Setukula Ongangu Yovangelo Vakuekolelo

1-2. (a) Kolonepa vipi tua litepa lovangelo? (b) Kolonepa vipi tua lisoka lovangelo?

ETU tuafendeli va Yehova, tu panga onepa kepata limue li likuetele ocisola, halio liu fendela. Vepata liaco, mua kongela vamanjetu voluali luosi, oku kongelamo olohuluwa viovangelo. (Dan. 7:​9, 10) Eci tu sokolola catiamẽla kovangelo, olonjanja vialua tu luluvalela kekalo liavo ndomo ovo va litepa letu. Ndeci, ovo va kasi otembo yalua okuti etu ci sule. (Yovi 38:​4, 7) Handi vali, ovo va kuete unene walua, va kola, kuenda vakuesunga okuti etu ci sule, momo tumanu vamue ka va lipuile.—Luka 9:26.

² Ndaño okuti etu tua litepa lovangelo, pole, kolonepa vialua tu kuete ovina vimuamue. Ndeci, etu tu pondola oku setukula ovituwa via Yehova kuenda tu kuete elianjo lioku nõla ndeci ovo. Ovo va kuetevo olonduko, ovituwa kuenda ovikele via litepa kupange wa Yehova ndetu. Pole, vosi yetu tu kuete esukila lioku fendela ululiki wetu.—1 Pet. 1:12.

3. Nye tu lilongisa catiamẽla kovangelo vakuekolelo?

³ Omo okuti tua lisoka lovangelo kolonepa vialua, ongangu yavo yiwa yi pondola oku tu pamisa kuenda oku tu longisa ovina vialua vi kuete esilivilo. Vocipama cilo, tu lilongisa ndomo tu setukula umbombe wovangelo, ocisola va kuetele omanu, epandi liavo kuenda alikolisilo va siata oku linga oco ekongelo liamameko oku yelisiwa.

OVANGELO VAKUEKOLELO AMBOMBE

4. (a) Ovangelo va lekisa ndati umbombe? (b) Momo lie ovangelo va lekisila umbombe? (Osamo 89:7)

⁴ Ovangelo vakuekolelo, ambombe. Ndaño okuti ovangelo va kuete ovolandu alua, unene kuenda ukũlĩhĩso, ovo va pokola kolonumbi via Yehova. (Osa. 103:20) Poku tẽlisa ovikele viavo, ovo lalimue eteke va lipandele, ale oku livelisapo omo liunene wavo. Ovo va linga lesanju cosi Yehova a va pinga, ndaño okuti ka va kũlĩhĩwa kolonduko.a (Efet. 32:​24, 29; 2 Olos. 19:35) Ovangelo va likala oku tambula esivayo liosi li sesamẽla oku eciwa ku Yehova. Momo lie ovangelo va lekisila umbombe? Momo ovo va sole Yehova kuenda vo sumbila lutima wosi.—Tanga Osamo 89:7.

5. Ungelo umue wa lekisa ndati umbombe eci a pisa upostolo Yoano? (Talavo ociluvialuvia.)

⁵ Tu kũlĩhĩsa ulandu umue u lekisa okuti ovangelo ambombe. Vokuenda kunyamo 96 K.K. ungelo umue okuti ka tua kũlĩhĩle onduko yaye, wa lekisa ocinjonde cimue ci komõhisa kupostolo Yoano. (Esit. 1:1) Nye Yoano a linga eci a mola ocinjonde caco? Eye wa seteka oku fendela ungelo waco. Pole, ungelo waco ukuekolelo lonjanga yalua wo tateka poku popia hati: “Kuata utate! Ku ka ci linge! Ame ndupika ndeci ove kuenda ndeci vamanjove . . . Fendela Suku!” (Esit. 19:10) Eli etambululo limue li lekisa umbombe! Ungelo ka yonguile oku tambula ulamba ale esivayo. Eye lonjanga yalua wa sapuila Yoano oco a fendele Yehova Suku. Handi vali, ungelo ka li tendele okuti wa velelepo Yoano. Ndaño okuti ungelo wa kala ale oku vumba Yehova vokuenda kuotembo yalua haeye ukuonene okuti Yoano ci sule, eye lumbombe wa litendavo ndupika ndeci Yoano. Handi vali, ndaño okuti ungelo wa pisa Yoano, eye ka ci lingile lukãlu, ale loku tema. Pole, wa vangula lumbombe. Citava okuti ungelo waco wa limbuka okuti Yoano wo kekamẽla, omo liocinjonde ci komõhisa a mola.

