Tu Mioñololi Uloño Wetu Kupange Woku Kunda—Lekisa Ndomo ku Lingiwa Elilongiso Liembimbiliya Poku Talavaya Lelivulu Embimbiliya li Longisa

Esunga Lieci ci Kuetele Esilivilo: Omanu valua ka va kuata elomboloko eci tu va sapuila okuti tu eca ocali elilongiso liembimbiliya kolonjo viavo. Ovo va pondola oku sima okuti, va sukila oku likongela locimunga cimue celilongiso ale okulinga elilongiso limue lekuatiso liovikanda. Momo lie ku lekisila ndomo kulingiwa elilongiso liaco? Vokuenda kuakukutu amue o pondola oku lekisa komunu wa sanga ndomo kulingiwa elilongiso liembimbiliya lonjila yimue ya leluka.

Ndomo ci Lingiwa:

Noke lioku lama, pulisa komunu wa sanga nda eye wa sakalala leci ci ka pita kovaso yoloneke.
U lomboluila okuti, omanu valua va kuetevo esakalalo limuamue, kuenda u lekisavo ulandu u sangiwa velivulu Embimbiliya Lilongisa. U sapuila okuti velivulu eli mu sangiwa olonepa via leluka oku kuata elomboloko okuti vi lekisa eci Embimbiliya lilongisa catiamẽla kovina vi keya kovaso yoloneke, kuenda kovina vikuavo, loku u pula oco a tukule ocipama co vetiya.
Eca kokuaye elivulu liaco kuenda u lekisa ocipama eye a nõla. U lomboluila okuti apulilo a sangiwa kefetikilo liocipama a tambuluiwa kovinimbu vi kuãimo.
Nda ci ecelela pinga komunu wa sanga oco a tange ocinimbu catete. Noke linga epulilo liocinimbu caco kuenda kũlĩhĩsili kumosi etambululo liaco. Sandiliya ovisonehua vi kuatisa oku sanga etambululo kuenda vi lombolola. U lekisavo ndomo wa sanga etambululo velivulu liove.
Konomuisi ocinimbu ci kuãimo, pole, onjanja eyi u pinga oco a tambulule epulilo volondaka viaye muẽle.
U pandiya, kuenda lingi eliangiliyo lioku tiuka oco vu malusuli ocipama.
Nda citava ulekisa ovideo vo jw.org losapi hati: Nye ci Lingiwa Velilongiso Limue Liembimbiliya?

Seteka Ndoco Vokuenda Kuosãi:

Likutilila ku Yehova oco a sumũlũise alikolisilo ove oku fetika elilongiso liokaliye Liembimbiliya.—Va Fil. 2:13.
Olonjanja viosi eci wenda kupange woku kunda seteka oku fetika elilongiso Liembimbiliya poku talavaya lelivulu Embimbiliya Lilongisa, ale poku lekisa ovideo losapi hati: Nye ci Lingiwa Velilongiso Limue Liembimbiliya?