Oco Ombuto yi Kule ci Sukila Oku yi Tapela

1. Nye ci sukila oku tapeliwa oco ci kule?

¹ Ombuto ya kũlĩwa posi, ci sukila oku yi tapela oco yi kule. Cimuamue haico ci pita lombuto yocili yi kũlĩwa vutima womanu vocikanjo cetu. (1 Va Kor. 3:6) Tu sukila oku linga epasu kuenda oku tapela ombuto yaco yocindekaise Londaka ya Suku nda tu yongola okuti yi kuata olombombo, yi kula, kuenda yi telẽha.

2. Tu kuatisa ndati omunu oku kuata onjongole yoku sapela vali kepasu likuavo?

² Linga Epulilo Limue: Eci o pongiya ocindekaise cove, momo lie ku pongiyilavo epulilo limue o pondola oku tambulula poku linga epasu? Linga epulilo liaco kesulilo liombangulo yatete, kuenda sokiya oku linga epasu. Vamanji vamue va siata oku kuatisiwa poku nõla epulilo limue velivulu Embimbiliya li Longisa oco ci va ecelele oku fetika elilongiso Liembimbiliya velivulu liaco.

3. Poku soneha onumbi yomunu wa sapela laye, ovina vipi o sukila oku kongelamo?

³ Soneha Olonumbi: Noke yoku malusula ombangulo yatete, soneha ovina viosi wa sapeli. Soneha onduko yaye kuenda onumbi yonjo. Ciwa oku soneha eteke lowola wa sapela laye, ovina wa vanguli kuenda elivulu wo wĩha. Anga hẽ eye wa popia okuti o kuete ale etavo? Eye o kuete hẽ epata? Wa lekisa onjongole kuenda wa lombolola ovina vi u sakalaisa? Ovina evi, vi ka ku kuatisa kombangulo yikuavo eci o ka linga epasu. Sonehavo eteke wa liusiki oku linga epasu, kuenda epulilo o ka tambulula?

4. Eci omunu a lekisa onjongole momo lie tu sukilila oku kuata epandi?

⁴ Pandikisa: Satana ka ka puyuka kalikolisilo aye oku ‘nyõla ondaka’ ya wayiwa vovitima viomanu. (Mar. 4:14, 15) Ku ka liwekepo nda ca tĩla oku sanga vali omanu va lekisa onjongole. O pondola hẽ oku soneha ukanda oco o u sie pepito? Manji umue ukãi okuti ukundi wotembo yosi, wa fetika elilongiso Liembimbiliya lukãi umue pepito liaye pole ka tẽlele vali oku u sanga konjo, kuenje wo sonehela ukanda. Eci manji o sanga konjo, ukãi waco wa sanjukile calua omo liocisola va lekisa kokuaye. Osimbu tu tapela olombuto viocili Cembimbiliya, tu kuata esanju poku mola ndomo olombuto viaco vi telẽha, vi kula kuenda vi “ima, vamue akũi atatu, vamue akũi epandu, vamue ocita.”—Mar. 4:20.