O Kasi hẽ Oku Lipongiyila Ocipito Conjivaluko?

Yesu wa laikele oku linga o Paskoa ya sulako. Momo olofa viaye via kala ale ocipepi kuenda eye wa sokiyile okulia o Paskoa lolondonge viaye kuenda oku tumbika ocipito cokaliye okuti, Ondalelo ya Ñala yi lingiwa unyamo lunyamo. Kuenje eye wa tuma Petulu la Yoano oco va ka pongiye ohondo yaco. (Luka 22:7-13; tala ociluvialuvia koñoño.) Eci ci tu ivaluisa okuti tu sukila oku lipongiyila Ocipito Conjivaluko keteke 27 Yelombo. Akongelo a siata oku linga asokiyo ndeci: manji o ka linga ohundo yaco, ombolo lovinyu kuenda ovina vikuavo. Omo liaco, nye tu sukila oku linga omunu lomunu pokati ketu, oco tu li pongiyile Onjivaluko?

Pongiya utima. Tanga kuenda sokolola lutate Kovipama Viembimbiliya Viatiamẽla Konjivaluko. Ovipama vimue vi sangiwa velivulu Konomuisa Ovisonehua Eteke Leteke. Vo apendice B12-A kuenda B12-B vo Tradução do Novo Mundo da Bíblia Sagrada, mu sangiwa ovolandu akuavo atiamẽla kulandu waco. (Talavo Ekalo Liakristão kuenda Oku Kunda ya Kupupu 2020.) Apata a pondola oku sangamo olonumbi va pondola oku kuama vokuenda kuefendelo liavo liepata catiamẽla kesilivilo liocisembi poku kuatisiwa lo Índice das Publicações da Torre de Vigia, ale Lelivulu Lioku Konomuisa Liolombangi Via Yehova.

Laleka omanu vakuavo oku enda kocipito. Lieca olumue kupange woku laleka omanu. Sokolola komanu o ka laleka ndeci, kapasu, komanu o songola Embimbiliya, kakamba kuenda kapata. Akulu vekongelo va sukila oku laleka vana va liwekapo oku kunda loku endaenda kolohongele. Ivaluka okuti, nda umue ka kasi vocikanjo cove, o pondola oku sanda elivala kuenda ocitumãlo Onjivaluko yi ka lingiwa vocikanjo a sangiwa poku iñila ponepa KOKUETU vo jw.org kefetikilo, loku tioka ponepa “Onjivaluko.”

Nye vali tu sukila oku linga oco tu lipongiye?