tiamisila ombangulo yaco Kembimbiliya. (3) Oku eca elivulu komunu tua sanga oco a li tange. (4) Osimbu kua tundile, linga epulilo limue oco o li tambulule keteke likuavo, kuenda linga esokiyo lioku tiukila konjo yaye onjanja yikuavo. Esokiyo lioku eca otuikanda tuo kaliye li ka tu kuatisa oku kuama atosi akuãla a tukuiwa ndeti.
3. Tu pondola ndati oku eca otuikanda tuokaliye kupange woku kunda?
3 Ndomo tu Talavaya Lotuikanda: (1) Noke yoku lama, lekisa komunu wa sanga apulilo a sangiwa koñoño yokokanda, ecelela okuti o nõla epulilo limue kuenda, u pulisa ocisimĩlo caye catimẽla kapulilo aco. (2) Yikula okokanda kaco, kuenda kulĩhĩsa osapi ya linga hati: “Ceci Embimbiliya li Popia.” Tanga ocinimbu cimue ci sangiwa Vembimbiliya, nda citava. Nda omunu wa sanga o kuete otembo, sapela laye osapi ya linga hati: “Ceci Ohuminyo Eyi Yi Lomboloka Kokuove.”(3) Eca okokanda kaco, kuenda vetiya omunu wa sanga oco a tange otuikanda tukuavo. (4) Osimbu kua tundile konjo yaye lekisa kokuaye epulilo li sangiwa kovaso yo kokanda kaco losapi hati: “Sokolola Epulilo Eli,” kuenda linga esokiyo oco u konomuisili kumosi etambululo liaco Vembimbiliya onjanja yikuavo.
4. Tu pondola ndati oku talavaya lotuikanda tuo kaliye poku nyula omanu tua kundila?
4 Caleluka oku nyula omanu vana tua kundila. Poku ci linga, kuama ocinimbu Cembimbiliya ci sangiwa kovaso yokokanda kaco, oco o tambulule epulilo wa lingile poku u kundila onjanja yatete. Osimbu kua tundile, lekisa kokuaye elitalatu liombrochura losapi hati, Olondaka Viwa, noke lekisavo kokuaye ombrochura yaco loku nõla ocipama cimue ci lombolola ulandu wa sapeli, kuenda eca ombrochura yaco kokuaye. Nda omunu waco wa tava oku siala lombrochura yaco, linga eliangiliyo lioku sapela catiamẽla kombrochura yaco onjanja yikuavo. O pondola oku fetika oku longisa Embimbiliya komunu waco! Ale nda okuti kua ecele kokuaye ombrochura, o pondola oku eca okokanda kakuavo, kuenda, oku linga eliangiliyo lioku sapela laye catiamẽla kokokanda kaco onjanja yikuavo.
5. Otuikanda tu kuete esilivilo lie kupange woku kundila omanu?
5 Tua siata oku talavaya lotuikanda tuaco kupange woku kunda vokuenda kueci ci pitahãla 130 kanyamo. Ndaño okuti, otuikanda tuaco tua pangiwa lonjila yimue ya litepa, pole, tua siata oku tu kuatisa kupange woku kundila omanu. Omo liaco, tu pondola oku kuama lutate esokiyo liokaliye lia lingiwa, oco tu amameko oku sandeka ukũlĩhĩso Wembimbiliya kolonepa viosi violuali.—Olosap. 15:7.