Tu Lekisi Olopandu Onjivaluko yi ka Lingiwa Keteke 17 ya Kupupu
1. Olondaka viukualosamo vi kuete esilivilo lie kepuluvi Lionjivaluko?
1 Omo liovilinga via Yehova viohenda kuenda vieyovo, ukualosamo wa vetiyiwa oku pula ndoco: “Niula nye ku Yehova oku panduila oviali viaye viosi ñasi lavio?” (Osa. 116:12) Koloneke vilo, afendeli va Suku va kuetevo esunga lialua lioku eca olopandu. Osimbu olondaka evi ka via sonehiwile, Yehova wa eca ombanjaile yimue komanu okuti, ocisembi. Poku lipongiyila oku enda kocipito Conjivaluko yolofa via Kristu yi ka lingiwa keteke 17 ya Kupupu, tu lekisa olopandu vietu.—Va Kol. 3:15.
2. Ovina vipi vi tu vetiya oku lekisa olopandu kocisembi?
2 Asumũlũho Eyilila Kocisembi: Omo liocisembi, tu pondola oku tambula “ongecelo yakandu” etu. (Va Kol. 1:13, 14) Eci ci tu ecelela oku vumba Yehova lutima wa yela. (Va Hev. 9:13, 14) Tu pondola oku lekisa utõi poku vangula la Yehova eci tu amẽla kokuaye vohutililo. (Va Hev. 4:14-16) Omunu wosi o lekisa ekolelo kocisembi, o kuata elavoko liomuenyo ko pui!—Yoa. 3:16.
3. Tu lekisa ndati olopandu vietu ku Yehova omo liocisembi?
3 Lekisa Olopandu: Onjila yimue yoku lekisa olopandu vietu, oku konomuisa oku tangiwa kuovipama Viembimbiliya viatiamẽla Konjivaluko, kuenda oku sokolola kovina tua tanga. Vutala Wondavululi 1 ya Kayovo wo 2011, kelimi Lioputu, mu sangiwa ocipama cimue losapi hati, “Você está preparado para o dia mais importante do ano?” ya sandekiwa locimãho coku tu kuatisa. Tu pondola oku vangula la Yehova vohutililo lutima wetu wosi, loku lekisa okuti tua kapako ocisembi. (1 Va Tes. 5:17, 18) Oku kala Konjivaluko omo lioku pokola konumbi ya Yesu, ci lekisa olopandu vietu. (1 Va Kor. 11:24, 25) Tu pondola oku setukula ocisola ca Yehova poku laleka omanu valua oco va kale kumosi letu kocipito caco.—Isa. 55:1-3.
4. Ocimãho cipi tu sukila oku kuata?
4 Afendeli va Yehova ka va tendi ocipito Conjivaluko ndolohongele vikuavo. Ocipito caco, ohongele ya velapo vali vunyamo! Osimbu tu lavoka ocipito Conjivaluko, ocimãho cetu ci kale ndeci cukualosamo wa soneha hati: “Otima wange, sivaya Yehova. Ku ka ivaleko oviali viaye viosi.”—Osa. 103:2.