Lekisa Olopandu Kombanjaile Yavelapo ya Suku
1. Momo lie tu sukilila oku eca olopandu ku Yehova?
1 Pokati ‘kolombanjaile’ viosi via eciwa la Yehova, ocisembi Comõlaye wa soliwa, oyo ombanjaile ya velapo. (Tia. 1:17) Ocisembi caco, ca nena asumũlũho alua oku kongelamo ongecelo yakandu etu. (Va Efe. 1:7) Omo liaco, olonjanja viosi tu sukila oku eca olopandu. Potembo Yonjivaluko, omunu lomunu pokati ketu, o kuete epuluvi lioku sokolola ombanjaile yaco.
2. Tu lekisa ndati olopandu kocisembi vepata lietu, kuenda etu muẽle?
2 Tu Lekisi Olopandu: Oco o lekise olopandu vepata liove, momo lie velilongiso liene Liepata ka u sapelela catiamẽla kocisembi, osimbu Onjivaluko yi ka lingiwa keteke 30 Yelombo ka ya pitilile? Konomuisa kumue lepata liove oku tangiwa kuovipama Viembimbiliya viatiamẽla Konjivaluko. Omunu lomunu a sokolole ndomo a kuatisiwa locisembi, ndomo a tenda Yehova, ndomo a litenda eye muẽle, vakuavo, kuenda elavoko liaye lio kovaso. Ca sungulukavo oku lilongisa ovisungo viokaliye letendelo 8, kuenda 109, vi ka imbiwa keteke Lionjivaluko.—Osa. 77:12.
3. Tu pondola oku lekisa ndati olopandu?
3 Ndomo tu Lekisa Olopandu: Olopandu tu lekisa kocisembi, vi tu vetiya oku sapuila vakuetu catiamẽla ku Yehova kuenda kocisola caye ca velapo coku tuma Omõlaye. (Osa. 145:2-7) Vokuenda kuosãi Yelombo, leyi ya Kupupu, kuenda ya Kupemba, apata vamue va siata oku lekisa olopandu viavo, poku linga esokiyo liokuti, umue vepata o li tumbika kupange wakundi va sokamo. Nda ka u pondola oku ci linga, citava hẽ ‘okuti u sokiya otembo’ yoku vokiya upange wene woku kunda? (Va Efe. 5:16) Olopandu vi tu vetiyavo oku laleka omanu oku kala letu kocipito Conjivaluko. (Esit. 22:17) Linga esokiyo lioku pasuisa vana va lilongisa Embimbiliya love, vakuepata, akamba vove kupange, kuenda vana o lisungue lavo oco o va laleke. Noke, li kolisilako oku kuata onepa kupange woku eca otuikanda tuoku laleka omanu oku enda kocipito Conjivaluko.
4. Kotembo Yonjivaluko tu kuete epuluvi lioku linga nye?
4 Kotembo Yonjivaluko, tu kuete epuluvi lioku lekisa olopandu vietu ku Yehova, omo liombanjaile a eca komanu. Vepuluvi liaco, tu lekisi ombili yoku eca olopandu vietu kocisembi, kuenda ‘kukuasi ka u tendiwa wa Kristu.’—Va Efe. 3:8.