‘Ci Lingili Onjivaluko’
Onjivaluko yi ka Lingiwa Keteke 5 ya Kupupu
1. Momo lie eteke Lionjivaluko lia velelapo?
1 “Ci lingili onjivaluiso yange.” (Luka 22:19) Yesu poku tukula olondaka evi, wa handeleka olondonge viaye oco vi ivaluke olofa viaye. Omo liovina via tẽlisiwa locisembi, Onjivaluko eteke limue lia velapo vunyamo, Kakristão. Osimbu tu panda konjivaluko yi ka lingiwa keteke 5 ya Kupupu, tu lekisa ndati olopandu vietu ku Yehova?—Va Kol. 3:15.
2. Tu lekisa ndati olopandu vepuluvi Lionjivaluko poku lilongisa kuenda oku sokolola ovina viaco?
2 Lipongiya: Olonjanja vimue tu li pongiyila ovina tua tenda okuti via velapo. Tu pondola oku pongiyila utima wetu kocipito Conjivaluko poku konomuisa kumosi lepata ovina via pita koloneke via sulako viomuenyo wa Yesu palo posi, kuenda oku sokolola kovina viaco. (Esera 7:10) Onepa Yovisonehua via sokiyiwa, vi sangiwa vokalendaliu kuenda vokalivulu Konomuisa Ovisonehua Eteke Leteke. Ulandu ukuavo okuti wopiwa vovipama vimue vielivulu O Maior Homem, vi sangiwa Vutala Wondavululi 1 ya Kayovo wo 2011, kamẽla 23-24, kelimi lioputu.
3. Tu lekisa ndati olopandu kepuluvi Lionjivaluko poku talavaya calua kupange woku kunda?
3 Kunda: Tu pondolavo oku lekisa olopandu vietu poku talavaya calua kupange woku kunda. (Luka 6:45) Oku upisa keteke 17 Yelombo, Vocasapalo, koluali luosi, ku ka lingiwa upange woku eca okokanda koku laleka omanu oku enda Konjivaluko. Momo lie ku lingila esokiyo liwa lioku talavaya calua kupange woku kunda, ndeci oku li sonehisa ndukundi wasokamo? Kefendelo liene Liepata koñolosi, momo lie ka vu sapelela ondaka yaco?
4. Tu kuatisiwa ndati poku kala Konjivaluko?
4 Unyamo lunyamo eci tu kala Konjivaluko, tu kuatisiwa calua! Esanju lietu kuenda ocisola cetu ku Suku ci lua osimbu tu sokolola kocali ca Yehova coku eca Omõlaye wongunga ndocilumba cocisembi. (Yoa. 3:16; 1 Yoa. 4:9, 10) Eci ci tu vetiya okuti ka tu lingi ocipango cetu muẽle. (2 Va Kor. 5:14, 15) Ci vokiyavo onjongole yetu yoku sivaya Yehova powiñi. (Osa. 102:19-21) Afendeli va Yehova va ka lekisa olopandu viavo poku kala Konjivaluko keteke 5 ya Kupupu, oco va ‘sapule okufa kua Ñala.’—1 Va Kor. 11:26.