Tu Mioñololi Uloño Wetu Kupange Woku Kunda—Tambulula Ciwa Omunu wa Tema o Sanga Konjo Yaye

Esunga Lieci ci Kuetele Esilivilo: Omanu valua tu sanga kupange woku kunda va kuete ovituwa viwa. Pole, Yesu wa popele hati, omanu vamue va ka tu suvuka. (Yoa. 17:14) Omo liaco, ka tu komõha nda tua sanga omunu umue wa tema. Nda tu pita locitangi caco tu sukila oku tambulula lonjila yimue yi lekisa okuti, tua tumiwa la Yehova. (Va Rom. 12:17-21; 1 Pet. 3:15) Nda tua ci linga, tu ka yuvula ovitangi. Eci ci ka ecavo uvangi uwa komunu tua sanga kuenda komanu va kuavo, loku ecelela okuti eci Olombangi Via Yehova viya onjanja yikuavo, va ka vetiyiwa oku va yevelela—2 Va Kor. 6:3.

Ndomo tu ci Linga:

Lekisa umbombe kuenda linga ukamba lomunu o sanga. Nda wa ci linga ci ku kuatisa oku yuvula ocitangi caco. Ovina viaco vi ku kuatisavo oku yuvula oku tema omo liocituwa comunu tua sanga. (Uku. 7:9) Citava okuti omunu waco wa tema omo liovitangi vimue ale wa pita konjo yaye kelivala limue okuti ka kapeleleko. Ndaño okuti eye o tema omo liesapulo tu kunda, pole, citava okuti onjanja yimue wa yevele ondaka yimue yuhembi yatiamẽla kokuetu. —2 Va Kor. 4:4.
Tambulula lombembua kuenda vangula olondaka via sunguluka. (Olosap. 15:1) Anga hẽ wo sanga okuti wa kala oku pekela kuenje wo pasula? Omo okuti kua pingile ongecelo omo liupange wetu woku kunda, lekisa umbombe poku pinga kokuaye nda citava oku sapela noke. Anga eye o kasi hẽ lonyeño omo liondaka yimue yuhembi a yeva yatiamẽla kokuetu? Nda oco, o pondola oku popia hati: “Nda limbuka esunga lieci o lekisila ocituwa caco. Pole ovina wa yeva viatiamẽla kokuetu, haviociliko. O yongola hẽ okuti ndi lombolola ovina viaco?” Anga hẽ eye ka tava kovina tu longisa ndeci oku tundisiwa vekongelo ale oku kapiwa osonde? Citava okuti o popia ndoco: “Ndi tava kovina wa popia. Momo omanu vamue va siatavo oku kuata ovisimĩlo vimuamue. Citava hẽ okuti, ndu ku lekisa cimue Vembimbiliya catiamẽla kovina tu longisa?”
Nda omunu wa sanga wa tema calua, citava oku tunda konjo yaye okuti ka tu popi cimue. Nda eye wa pinga okuti Olombangi Via Yehova ka ci tava vali oku u sandiliya konjo yaye, u sapuila okuti tu tava kocisimĩlo caye.

Vokuenda Kuosãi Seteka Ndoco:

Konomuisa ovipama viaco vokuenda kuefendelo liene liepata.
Noke yoku nyula omunu wa kundila, sapela lamanji wa tunda laye kupange woku kunda ndomo wa sukilile oku tambulula lonjila yimue ya sunguluka.