Tu Amamiko Oku Kuata Uloño Kupange Woku Kunda Oco tu Kuatise Vana va Lekisa Onjongole

“Lilava ove muẽle. Lavavo oku longisa kuove.” (1 Tim. 4:16) Upostolo Paulu, wa eca elungulo eli ku Timoteo okuti li tu kuatisavo oku amamako lupange wetu woku kunda, ndaño ndopo tua fetika, ale tu kasi ale otembo yalua kupange waco. Vupange Wetu Wusoma mu ka sandekiwa ovipama viokaliye losapi hati: “Tu Amamiko Oku Kuata Uloño Kupange Woku Kunda,” okuti vi ka tu kuatisa oku linga ovina viaco. Ocipama locipama, ci ka lombolola onumbi yimue yi kuete esilivilo okuti, mu sangiwa olonumbi vimue vi lekisa ndomo tu ci linga. Vokuenda kuosãi, vosi yetu tu vetiyiwa oku kapako olonumbi viaco. Noke yosãi yaco, onepa yimue Yohongele Yupange yi ka tu vetiya oku lombolola ndomo oku kuama olonumbi viaco, ci tu kuatisa oku loñoloha. Kosãi yaco, tu vetiyiwa oku kuatisa vana va lekisa onjongole.

Esunga Lieci ci Kuetele Esilivilo: Tu sukila oku likolisilako oco tu tẽlise ocikele cetu coku kunda. Tu sukilavo oku nyula omanu vana va lekisa onjongole, oco tu limbuke onima yi tunda kombuto yondaka ya Suku tua siata oku waya. (Mat. 28:19, 20; 1 Va Kor. 3:6-9) Vovina viaco, mua kongela oku nyula omanu tua kundila oco tu amameko oku va longisa Embimbiliya. Omo liaco, eci tu sanga omanu va lekisa onjongole tu sukila oku soneha olonduko viavo.