Testemunhas de Jeová—Organizadas para Pregar as Boas Novas
Vokuenda kueci ci pitãhala 100 kanyamo, Olombangi via Yehova via siata oku litumbika kupange woku kunda olondaka viwa. Ndomo ca kũlĩhĩwa, upange waco wa siata oku lingiwa koluali luosi, kuenda tu kasi oku kunda esapulo liaco valimi alua kueci ci pitãhãla 230 kolofeka. (Mat. 24:14) Momo lie upange waco u lingiwila? U kasi oku telĩsiwa ndati voluali luosi? Ovideo losapi Testemunhas de Jeová—Organizadas para Pregar as Boas Novas, yi tambulula apulilo aco poku lekisa olonjila via litepa vi kasi oku kuamiwa kupange wetu voluali luosi. Noke yoku tala ovideo konomuisa apulilo a kuãimo.
Ovideo eyi ya vetiya ndati onjongole yove (1) kalikolisilo ocisoko ca Yehova ca siata oku linga koku kunda olondaka viwa? (2 Tim. 4:2) (2) catiamẽla kepata lio Betele voluali luosi? (3) catiamẽla kepindiso lieciwa kolomisionaliu kuenda ku vamanji vanyula akongelo? (2 Tim. 2:2) (4) kesilivilo lioku fetika eteke locisonehua Cembimbiliya kuenda oku pongiya ovipama violohongele olosemana viosi? (Ovil. 17:11) (5) kesilivilo lioku kala kolohongele vietu? (Va Hev. 10:24, 25) (6) kasumũlũho o ka tambula eci ongongo yi ka pongoluiwa oluali Luokaliye? (Isa. 11:9) (7) kesumũlũho o kuete lioku panga onepa kupange woku ungula?—Yoa. 4:35.
Ovideo eyi ocimãleho cimue ca eciwila oku kuatisa omanu vakuavitima via sunguluka oku kũlĩha ciwa upange Wolombangi via Yehova u kasi oku lingiwa voluali luosi. (8) Vepuluvi lipi citava oku lekisa ovideo eyi kuava tu longisa Embimbiliya, kepata kuenda komanu vakuavo? (9) Nye wa siata oku limbuka noke yoku lekisa ovideo yaco?
Eci tu kũlĩhĩsa ovina Yehova a kasi oku linga, ci tu vetiya oku sokolola olondaka viukualosamo via linga hati : “A Yehova Suku yange, ovikomo wa linga, lovisimilo wa tu simila, via lua cimue. Lomue wa lisoka love.” (Osa. 40:5) Nda tua talavaya ciwa lovideo eyi, tu pondola oku kuatisa omanu oku sola Yehova kuenda ocisoko caye!