O Kasi hẽ Oku Lipongiyila Ocipito Conjivaluko?

Ca kala keteke 13 ya Nisana yunyamo wa 33 K.K. Yesu wa kũlĩhile okuti wa sukilile oku kala lolondonge viaye kuteke wa sulako osimbu ka pondiwile. Eye wa linga lavo ocipito Copaskua kuenda wa handeleka oku linga ocipito cokaliye okuti Ondalelo ya Ñala. Ovipito viosi vi lingiwa vi sukila oku pongiyiwa ciwa. Eli olio esunga lieci Yesu a tumila Petulu la Yoano oco va pongiye ovina vioku linga ocipito caco. (Luka 22:7-13) Omo liaco, Akristão va linga Ocipito Conjivaluko va sukilavo oku lipongiya ciwa. (Luka 22:19) Nye tu sukila oku linga oco tu li pongiyile ocipito Conjivaluko ci ka lingiwa keteke 3 liosãi ya Kupupu?

Ndomo Akulu Vekongelo va Lipongiya:

Ku lingiwe esokiyo lioku pongiya Onjango Yusoma ale ocitumãlo cikuavo. Kũlĩhisi okuti ocitumãlo caco, ci ecelela okuti omanu valua va kalamo, mu kala ocinyi kuenda mu pita ofela. Ku lingiwe esokiyo liokuti ocitumãlo caco ci yelisiwa ciwa osimbu Ocipito ka ca fetikile.
Nõli manji umue wa loñoloha oco a linge ohundo, la manji ukuakusongola kuenda vamanji va ka linga ohutililo yoku pitisa ombolo lovinyu.
Nda kocitumãlo caco ku ka lingiwa olohongele vikuavo, ku lingiwe esokiyo lielivala ku ka fetika ohongele yaco, kuenda elivala omanu va fetika oku iñila loku tunda kocitumãlo caco.
Ku nõliwe vamanji va ka tumalisa kuenda ava va ka pitisa ombolo lovinyu.
Ku lingiwevo esokiyo oco ku kale ombolo lovinyu, alonga, olokopo viovinyu, o mesa kuenda etuaya lio komesa.

Ndomo Akundi va Lipongiya:

Ku lingiwe esokiyo lioku kuatisa kupange woku eca o kokanda koku laleka omanu oku enda Kocipito Conjivaluko.
Soneha olonduko viomanu vamue ndeci: Vana va lilongisa Embimbiliya, epata, akamba vo kosikola, akamba vo kupange, lomanu vakuavo oco o va laleke.
Tanga ulandu Wembimbiliya watiamẽla kocipito Conjivaluko kuenda sokolola lutate ovina viaco.
Poku enda kocipito Conjivaluko yolela vana va lalekiwa.