Talavaya Lolotratadu Poku Kunda Olondaka Viwa
1. Afendeli va Suku va siata oku talavaya ndati lolotratadu?
1 Afendeli va Yehova, va siata oku talavaya lolotratadu vokuenda kuanyamo alua. Kunyamo wo 1880, manji C. T. Russell kumue la vamanji vakuavo, va fetika oku sandeka olotratadu losapi hati, Bíbles Students Tracts (Olotratadu Viavakuakulilongisa Embimbiliya), loku vi tumisa ku vakuakutanga Utala Wondavululi oco vi eciwe komanu vosi. Omo olotratadu via tendiwile okuti, vi kuete esilivilo lia velapo, kunyamo wo 1884, eci manji C. T. Russell, a sonehisa ocisoko ca Vakuakulilongisa Embimbiliya oco va linge upange Wusoma, ondaka “tratadu” ya kongeliwa konduko Zion’s Watch Tower Tract Society, okuti cilo ocisoko caco ci tukuiwa hati, Sociedade Torre de Vigia de Tratados, de Pensilvânia. Kunyamo wo 1918, Vakuakulilogisa Embimbiliya va eca komanu eci ci pitahãla 300 kolohuluwa violohulua violotratadu. Toke koloneke vilo, olotratadu via siata oku tu kuatisa oku kundila omanu.
2. Momo lie olotratadu vi kuetele esilivilo?
2 Esunga Lieci vi Kuetele Esilivilo: Olotratadu vialua vi kuete avala a posoka. Handi vali, mu sangiwa esapulo lia teta onimbu kuenda ulandu wa leluka oku kuata elomboloko liaco. Olotratadu vi pondola oku vetiya omanu vana ka va sole oku tanga olorevista, ale alivulu etu. Ovio, via leluka oku vi eca komanu, ndaño muẽle akundi vana okuti ndopo va fetika kuenda omãla, va pondola oku ci linga. Omo okuti olotratadu ka vi lemi, ca leluka oku vi ambata.
3. Tukula ulandu umue u lekisa ndomo olotratadu vi kuete esilivilo.
3 Valua va kũlĩha ocili Condaka ya Suku lekuatiso liolotratadu. Kũlĩhĩsa ulandu wukãi umue kofeka yo Haiti, okuti, wa sanga otratadu vetapalo. Eye wa yi nõla, kuenje eci a yi tanga, wa komõha loku popia hati: “Nda sanga ocili!” Noke wa fetika oku endaenda Vonjango Yusoma loku lilongisa Embimbiliya, kuenje wa papatisiwa omo lioku vetiyiwa lunene Wondaka ya Suku a sanga votratadu.
4. Omo okuti kua lingiwa esokiyo lioku eca olotratadu vosãi, ocimãho cipi tu sukila oku kuata?
4 Poku Kundila Konjo Lanjo: Omo okuti olotratadu ocimãleho cimue ci kuete esilivilo koku kundila omanu, tu ka fetika oku vi eca olonjanja vimue vosãi, oku upisa kosãi ya Kuvala. Ka tu eci lika olotratadu komanu, pole, tu ci linga locimãho coku fetika ombangulo. Nda omunu o lekisa onjongole konjanja yatete, eci tu tiuka oku u pasuisa, tu pondola oku fetika oku u longisa Embimbiliya lekuatiso lielivulu Embimbiliya li Longisa Nye, ale elivulu likuavo. Tu eca ndati olotratadu poku kundila konjo lanjo? Omo okuti olotratadu via litepa, tu sukila oku vi kũlĩha ciwa oco tu vi ece komanu.
