Otembo Yocipito Conjivaluko yi tu Kuatisa Oku Eca Olopandu

1. Epuluvi lipi lilikasi tu ka kuata kotembo Yocipito Conjivaluko?

¹ Ocipito Conjivaluko ci ka lingiwa keteke 14 kosãi ya Kupupu, ci ka tu ĩha epuluvi lioku eca olopandu vietu omo liohenda ya Yehova. Ulandu u sangiwa kelivulu lia Luka 17:11-18, u lekisa ndomo Yehova kumue la Yesu va limbuka olopandu tu eca kokuavo. Ocili okuti, pokati keci ci soka ekũi kalume va kuata ovilundu, umosi lika wa sanda epuluvi lioku eca olopandu. Ombanjaile yocisembi yi ka malako ovovei osi kuenda yi ka tu nenela omuenyo kopui! Omo liaco, vosi yetu tu eci olopandu ku Yehova omo liasumũlũho a siata oku tu ĩha. Pole, tu pondola ndati oku eca olopandu vietu vokuenda kuolosemana vi kuãimo?

2. Tu pondola ndati oku likolisilako oco tu ece olopandu kocisembi?

² Li Kolisilako Oku Eca Olopandu: Ovisimĩlo vioku eca olopandu vi tunda kutima. Oco tu ece olopandu kocisembi, tu sukila oku kuama ovipama Viembimbiliya viatiamẽla Kocipito Conjivaluko, vi sangiwa vo Traducão do Novo Mundo vo apendice B12, vo kalendario kuenda vokalivulu Konomuisa Ovisonehua Eteke Leteke. Momo lie ku konomuisila ulandu waco kumue lepata liove? Nda tua ci linga, tu vokiya olopandu vietu kocisembi. Ovina viaco vi tu kuatisa oku lekisa ovituwa via sunguluka.—2 Va Kor. 5:14, 15; 1 Yoa. 4:11.

3. Tu pondola ndati oku eca olopandu vietu vokuenda Kuocipito Conjivaluko?

³ Eca Olopandu: Olopandu vi limbukiwila kovilinga. (Va Kol. 3:15) Ulume wa kuata ovilundu, wa likolisilako oku sanda Yesu, oco a ece olopandu kokuaye. Eye, wa kuata esanju poku sapuila omanu catiamẽla kocikomo ca lingiwa kokuaye. (Luka 6:45) Anga hẽ, olopandu tu eca kocisembi vi tu vetiya oku lekisa ombili poku eca otuikanda tuokulaleka omanu oco va ende Kocipito Conjivaluko? Onjila yikuavo yoku eca olopandu, oku kala ukundi wa sokamo ale oku vokiya otembo yetu kupange woku kunda vokuenda kuotembo Yocipito Conjivaluko. Vuteke Wocipito Conjivaluko, tu ka kuata esanju poku yolela omanu veya onjanja yatete loku tambulula apulilo va linga kokuetu.

4. Tu linga ndati Ocipito Conjivaluko lonjila yimue yi tu nenela esanju?

⁴ Anga hẽ, Ocipito eci Conjivaluko oco ci ka sulako? (1 Va Kor. 11:26) Ka tua ci kũlĩhĩle. Pole, tua kũlĩha okuti, olio epuluvi lioku eca olopandu vietu. Ove hẽ o ka ci linga? Omo liaco, olondaka viomẽla wetu kuenda ovisimĩlo viutima wetu, vi ece esivayo ku Yehova, momo eye wa linga Eliangiliyo lioku eca ocisembi.—Osa. 19:14.