Upi Ongangu Kovaprofeto—Sofoniya
1. Ulandu upi u lekisa okuti Sofoniya wa kala uprofeto kuenda ongangu yipi yiwa a tu sila koloneke vilo?
1 Cakala vokati kunyamo ocita epanduvali O.Y, eci efendelo lia Baale lia enda oku lingiwa vo Yuda. Kotembo yaco Soma Amoni okuti ka sungulukile oco a pondiwa kuenda komangu yuviali waye, kua kapiwa soma Yosia. (2 Asa. 33:21–34:1) Vokuenda kuotembo yaco, Yehova wa tuma uprofeto Sofoniya oco a sandeke eyambulo liatiamẽla kesombiso liofeka yaco. Ndaño okuti Sofoniya wa tiamẽlele kepata lia va Yudea, pole, ka kuatele ohele yoku sandeka esapulo lia Yehova lioku yambula ofeka yo Yuda. (Sof. 1:1; 3:1-4) Cimuamue aco okuti, tu pondolavo oku kuama ongangu ya Sofoniya yoku lekisa utõi kuenda ka tu ka eceleli okuti epata lietu li tu tateka oku vumba Yehova. (Mat. 10:34-37) Esapulo lipi Uprofeto Sofoniya a sandeka, kuenda onima yipi yeyililako?
2. Nye tu sukila oku linga oco tu popeliwe keteke lionyeño ya Yehova?
2 Sanda Yehova: Ocili okuti Yehova eye lika o tẽla oku popela omanu keteke lionyeño yaye. Omo liaco uprofeto Sofoniya wa lungula omanu vosi vo ko Yuda oco va sande Yehova, oku sanda esunga, lokuomboka, osimbu eteke liaco ka lia pitilĩle. (Sof. 2:2, 3) Cimuamue aco ca siata oku pita koloneke vilo. Tu sukila oku kuama ongangu ya Sofoniya yoku sapuila omanu oco va sande Yehova, pole, tu sukilavo oku kapako elungulo liaco okuti lalimue eteke “tu tinduka koku kuama Yehova.” (Sof. 1:6) Omo liaco, tu pondola oku sanda Yehova poku lilongisa ondaka yaye kuenda oku likutilila oco a tu kuatise oku kuama olonumbi viaye. Tu sanda esunga poku kuata ovituwa viwa komuenyo wetu. Tu sanda umbombe poku kuata ocituwa coku pokola kuenda oku tava kolonumbi via Yehova vi eciwa lekuatiso liocisoko caye.
3. Momo lie tu sukilila oku kuata ocituwa ca sunguluka kupange woku kunda?
3 Onima Yiwa: Esapulo liesombiso Sofoniya a sandeka, lia vetiya omanu vamue vo ko Yuda oku linga apongoloko, capiãla enene umalẽhe Yosiya okuti eci a fetika oku sanda Yehova wa kala omõla. Noke Soma Yosiya wa linga upange woku malako efendelo liesanda vofeka. (2 Asa. 34:2-5) Koloneke vilo, ndaño ombuto yimue Yusoma yi wayiwa kohulo yonjila, kocikalakala, ale pokati kocambanda, pole, yikuavo yi kũliwa vongongo yiwa kuenje yima apako awa. (Mat. 13:18-23) Omo liaco, tu koleli okuti Yehova o ka amamako oku sumũluisa alikolisilo etu nda tua pesila otembo yetu kupange woku sandeka Usoma.—Osa. 126:6.
4. Momo lie tu sukilila oku amamako ‘oku talamẽla Yehova’?
4 Omanu vamue va kala kofeka yo Yuda va simĩle okuti Yehova lalimue eteke a ka nena eyambulo liaco. Omo liaco, Yehova wa likuminyile ku vosi okuti eteke liaye lia kala ocipepi. (Sof. 1:12, 14) Yehova wa ponduile lika oku popela omanu vana va tilila kokuaye. (Sof. 3:12, 17) Cimuamue aco okuti ‘nda tu amamako oku talamẽla Yehova, tu pondola oku kuata esanju poku sivaya Suku kumue la vamanji!—Sof. 3:8, 9.