5. Tu pondola oku eca ndati olotratadu poku kundila konjo lanjo?
5 Tu sukila oku tiamisila ombangulo yetu kovisimĩlo viomanu tu sanga vocikanjo, kuenda kotratadu tu eca kokuavo. Osimbu tu fetika oku vangula lomunu umue, tu sukila oku kuata otratadu peka. Omo otratadu yi kuete evala lia posoka ci pondola oku vetiya omunu oku kuata onjongole yoku yi tanga. Citava oku lekisa olotratradu vialua komunu loku ecelela okuti, o nõla eyi a sola. Poku talavaya vocikanjo cina okuti omanu va kuete ohele yoku yulula apito, tu sukila oku kapa otratadu pocitumãlo cina va pondola oku yi mola lonjanga, ale tu pulisa nda citava oku yiñisa vemehi liepito. Nda otratadu yi kuete epulilo, tu sukila oku linga epulilo liaco komunu oco a situlule ocisimĩlo caye. Citava okuti, tu votola epulilo limue li vetiya onjongole yomunu. Noke tu tangela omunu onepa yimue yotratadu kuenje, tu talama oco tu linge apulilo amue a pondola oku u vetiya oku situlula ovisimĩlo viaye. Tu sukilavo oku tanga ocisonehua cimue Vembimbiliya. Noke yoku konomuisa olonepa vimue, tu sukila oku malusula ombangulo loku linga esokiyo lioku tiuka. Nda vamanji va siata oku sia alivulu kolonjo vina ka va sangi omanu, citava oku sia otratadu pocitumãlo cimue okuti omunu o pondola oku yi mola lonjanga.
6. Tu pondola oku talavaya ndati lolotratadu volokololo?
6 Oku Kundila Volokololo: Ove hẽ wa siata oku eca olotratadu poku kundila volokololo? Omanu vana va pita ombamba omo va kuete onjanga, ka va yongola okuti tu vangula lavo. Omo ka tu pondola oku va ĩha olorevista via sulako omo ka tua kũlĩhĩle nda va ka vi tanga, anga hẽ ka tu sukila oku va ĩha olotratadu? Omo okuti, olotratadu vi kuete olokapa via fina kuenda ulandu waco ka waluile, vi pondola oku vetiya omanu oku vi tanga eci va kuata otembo. Pole, nda omanu ka va kuete onjanga, tu pondola oku vangula lavo ovina vimue vi sangiwa votratadu.
7. Tukula ulandu umue u lekisa ndomo olotratadu vi kuatisa oku kundila omanu kepuluvi ka a sokiyiwile.
7 Poku Kundila Omanu Kepuluvi ka Lia Sokiyiwile: Oku kundila omanu kepuluvi ka lia sokiyiwile lolotratadu ca leluka calua. Manji umue poku tunda konjo yaye, wa siata oku kapa vonjipela olotratadu vimue. Eci a sanga omanu vamue, ndeci, vakuakulandisa vovenda, eca kokuavo otratadu yimue oco va yi tange. Eci olohueli vimue via endele oku ka nyula olupale luo Nova Yorke, va kolelele okuti va ka lisanga lomanu vo kolofeka vialua. Omo liaco, va ambatele okalivulu losapi hati, Nações kuenda olotratadu vialua. Kuenje, eci va yeva omunu umue o landisa ovikuata vokololo wa kala oku va vangula elimi likuavo, vo wĩha olotratadu kelimi liaco, kuenda eci va limbuka okuti omanu va tumãla vocila ale vo bare va vangula alimi o kolofeka vikuavo, va eca kokuavo olotratadu via sandekiwa kalimi avo.
8. Otratadu vi sokisiwa ndati lombuto?
8 ‘Kũla Ciwa Ombuto Yove’: Olotratadu vi sokisiwa lombuto. Ongunja poku lima, yi imba ombuto yalua, momo ka ya kũlĩhĩle nda yi ka tunda ciwa kuenda yi ka ima apako. Kelivulu Ukundi 11:6, ku popia hati: “Omẽle imba ombuto yove, oñolosi eka [liove] ka li ka lembuke; momo kua kũlĩhile nda ombuto ye nda ombuto ye yima ciwa, nda yeyi nda yoyo, ale nda viosi vi eca ciwa.” Omo liaco, tu sukila oku amamako oku ‘sandeka ukũlĩhĩso’ lovimãleho viosi vi tu kuatisa oku kundila ciwa omanu.—Olosap. 15:7.
[Etosi lia velapo kemẽla 3]
Omo okuti olotratadu ocimãleho cimue ci kuete esilivilo koku kundila omanu, tu ka fetika oku vi eca olonjanja vimue vosãi, oku upisa kosãi ya Kuvala.