Lipongiyila Oku Enda Kocipito Conjivaluko Lesanju
1. Ocipito Conjivaluko ci tu ĩha epuluvi lioku linga nye?
1 Ocipito Conjivaluko ci ka lingiwa Vovali 26 Yelombo, ci tu ĩha epuluvi lioku lekisa esanju omo lieliangiliyo Suku a linga lioku tu yovola. (Isa. 61:10) Esanju liaco, li tu kuatisa oku lipongiya ciwa osimbu ka tua endele konjivaluko. Ndamupi?
2. Nye ci tu vetiya oku linga aliangiliyo ocipito Conjivaluko?
2 Oku Lipongiyila Ocipito Caco: Omo okuti Ondalelo ya Ñala ocipito cimue ci kuete esilivilo lialua, tu sukila oku lipongiya selo oco ovina viosi vi ende ciwa. (Olosap. 21:5) Tu sukila oku sokiya otembo kuenda ocitumãlo ku ka lingiwila ocipito caco. Tu sukilavo oku pongiya ombolo lovinyu. Ocitumãlo ku ka lingiwila ohongele ci yelisiwe loku ci posuisa. Manji o ka linga ohundo o sukila oku lipongiya ciwa, kuenda vamanji vana va ka pita lombolo kuenda ovinyu, kumue lolonjeveleli va sukila oku kũlĩha ndomo ovina via pongiyiwa. Oku lekisa olopandu keliangiliyo liocisembi cina ci kuete unene woku tu yovola ci tu vetiya oku lipongiya ciwa oco tu kale kepuluvi liaco li kola.—1 Pet. 1:8, 9.
3. Tu pongiya ndati utima wetu oco tu ka kaile Kocipito Condalelo ya Ñala?
3 Pongiya Utima: Oco tu kuate elomboloko liocipito Conjivaluko, ci kuete esilivilo oku pongiya utima wetu. (Esera 7:10) Oco tu tẽlise ocimãho caco, tu sukila oku sokiya otembo yoku konomuisa ovinimbu Viembimbiliya via sokiyiwa oco vi tangiwe vokuenda kuosemana ku ka lingiwa Onjivaluko, loku sokolola ovina via pita vokuenda kuoloneke via sulako via Yesu palo posi. Oku sokolola ocisembi ca Yesu, ci ka tu vetiya oku u setukula.—Va Gal. 2:20.
4. Ekuatiso li tunda kocisembi li vokiya ndati esanju liove?
4 Olofa via Kristu via teyuila omoko ya Yehova yoku viala. Ovio, via tu yovola kekandu kuenda kolofa. (1 Yoa. 2:2) Olofa viaye vi tu kuatisa oku kuata ukamba la Suku, kuenda oku tambule omuenyo ko pui. (Va Kol. 1:21, 22) Olofa viaye vi tu kuatisavo oku pamisa onjongole yetu yoku vumba Yehova kuenda oku amamako oku kala olondonge via Kristu. (Mat. 16:24) Nda wa linga esokiyo lioku enda Kocipito Conjivaluko, esanju liove li ka li vokiya!