Ove hẽ wa Soneha Ale?

Oku soneha nye? Oku soneha vokokanda kove kosonde olonumbi o yongola oku sakuiwa lavio (Diretrizes Sobre Tratamento de Saúde) ka sokiyiwila Olombangi via Yehova via papatisiwa. Omo okuti, ‘kua kũlĩhĩle eci ciya hẽla,’ o sukila oku nõla loku soneha vokokanda kove kosonde ndomo o yongola oku sakuiwa eci o liyaka luvei umue. (Tia. 4:14; Ovil. 15:​28, 29) Oco o kuatisiwe konepa eyi, kua sandekiwa ovideo losapi hati, Tratamentos Alternativos à Transfusão: Atendendo às Necessidades e aos Direitos do Paciente. Tala ovideo yaco, noke lohutililo, kũlĩhĩsa eci wa lilongisako lekuatiso liapulilo a sangiwa kombuelo. Kũlĩhĩsa: Omo okuti ovideo yaco yi lekisa oviluvialuvia viomanu va kasi oku pelaliwa, olonjali vi sukila oku nõla nda va pondola oku yi tala kumosi lomãla.

(1) Momo lie olondotolo vimue vi kasilili oku kũlĩhĩsa ovitangi vi iyilila koku kapiwa osonde? (2) Tukula olonjila vitatu vioku pelaliwa okuti, ka vi lingiwa losonde. (3) Olondotolo viñami voluali kuenda vakuoloño woku pelala va siata oku lekisa onjongole yoku sakula olombei vi yuvula osonde? Momo lie va ci lingila? (4) Akonomuiso amue a lingiwa ndopo kolosipitali, a lekisa nye catiamẽla koku sakula losonde? (5) Ovitangi vipi vi tunda koku kapiwa osonde? (6) Vakuoloño woku sakula va limbuka nye catiamẽla kesilivilo lioku kuama olonjila vikuavo vioku sakula okuti, ka mu iñila osonde? (7) Nye ci nena uvei wo anemiya? Toke petosi lipi etimba liomunu li pondola oku liyaka luvei wo anemiya? Omunu o kuete o anemiya o kuatisiwa ndati? (8) Nye tu sukila oku linga oco ologlobulu vi kusuka vi vokiye osonde vetimba liombei? (9) Uloño upi wa siata oku kuamiwa oco ombei ka yika pesele osonde yalua poku pelaliwa? (10) Anga hẽ, uloño woku yuvula osonde ci tava okuti u kuamiwavo poku sakula omãla vatito ale omanu va kasi kohele yoku fa? (11) Onumbi yipi olondotolo vi sukila oku kuama oco vi sakule ciwa olombei? (12) Momo lie Akristão va sukilila oku nõla selo olonumbi vi ka kuamiwa poku va sakula oco ka va ka kapiwe osonde? Tu pondola oku ci linga ndati?

Oku tava ale oku yuvula olonjila vimue vioku sakuiwa via lekisiwa vo video eyi, catiamẽla lika komunu lomunu nda utima waye wa pindisiwa lolonumbi Viembimbiliya, u wecelela oku ci linga. Ove hẽ, wa soneha vokokanda kove kosonde ndomo ove kumue lomãla vove u ka sakuiwa oco ka u ka kapiwi osonde? Oco o sange olonumbi vikuavo viatiamẽla kondaka eyi, kũlĩhĩsa vocipama 7 velivulu “Kali Vocisola ca Suku,” kuenda valivulu akuavo a tukuiwa vocipama caco. Kũlĩhĩsavo vosuplemento Yupange Wetu Wusoma ya Kuvala wo 2006, kocipama losapi hati: “Ci Tava Okuti, Ndi Sakuiwa Lolonepa Viosonde Yange Muẽle? Okokanda kove kosonde, ka sukila oku eca uvangi wonjila wa nõla yoku sakuiwa. Ondotolo yove, kuenda vakuepata liove okuti Halombangiko Via Yehova, va sukila oku kũlĩha onjila wa nõlapo yoku sakuiwa.

[Elitalatu kemẽla 3]

• Anga hẽ oka pokola kolonumbi wa nõla vi lekisa ndomo ove kumue lomãla vove, vu yongola oku sakuiwa?

• Anga hẽ wa soneha ale okokanda kove koku yuvula oku kapiwa osonde eci ku iya ovitangi?