6. Tu setukula ndati umbombe wovangelo?

⁶ Tu setukula ndati umbombe wovangelo? Tu pondolavo oku ci linga poku tẽlisa ovikele vietu okuti ka tu lipandi, ale oku seteka oku tambula esivayo limue omo liovina tu linga. (1 Va Kor. 4:7) Handi vali, ka tu sukila oku litenda okuti tua velapo vakuetu omo lioku vumba Yehova vokuenda kuotembo yalua, ale omo tu kuete ovikele vimue. Pole, nda tu kuete ovikele vialua, tu sukila oku li tenda okuti tu sule. (Luka 9:48) Ndeci ci linga ovangelo, tu sukila oku velisapo vakuetu. Ka tu yongola oku kokela vakuetu oku sima okuti etu tua va velapo.

7. Tu lekisa ndati umbombe eci tu sukila oku pisa ale oku lungula omunu umue?

⁷ Tu sukila oku lekisa umbombe eci tu kasi oku eca elungulo komunu umue, ci kale manji vekongelo ale omãla vetu. Olonjanja vimue tu ka sukila oku eca elungulo lonjila yimue yi teta onimbu. Ndeci ungelo a lungula Yoano lumbombe, tu pondolavo oku eca elungulo komunu lonjila yimue okuti ka yu sumuisa. Nda ka tua litendele okuti tua velapo vakuetu, tu ka eca elungulo lia kunamẽla Vembimbiliya lonjila yimue yi lekisa esumbilo kuenda ocisola.—Va Kol. 4:6.

OVANGELO VA SOLE OMANU

8. (a) Ndomo ca tangiwa kelivulu lia Luka 15:10 ovangelo va siata oku lekisa ndati ocisola komanu? (b) Ocikele cipi ovangelo va kuete kupange woku kunda? (Talavo .)

⁸ Ovangelo va kapako calua eci ci lipita lomanu kuenda ka va simi okuti ka tu kuete esilivilo. Ovo va sole omanu. Va sanjuka calua eci una wa linga ekandu linene a likekembela, ale ceci umue wa siapo oku vumba Yehova a tiuka vocili. Ovo va sanjukavo, eci umue a lilongisa catiamẽla ku Yehova kuenda a nõlapo oku linga apongoloko komuenyo waye oco o vumbe. (Tanga Luka 15:10.) Ovangelo va litumbikavo kupange woku kunda. (Esit. 14:6) Ndaño okuti ovo ka va kundila omanu polo la polo, pole, va pondola oku vetiya ukundi umue oco a vangule la umue o yongola oku lilongisa catiamẽla ku Yehova. Ocili okuti, ka tu pondola oku popia lonjila ya suapo ndomo ovangelo va tu songuila komunu umue. Momo Yehova o pondola oku talavaya lovina vikuavo ndeci, espiritu sandu oco li kuatise omanu ale oku songuila afendeli vaye. (Ovil. 16:​6, 7) Ndaño ndoco, eye o talavaya lovangelo oco va tu kuatise eci tu kunda. Omo liaco, eci tu kunda olondaka viwa, tu pondola oku kolela okuti ovangelo va ka tu kuatisa.—Tala okakasia losapi hati, “Olohutililo Viavo Via Tambuluiwa.”b

9. Tu setukula ndati ovangelo kuenda oku sola omanu?

⁹ Tu setukula ndati ovangelo kuenda oku sola omanu? Eci tu yeva esapulo liokuti manji umue wa tambuiwa, tu sukila oku sanjuka ndeci ovangelo. Tu sukila oku va yolela lesanju kuenda oku lekisa okuti tu va sole. (Luka 15:​4-7; 2 Va Kor. 2:​6-8) Tu sukilavo oku setukula ovangelo poku likolisilako kupange woku kunda. (Uku. 11:6) Ndeci ovangelo va tu kuatisa kupange woku kunda, tu sukila oku sanda apuluvi oku kuatisa vamanjetu kupange woku kunda. Ndeci, tu pondola hẽ oku sokiya oku talavaya lohundi yimue ka ya loñolohele kupange woku kunda? Ale, tu pondola hẽ oku kuatisa vamanji va kuka, lava va vela oco va pange onepa kupange woku kunda?

