Alivulu Ove a Kasi Ndati?

Eli epulilo liwa lioku kũlihĩsa alivulu tu yongola oku eca. Elivulu limue nda lia li ketaika, lia kunguka, lia liña ale lia toka, ci sepuisa ocisoko cetu kuenda ka ceci uvangi uwa komanu tu sanga, ale kesapulo liomuenyo li sangiwa valivulu aco.

Tu amamako ndati oku tata alivulu etu? Valua va limbuka okuti oku tepisa alivulu okuti ka a kala pamosi ci kuatisa. Ovo va tepisa okuti alivulu pocitumãlo cayo, olorevista kuenda olombrochura vi kala pamosi, olotratado kuenda ovina vikuavo laviovo vi kala pamosi. Olonjanja viosi va tiuwiya Embimbiliya kuenda alivulu akuavo povitumãlo viayo, va ci linga lutate oco ka a ka nyõlehe. Akundi vamue va kapa alivulu avo vakolombele ale vonjeke yopelastiku ya yela. Ndaño tu kuama olonjila vialua vioku tata alivulu etu, ka tu yongola oku eca evelo lioku pisa upange wetu woku kunda poku eca elivulu limue lia nyõleha.—2 Va Kor. 6:3.