Apulilo A Tambuluiwa

◼ Anga hẽ akundi va pondola oku talavaya lo Internet poku kunda ale poku longisa omanu va tunda kolofeka vikuavo?

Akundi vamue va siata oku talavaya ciwa lonumbi yetu yo Internet oco va longise Embimbiliya komanu va sangiwa kolofeka vina okuti ka ca lelukile oku kundilako ale ka kuli akundi valua. Olonjanja vimue poku ci linga, tua siata oku kuata onima yiwa. Pole, akundi vamue va siata oku kuata ovitangi poku tuma asapulo komanu ka va kũlĩhile loku sapela lavo vo Internet. (Tanga Vupange Wetu Wusoma Wevambi Linene wo 2007, kem. 3.) Ndaño okuti ocimãho cetu oku kundila esapulo Liusoma komanu va kuete utima wa sunguluka, pole, olonjanja vimue ci pondola oku kokela manji umue oku kuata akamba vavĩ oku kongelamo olonanguluke. (1 Va Kor. 1:19-25; Va Kol. 2:8) Kolofeka vina okuti ka ca lelukile oku kundilako omo lialambalalo, ovikanda vi tumiwako vi pondola oku pitĩla peka liolombiali. Ovina vi sonehiwa vovikanda viaco, citava okuti vi kokela ovitangi ku vamanji va sangiwa kofeka yaco. Omo liaco, ka ci tava okuti akundi va sandiliya vo Internet omanu vokolofeka vikuavo oco va va kundile olondaka viwa Viusoma.

Nda okuti poku eca uvangi ka wa sokiyiwile tu kundila omunu umue wa tunda kofeka yikuavo, tu pondola oku u lekisa ndomo a iñila vonumbi yetu yo Internet jw.org, oco a kuate alomboluilo akuavo ale ndomo a pondola oku sandiliya ofiliale yi sangiwa kofeka a kasi, okuti ka tu vetiya lika onjongole yaye lekuatiso lio Internet noke lioku tiukila kofeka yaye. Tu u vetiyavo oku sandiliya Onjango yimue Yusoma yi kasi ocipepi lonjo yaye. Pole, kolofeka vimue ka kuli Olonjango Viusoma. Nda okuti eye o yongola oku nyuliwa Lombangi Yimue ya Yehova kocitumãlo a kasi, tu pondola oku soneha o formulariu losapi hati, Queira Visitar, (S-43) loku yeca ku sonehi wekongelo kuenje eye o ka kuama olonumbi vi sangiwa vo jw.org. Vamanji Kofiliale va sangiwa kofeka yomunu waco wa lekisa onjongole, va kuata ukũlĩhiso wa suapo kuenje va ka linga eliangiliyo lioku longisa Embimbiliya komunu waco.—Tanga Vupange Wetu Wusoma wosãi Yevambi wo 2014, kem. 7, kuenda Vupange Wetu Wusoma wosãi ya Kuvala wo 2011, kem. 2.

Nda okuti tua siata oku nyula omunu umue kuenje wa ilukila kofeka yikuavo, ale tua siataoku longisa Embimbiliya komunu umue o kasi kofeka yikuavo lekuatiso lio Internet, tu sukila oku kuama olonumbi via tukuiwa. Kuenje, tu pondola oku amamako oku vetiya onjongole yomunu waco toke eci ku mõleha ukundi umue wo kofeka yaye ocoo kuatise. Omo liaco, nda okuti omunu waco o kasi kofeka yimue okuti ka ca lelukile oku kundilako omo lielambalalo, tu sukila oku kuata utate poku sapela ovina viatiamẽla Kembimbiliya vovikanda, votelefone ale vo Internet. —Mat. 10:16.