10. Nye tu lilongisila kulandu wa manji Sara?

¹⁰ Nye tu sukila oku linga nda ekalo lietu ka li tu ecelela oku linga cosi tu yongola kupange wa Yehova? Tu pondola oku sanga olonjila vikuavo vioku talavayela kumosi lovangelo kupange woku kunda. Kũlĩhĩsa ulandu wa manji Sarac wo ko India. Noke lioku talavaya ndukundi wotembo yosi, ci soka 20 kanyamo, eye wa kuatiwa loku vela kualua kuenda ka tẽlele oku linga vali cimue. Kuenje eye wa sumuile calua. Pole, omo liekuatiso liocisola ca vamanji kuenda esokiyo liaye lioku tanga Embimbiliya, kamue kamue wa fetika oku tula utima. Ocili okuti eye wa sukilile oku kuama onjila yokaliye yoku kunda. Omo okuti eye ka tẽlele vali oku tumãla oco a sonehe ovikanda, wa ponduile lika oku kunda lo telefone. Eye wa tieñela komanu a linga epasu kuenje omanu vaco vo wĩha atendelo vomanu vakuavo va yonguile oku lilongisavo Embimbiliya. Onima yipi yeyililako? Noke liolosãi vimue manji Sara weya oku kuata 70 kalilongiso Embimbiliya, pole, eye ka ponduile oku lilongisa la vosi. Kuenje wa eca alilongiso amue ku vamanji vakuavo vekongelo. Valua pokati kolondonge viaco cilo va siata oku enda kolohongele. Hesanjukuolio ovangelo va yevite, poku talavayela kumosi la vamanji vana va likolisilako kupange woku kunda, oku kongelamo manji Sara!

OVANGELO VA SIATA OKU LEKISA EPANDI

11. Kovina vipi ovangelo va siata oku lekisa epandi?

¹¹ Ovangelo, vakuangangu yiwa koku lekisa epandi. Ovo va lekisa epandi kekambo liesunga kuenda kevĩho vokuenda kuanyamo alua. Ovo va mola Satana kuenda oviluvo vikuavo viespiritu vana va vumbilile kumosi kilu, oku sinĩla Yehova. (Efet. 3:1; 6:​1, 2; Yuda 6) Embimbiliya li lombolola ungelo umue ukuekolelo okuti wa liyaka lungelo umue ondingaĩvi vokuenda kuoloneke vialua. (Dan. 10:13) Handi vali, vokuenda kuanyamo alua, ovangelo va siata oku mola omanu valua oku nõlapo oku sinĩla Yehova. Ndaño lovina viaco, ovangelo vaco vakuekolelo, va kasi oku amamako oku vumba Yehova lesanju kuenda lombili. Ovo va kũlĩha okuti votembo ya sokiyiwa, Suku o ka malako ekambo liosi liesunga.

12. Nye ci pondola oku tu kuatisa oku pandikisa?

¹² Tu setukula ndati epandi liovangelo? Ndeci ovangelo, tua siata oku mola ekambo lialua liesunga kuenda oku liyaka lelambalalo. Pole, ndeci ovangelo etu tua kolela okuti, votembo ya sokiyiwa Yehova o ka malako evĩho liosi. Omo liaco, tu amamiko “oku linga eci ciwa” ndeci ovangelo vakuekolelo. (Va Gal. 6:9) Yehova wa likuminya oku tu kuatisa oku pandikisa. (1 Va Kor. 10:13) Kuenje tu pondola oku likutilila ku Yehova oku pinga espiritu sandu liaye, lina li tu kuatisa oku kuata epandi kuenda esanju. (Va Gal. 5:22; Va Kol. 1:11) Nye o sukila oku linga nda o kasi oku liyaka lelambalalo? Kolela ku Yehova kuenda ku ka kuate usumba. Yehova olonjanja viosi o ka ku kuatisa loku ku pamisa.—Va Hev. 13:6.

