Nyula Lonjanga Omanu va Lekisa Onjongole

Tunde eci onumbi yetu yo Internet ya sandekiwa, etendelo liomanu va pinga oco va lilongise Embimbiliya lia siata oku livokiya lonjila yimue yi komõhisa. Apingilo aco a siata oku lingiwa lekuatiso lioku eca uvangi kovitumãlo ku sangiwa omanu valua. Ofiliale yi tambulula lonjanga apingilo aco. Nda okuti epingilo liaco lia lingiwa vo jw.org, akulu vekongelo va kasi vocikanjo mu sangiwa omunu wa lekisa onjongole, va tambula ukanda u tunda kofiliale noke yoloneke vivali. Ulandu wupange woku kunda, u lekisa okuti nda omunu wa linga epingilo lioku lilongisa Embimbiliya, ciwa oku sandiliya lonjanga omunu waco okuti ka pa piti olosemana vialua. Tu limbuka ndati okuti tua kuatisa omunu osimbu onjongole yaye ka ya tepulukile?—Mark. 4:14, 15.

Nda omunu umue wa lekisa onjongole pole ka kasi vocikanjo cove, ciwa oku soneha lonjanga o Formulariu Queira Visitar (S-43) kuenda oku yeca kumanji usonehi noke yohongele. Eci pa pita eteke limosi ale avali, manji usonehi wekongelo a kuame olonumbi vi eciwa lofiliale poku tala vonumbi yo jw.org Yekongelo. Akulu vekongelo va sukila oku kũlĩhĩsa onumbi yo Internet olonjanja viosi. Nda va tambula ukanda womunu umue wa lekisa onjongole, va sukila oku linga eliangiliyo lioku ka nyula lonjanga omunu waco. Ukundi wa noliwa o sukila oku ci linga lonjanga. Nda omunu waco ka sangiwile konjo citava oku sia okokanda mua sonehiwa olonumbi viatiamẽla kokuove.