Upange Woku Laleka Omanu Oku Enda Konjivaluko u ka Fetika 17 Yelombo

1. Upange upi u ka fetika keteke 17 Yelombo?

¹ Onjivaluko yi lingaiwa unyamo lunyamo yi sapula okufa kua Yesu. (1 Va Kor. 11:26) Omo liaco, tu yongola okuti vakuetu va kala letu oco va yeve ndomo Yehova a lekisa ocisola poku eca ombanjaile yocisembi. (Yoa. 3:16) Unyamo ulo upange woku laleka omanu Konjivaluko u ka fetika Casapalo 17 Yelombo. O kasi hẽ oku linga esokiyo lioku talavaya calua kosãi yaco?

2. Nye tu sukila oku popia poku eca otuikanda tuelaleko?

² Ceci tu Popia: Ciwa oku teta onimbu poku fetika ombangulo. Tu pondola oku popia ndoco: “Kalunga. Tu yongola oku eca kepata liove okokanda koku laleka omanu oku enda kocipito cimue ci kuete esilivilo ci ka lingiwa koluali luosi, keteke 5 ya Kupupu. Ku ka lingiwa ohundo yimue yi ka lombolola eci olofa via Yesu via tẽlisa kuenda eci a kasi oku linga cilo. Okokanda aka, ka lekisa ocitumãlo kuenda elivala liohongele yaco vimbo lietu.” Poku eca otuikanda tuaco kesulilo liosemana citavavo oku eca olorevista nda cecelela.

3. Tu laleka ndati etendelo lialua liomanu ndomo ci litava lepondolo lietu?

³ Laleka Omanu Valua: Ocimãho cetu oku laleka omanu valua ndomo ci litava lepondolo lietu. Laleka vana va lilongisa love Embimbiliya, vana o ka linga epasu, epata, vana vu talavayela kumosi, vana vu tangela kumosi, vana vu lisungue lavo, kuenda omanu vakuavo wa kũlĩha. Akulu vekongelo va ka eca olonumbi ndomo ocikanjo cekongelo ci tokekiwa. Upange woku laleka omanu konjivaluko u lingaiwa unyamo lunyamo wa siata oku eca onima yiwa. Ukãi umue eci a iñila vocitumãlo cohongele unyamo wa pita, manji umue ukuakutumãlisa wo kuatisa oku sanga ukundi wo laleka. Ukãi waco wa popia hati ka kũlĩhile laumue vocitumãlo cilo, kuenda wa tambula okokanda kelaleko ku umue wa kala oku kunda konjo lanjo eteke limue komẽle.

4. Esunga lipi tu kuete lioku lekisa ombili kupange woku eca okokanda kelaleko?

⁴ Ci tava okuti omunu umue o kala love Konjivaluko omo liokokanda kelaleko wo sila. Nda omanu va tava, nda ka va tava, alikolisilo ove a ka eca uvangi. Okokanda kelaleko ove o ka eca, ka ka lombolola okuti Yesu cilo Osoma yimue yi kuete unene. Ombili yove kupange waco yi ka lekisa ku vosi o ka sanga vocikanjo, kakundi vakuavo, kuenda ca piãla enene ku Yehova okuti ove wa sanjukila ombanjaile yocisembi.—Va Kol. 3:15.