OVANGELO VA KUATISA EKONGELO OKU AMAMAKO OKU YELISIWA

13. Ocikele cipi cilikasi ovangelo va kuete vokuenda kuoloneke vilo via sulako? (Mateo 13:​47-49)

¹³ Yehova wa eca kovangelo, ocikele cimue cilikasi koloneke vilo via sulako. (Tanga Mateo 13:​47-49.) Upange woku kunda wa siata oku vetiya olohulukãi viomanu voluali luosi. Vamue pokati komanu vaco, va pondola oku linga apongoloko komuenyo kuenda oku linga Akristão vocili, pole, vakuavo sio. Ovangelo va tambula ocikele coku “tepisa pokati kolondingaĩvi la vakuesunga.” Volondaka vikuavo eci ci lomboloka okuti ovo va tambula ocikele coku teyuila ekongelo kevĩho liosi. Pole, eci ka ci lomboloka okuti una wa siapo ekongelo omo lioku lueya kumue, lalimue eteke a pondola oku tiuka vali. Ka ci lombolokavo okuti, ekongelo ka li ka kuata vali ovitangi. Ndaño ndoco, tua kolela okuti ovangelo va kasi oku talavaya calua oco akongelo amameko oku yelisiwa.

14-15. Tu setukula ndati esakalalo liovangelo liatiamẽla koku yelisa ekongelo? (Talavo ociluvialuvia.)

¹⁴ Tu setukula ndati esakalalo liovangelo liatiamẽla koku yelisa ekongelo? Tu ci linga poku tẽlisa onepa yetu yoku yelisa ekongelo, ci kale kovisimĩlo kuenda konepa yespiritu. Oco tu ci linge, tu sukila oku likolisilako oco tu teyuile utima wetu. Onjila yimue yoku ci linga poku nõla akamba va sole Yehova kuenda oku kala ocipãla lovina viosi vĩvi vi pondola oku tu kokela oku yanduluka Yehova. (Osa. 101:3) Tu sukilavo oku kuatisa vamanjetu oco vamameko oku kakatela ku Yehova. Ndeci, nye o sukila oku linga nda wa yeva okuti manji umue wa linga ekandu limue linene? Omo liocisola tu kuetele omunu waco, ciwa oku u vetiya oco a sapule kakulu vekongelo ocitangi caco. Nda eye ka ci lingile, etu tu sukila oku sapuilako akulu vekongelo ovina viaco. Tu yongola okuti omunu wosi o sukila ekuatiso konepa yespiritu, o kuatisiwa lonjanga yalua!—Tia. 5:​14, 15.

¹⁵ Ci sumuisa calua omo okuti, vamue omo lioku linga ekandu linene, va sukila oku tundisiwa vekongelo. Kuenje etu tu ‘liwekapo oku kuata ukamba’ lomunu waco.d (1 Va Kor. 5:​9-13) Esokiyo liaco li kuatisa koku yelisa ekongelo. Handi vali, eci tu tepa ukamba lomunu wa tundisiwa vekongelo, tu kasi oku kuatisa omunu waco. Momo ci vetiya omunu oku limbuka okuti o sukila oku tiuka ku Yehova. Kuenje nda eye wa ci linga, etu kumue la Yehova kuenda ovangelo, tu kuata esanju lialua.—Luka 15:7.

16. Kolonepa vipi tu yongola oku setukula ovangelo vakuekolelo?

¹⁶ Tu kuete esumũlũho linene lioku kũlĩha catiamẽla kovangelo kuenda oku talavayela kumue lavo! Tu yongola calua oku setukula ovituwa ovo va kuete ndeci, umbombe, ocisola va kuetele omanu, epandi kuenda esakalalo va kuete lioku yelisa ekongelo. Omo liaco, nda tua setukula ovangelo vakuekolelo tu ka panga onepa kepata liafendeli va Yehova otembo ka yi pui.