Upange tu Sukila Oku Pitisa Kovaso
1. Yesu wa lekisa ndati okuti wa velisilepo upange woku kunda?
1 Yesu wa pitisile kovaso upange woku kunda. Eye wa linga ovongende alua ko Palestina oco a kundile omanu. Yesu wa ambatele omuenyo wa leluka oco a pesile otembo yalua kupange woku kunda. (Mat. 8:20) Eci omanu va setekele oku u tateka oco a sakule vana va vela, eye wa va sapuila hati: “Ñuete ocikundi coku kundila ondaka yiwa yusoma wa Suku vovaimbo akuavo, momo eci oco nda tumilua.”—Luka 4:43.
2. Momo lie Yesu a velisililepo upange woku kunda?
2 Momo lie Yesu a velisililepo upange woku kunda? Eye wa velisilepo oku eca esivayo konduko ya Yehova. (Mat. 6:9) Wa solele calua Isiaye wokilu, kuenda wa yonguile oku linga ocipango Caye, loku pokola kovihandeleko Viaye. (Yoa. 14:31) Handi vali, wa tata ciwa omanu kuenda wa va kuatisa.—Mat. 9:36, 37.
3. Tu lekisa ndati okuti tua velisapo upange woku kunda?
3 Kuama Ongangu ya Yesu: Ka ca lelukile oku kuama ciwa ongangu ya Yesu, momo oluali lua siata oku tu vetiyila kovina vialua vi nyana otembo yetu, kuenda lu lekisa ovitalukilo vilua. (Mat. 24:37-39; Luka 21:34) Omo liaco, tu sukila oku kũlĩhĩsa ovina via velapo, ndeci: Oku pongiya ovipama violohongele, kuenda oku linga upange woku kunda. (Va Fil. 1:10) Omo liaco, tu sukila oku leluisa omuenyo wetu kuenda oku yuvula oku pesila otembo yalua kovina violuali.—1 Va Kor. 7:31.
4. Momo lie koloneke vilo ci kuetele esilivilo oku pitisa kovaso ovina via velapo?
4 Omunu ukualondunge, o pitisa kovaso ovina vi kuete esilivilo. Nda eye wa limbuka okuti kuiya ocilunga cimue, o sandiliya ocitumalo coku teyuila epata liaye kuenda o lungula omanu vakuavo. Ovina ka vi kuete esilivilo vi lingiwa noke. Otembo yoku iya kuo Harmagedo yi kasi ocipepi. (Sof. 1:14-16; 1 Va Kor. 7:29) Oco tu popeliwe etu muẽle, kuenda vana tu longisa, tu sukila oku lava ekalo lietu lelongiso lietu cikale vekongelo ale komanu vakuavo. (1 Tim. 4:16) Tu popeliwa lika nda tua pitisa kovaso upange woku kunda!